Nos Ta e Clase Cu Tin Fe

Ofreciendo un Mensahe di Consuelo na Italia

JEHOVA ta “e Dios di tur consuelo.” Dor di siña imit’é, su sirbidónan “por consolá esnan cu ta den cualkier clase di tribulacion.” (2 Corintionan 1:3, 4; Efesionan 5:1) Esaki ta un dje obhetivonan principal dje trabou di predicá cu Testigonan di Jehova ta efectuá.

Yudando un Muher den Necesidad

Pobresa, guera i un deseo pa haña un mihó bida, foral den añanan recien, a pone hopi hende imigrá bai paisnan mas ricu. Pero no ta fácil pa nan adaptá n’e ambiente nobo. Manjola tabata biba huntu cu su compatriotanan albanes na Borgomanero. Dor cu e tabata ilegal na Italia, e tabatin miedu di papia cu Wanda, kende ta un Testigo di Jehova. Pero, finalmente Wanda a logra traha un afsprak cu Manjola. I masha lihé el a mustra hopi interes pa studia e Palabra di Dios, aunke e barera di idioma a haci esei difícil. Sin embargo, despues di a bishit’é algun biaha, Wanda no por a haña ningun hende na cas mas. Kico a sosodé? Wanda a haña sa cu tur e habitantenan dje cas ei a hui pasobra polis tabata busca un di nan—Manjola su namorado—pa motibu di asesinato!

Cuater luna despues, Wanda a topa Manjola atrobe. “E tabata flacu i bleek, i tabatin aspecto di un persona cu realmente tabatin un bida duru,” Wanda ta corda. Manjola a splik’é cu su ex-namorado tabata prezu i cu amigunan, na ken el a acudí pa yudansa, a lagu’é na caya. Den su desesperacion, el a haci oracion na Dios pa yudansa. Anto el a corda riba Wanda cu a papia cuné tocante Bijbel. Esta felis Manjola a keda di mir’é atrobe!

Nan a bolbe cuminsá un studio di Bijbel, i no a dura mashá cu Manjola a cuminsá asistí na reunionnan cristian. El a logra haña permit legal pa biba na Italia. Despues di un aña, Manjola a bira un Testigo bautisá. Consolá dor dje promesanan divino, el a bolbe Albania pa compartí Bijbel su mensahe consolador cu su compatriotanan.

Dunando Testimonio na un Campamentu di Imigrante

Hopi congregacion na Italia a haci areglo pa duna testimonio na imigrantenan manera Manjola. Por ehempel, un congregacion na Florencia a haci areglo pa bishitá un campamentu di imigrante regularmente. E habitantenan dje campamentu —hopi di Oost Europa, Macedonia i Kósovo—tabata experenciá vários problema. Algun tabatin problema cu droga i alcohol. Hopi tabata sostené nan mes dor di cometé robonan menor.

Tabata un desafio pa predicá den e comunidad aki. Sin embargo, un predicadó di tempu completo cu yama Paola, cu tempu, a drenta den contacto cu Jaklina, un señora di Macedonia. Despues di un par di combersacion, Jaklina a animá su amiga Susanna p’e studia Bijbel. Susanna, na su turno, a papia cu otro miembronan di famia. Djis despues, tabatin cincu miembro di famia ta studia Bijbel regularmente, asistí na reunionnan cristian i practicá loke nan siña. Apesar dje problemanan cu nan tin cu enfrentá, nan ta haña consuelo for di Jehova i su Palabra.

Un Soeur Ta Aceptá Consuelo for di Jehova

Den e pueblo Formia, un evangelisadó di tempu completo cu yama Assunta a papia cu un señora cu tabatin poco dificultad pa cana. E señora tabata un soeur cu ta pertenecé na un órden religioso cu ta yuda hende malu i débil tantu na hospital como na casnan privá.

Assunta a bisa e soeur: “Bo tambe ta sufri, no ta berdad? Lástimamente, nos tur tin problema cu nos tin cu soportá.” E ora ei, e soeur a cuminsá yora i a splica cu e tabatin problema serio cu salú. Assunta a anim’é, dor di bis’é cu e Dios di Bijbel por a consol’é. E soeur a aceptá e revistanan basá riba Bijbel cu Assunta a ofrec’é.

Durante nan siguiente combersacion, e soeur, kende su nomber tabata Palmira, a admití cu e tabata sufri masha hopi. Pa hopi tempu el a biba den un instituto cu soeurnan tabata dirigí. Despues cu el a sali temporalmente pa motibu di malesa, nan no a permitié drenta bek. Apesar di esei, Palmira a sinti cu e tabatin un obligacion na Dios debí n’e votonan cu el a haci como soeur. El a acudí na sanadó pa “tratamentu,” pero e experencia ei a traumatis’é. Palmira a bai di acuerdo pa studia Bijbel i pa un aña el a asistí n’e reunionnan cristian. Anto el a muda bai un otro área, i e Testigo a perde contacto cuné. A pasa dos aña promé cu Assunta a top’é atrobe. Palmira a haña hopi oposicion di parti di su famia i miembronan di clero. Tog, el a reanudá su studio di Bijbel, a haci progreso spiritual i el a bautisá como Testigo di Jehova.

Sí, e mensahe dje “Dios cu ta suministrá awante,” ta animá hopi hende. (Romanonan 15:4, 5) P’esei, Testigonan di Jehova na Italia ta decididu pa sigui imitá Dios dor di ofrecé su maraviyoso mensahe di consuelo na otro hende.