Bo Por Conoce Futuro!

Mayoria hende ta pensa seriamente tocante futuro. Nan kier planea, haci inversion sabí i sinti nan sigur. Pero, ta existí un manera pa sa kico mañan lo trece cuné?

DEN nan esfuerso pa conocé futuro, hende a experimentá cu tur sorto di cos. Científico cu ta studia asuntunan di sociedad humano ta ser yamá futurólogo. Nan ta analisá desaroyonan actual, anto a base di esei nan ta haci pronóstico. Economistanan ta haci mescos riba nan tereno. Astrólogo i miradónan di destino ta consultá horoscop, bola di cristal i ocultismo, i masha hopi hende ta bai nan tras. Por ehempel, e astrólogo frances Nostradamus ta popular ainda, apesar cu e tin siglonan morto caba.

Tur e hendenan aki cu ta pretendé di ta profeta a resultá sumamente inconfiabel i decepcionante. Di con? Dor cu nan ta ignorá Jehova Dios i su Palabra, Bijbel. Ta p’e motibu ei nan no por contestá ni preguntanan básico manera: ‘Di con mi por ta sigur cu e cosnan cu Bijbel ta pronosticá lo sosodé? Con nan ta cuadra den Dios su propósito pa hende? Con ami cu mi famia por saca beneficio dje profecianan aki?’ Bijbel ta contestá e preguntanan aki.

Profecia bíblico ta superior den hopi otro sentido tambe. Distinto for di pronósticonan astrológico, e ta laga lugá pa un hende su boluntad liber. Pues, niun hende no ta víctima di destino. (Deuteronomio 30:19) Bukinan manera di Nostradamus ta moralmente bashí, i nan ta tapa e bashí aki cu misterio i sensacionalismo. Pero profecia bíblico tin un base moral firme. E ta splica di con Dios ta bai haci segun su propósito. (2 Crónicanan 36:15) I Jehova su profecianan no ta faya nunca, pasobra “Dios . . . no por gaña.” (Tito 1:2) P’esei, hende guiá p’e Palabra di Dios ta biba di un forma iluminá, yen di propósito i felis, sin perde tempu i recurso precioso na actividadnan inútil.—Salmo 25:12, 13.

E puntonan aki, i hopi otro, a keda tratá na e Congresonan di Distrito di Testigonan di Jehova pa 1999/2000 “Dios Su Palabra Profético,” cu a ser tené rond mundu. Discurso, entrevista, demostracion i un drama bíblico a hala atencion dje auditorio na e patrimonio spiritual maraviyoso cu esnan cu ta studia i aplicá Dios su palabra profético ta disfrutá di dje. E siguiente artículo lo repasá algun punto principal excitante dje congreso.