Beibel no ta bisa ku kada hende tin un angel wardadó. Ta bèrdat ku Hesus a bisa un biaha: “Wak pa boso no despresiá un di e chikitunan akí [Kristu su disipelnan], pasobra mi ta bisa boso ku nan angelnan den shelu semper ta mira kara di mi Tata ku ta den shelu.” (Mateo 18:10) Pero, en bes di bisa ku kada hende tin un angel wardadó, Hesus simplemente a bisa ku angel tin masha interes den kada un di su disipelnan. P’esei, Dios su sirbidónan berdadero no ta tuma rísikonan imprudente i deskabeyá, pensando ku angel di Dios lo protehá nan.

Esei ke men ku angel no ta yuda hende? Nò. (Salmo 91:11) Algun hende ta konvensí ku Dios a duna nan guia i protekshon mediante angel. Kenneth, menshoná den e promé artíkulo, a pensa esei. Aunke nos no por tin sigur, e por tin rason. Testigunan di Yehova hopi biaha ta haña evidensia ku nan ta risibí yudansa di angel ora nan ta prediká. Pero komo ku angel ta invisibel, nos no por bisa te na ki grado Dios ta usa nan pa yuda hende ku diferente asuntu. Sinembargo, no tin nada malu pa gradisí e Todopoderoso pa kualke yudansa ku nos ta pensa ku el a duna.—Kolosensenan 3:15; Santiago 1:17, 18.