• E ta skohí pa Dios. “Ta ami . . . a establesé mi rei . . . Lo mi duna bo e nashonnan komo bo herensia, i e finnan di tera komo bo poseshon.”—Salmo 2:6, 8.

• E ta un heredero di Rei David. “Un yu a nase pa nos, un yu hòmber ta duná na nos  . . . Lo no tin fin na e oumento di su gobernashon i di pas, riba e trono di David i riba su reino, pa establesé esaki.”—Isaías 9:6, 7.

• El a nase na Bètlehèm. “Bètlehèm . . . for di bo lo sali unu pa mi pa ta gobernante . . . E lo ta grandi te na e finnan di tera.”—Mikéas 5:2, 4.

• Hende a rechas’é i mat’é. “El a wòrdu despresiá, i nos no tabatin apresio p’e . . . El a wòrdu traspasá pa nos transgreshonnan, el a wòrdu gòlpiá pa nos inikidatnan.”—Isaías 53:3, 5.

• El a ser resusitá i glorifiká. “Lo bo no entregá mi alma na Sheol [òf, graf], tampoko lo bo no permití bo santu mira korupshon . . . Na bo man drechi tin delisia pa semper.”—Salmo 16:10, 11.

Den henter historia humano, tin un persona so ku ta kuadra ku e deskripshon di un Gobernante ideal. Ken e persona ei ta? Wèl, esei ta Hesukristu. Esaki a keda konfirmá ora un angel a bisa Maria, mama di Hesus: “Dios lo dun’é e trono di su tata David . . . i lo no tin fin na su Reino.”—Lukas 1:31-33.

Hesus nunka a bira gobernante riba tera, pero lo e goberná humanidat desde shelu komo Rei di e Reino di Dios. Dikon e ta un Gobernante ideal? Wak kiko Hesus a hasi tempu e tabata riba tera.

•   Hesus a mustra interes den hende i a yuda nan. Hesus a yuda tur hende, sea ku nan tabata hende hòmber, hende muhé, hóben, mucha chikitu, riku òf pober. (Mateo 9:36; Marko 10:16) Ora un leproso a suplik’é: “Si bo ke, bo por kura mi,” Hesus a haña duele di dje i a kur’é.—Marko 1:40-42.

• Hesus a siña nos kon pa agradá Dios. El a bisa: “Boso no por ta esklabo di Dios i di Rikesa.” Ademas, el a bisa ku nos mester trata otro hende manera nos ke pa otro hende trata nos. Nos ta yama e prinsipio ei Regla di Oro. Hesus a mustra tambe ku Dios ta interesá den loke nos ta hasi, pero no esei so, e ta interesá tambe den loke nos ta pensa i sinti. Pues, pa nos agradá Dios, nos mester kontrolá loke nos ta sinti den nos kurason. (Mateo 5:28; 6:24; 7:12) I Hesus a enfatisá ku pa nos por ta realmente felis, nos mester siña kiko Dios ke pa nos hasi, anto hasi esei tambe.—Lukas 11:28.

• Hesus a siña nos kon pa stima otro hende. Loke Hesus tabata bisa i hasi tabatin un gran efekto riba su oyentenan i e tabata konmové nan kurason. Beibel ta bisa: “E multitut a keda babuká di su manera di siña hende, pasobra e tabata siña nan manera un persona ku tin outoridat.” (Mateo 7:28, 29) Hesus a siña nan: “Stima boso enemigunan.” El a asta hasi orashon pa e hendenan ku tabata responsabel pa su morto. El a pidi: “Tata, pordoná nan, pasobra nan no sa kiko nan ta hasi.”—Mateo 5:44; Lukas 23:34.

Hesus ta e mihó Gobernante pa humanidat pasobra e ta kla pa yuda hende i e ta bondadoso. Pero na ki tempu lo e kuminsá goberná?