ESTA UN BUNITA SPERANSA! Nos Kreador a primintí ku e ta duna nos bida eterno, aki riba tera mes. Pero hopi hende ta haña esei algu duru pa kere. Nan ta bisa: “Tur hende ta muri. Ta parti di bida esei ta.” Otronan ta kere ku ta posibel pa biba pa semper, pero no aki riba tera. Nan ta bisa ku hende por haña bida eterno solamente despues ku nan muri i bai shelu. Kiko bo ta pensa?

Promé ku bo kontestá e pregunta ei, ban wak kon Beibel ta kontestá e tres preguntanan akí: Si bo wak e manera ku nos a ser kreá, kuantu tempu realmente nos mester a biba? Kiko tabata Dios su propósito original pa tera i humanidat? Dikon hende ta muri?

Si nos kompará nos mes ku tur otro forma di bida ku Dios a krea, nos ta realisá ku hende ta realmente úniko Den ki sentido? Beibel ta bisa ku ta hende so Dios a krea den su “imágen” i “semehansa.” (Génesis 1:26, 27) Kiko esei ta nifiká? Wèl, ku hende a haña karakterístika- i kualidatnan ku Dios tin, manera entre otro amor i hustisia.

Es mas, Dios a krea nos ku e kapasidat di pensa, rasoná, distinguí entre loke ta bon i loke ta malu, i ku e deseo di konos’é i di ta su amigu. Pa e motibu ei nos por disfrutá di e universo inmenso i di e maravianan di naturalesa, i tambe di arte, músika i poesia. Mas importante ainda, hende tin e kapasidat úniko di forma un amistat ku nan Kreador. E kualidatnan ei ta hasi hende hopi diferente for di tur otro kriatura riba tera.

Awor pensa un ratu riba lo siguiente: Si Dios tabata ke pa hende biba djis un poko tempu so, pakiko el a krea nos ku kualidatnan asina bunita i e kapasidat sin límite di desaroyá i mehorá esakinan? Echo ta ku Dios a duna nos e kualidat- i abilidatnan úniko akí pa nos por disfrutá di bida aki riba tera pa semper.

Pero tòg tin hende ta bisa ku nunka tabata Dios su intenshon pa hende biba pa semper riba tera. Nan ta bisa ku Dios a traha tera pa hende biba temporalmente riba dje. Tambe nan ta bisa ku ta tèst Dios ta tèst hende aki riba tera pa wak si nan ta meresé di bai shelu pa biba pa semper ku Dios.  Pero si ta asina, akaso no ta Dios ta responsabel pa tur e maldat ku tin riba tera? Pero esei no ta kuadra ku Dios su personalidat, pasobra Beibel ta bisa di dje: “Tur su kamindanan ta hustu; un Dios di fieldat i sin inhustisia, hustu i rekto e ta.”—Deuteronomio 32:4.

Beibel ta bisa bon kla kiko ta Dios su propósito original pa tera: “E shelunan ta e shelunan di SEÑOR, ma tera el a duna na e yunan di hende.” (Salmo 115:16) Sí, Dios a krea tera komo un hogar bunita i permanente pa hende biba riba dje ku tur loke nan tin mester pa disfrutá pa semper di un bida ku ta bale la pena.—Génesis 2:8, 9.

“E shelunan ta e shelunan di SEÑOR, ma tera el a duna na e yunan di hende.”—Salmo 115:16

Ademas, Beibel ta bisa klaramente kiko ta Dios su propósito pa humanidat. El a bisa e promé pareha pa “yena e tera” i hasi “tur ser bibu ku ta move riba tera” someté na nan. (Génesis 1:28) El a duna nan e tera pa nan kuid’é i hasié un paradeis. Esta un bunita privilegio nan a haña! Ta aki riba tera Adam ku Eva i nan desendientenan lo a biba pa semper, i no den shelu.

Pero ta dikon nos ta muri anto? Beibel ta bisa ku un di Dios su kriaturanan spiritual, kende despues a rebeldiá i bira Satanas e Diabel, a purba di laga Dios su propósito den Eden frakasá. Kon el a hasi esei?

Satanas a influensia nos promé mayornan, Adam ku Eva, pa rebeldiá huntu kuné kontra Dios. Satanas a bisa ku Dios tabata skonde algu bon for di nan: e derecho di determiná pa nan mes kiko ta bon i kiko ta malu. Adam ku Eva a skohe e banda di Satanas i a rebeldiá kontra Dios. Kiko tabata e konsekuensia? Manera Dios a spièrta nan, ku tempu nan a muri i a pèrdè nan speransa di biba pa semper den Paradeis riba tera.—Génesis 2:17; 3:1-6; 5:5.

E echo ku Adam ku Eva a rebeldiá kontra Dios ta afektá nos tur te awe. E Palabra di Dios ta bisa: “Pa medio di ún hende [Adam] piká a drenta mundu, i morto pa medio di piká, i asina morto a pasa pa tur hende.” (Romanonan 5:12) Nos ta muri pasobra nos a heredá piká i morto di nos promé mayornan, i no pa motibu di un “plan” di Dios ku ta imposibel pa nos komprondé.

E rebelion den Eden no a stroba Dios di kumpli ku su propósito original pa humanidat i tera. Dios su amor perfekto i su sentido di hustisia a konmov’é pa hasi tur loke ta nesesario pa libra nos for di sklabitut na piká i morto. Apòstel Pablo a splika: “E salario ku piká ta paga ta morto, ma e regalo ku Dios ta duna ta bida eterno pa medio di Kristu Hesus, nos Señor.” (Romanonan 6:23) Amorosamente, Dios “a duna su Yu unigénito [Hesukristu], pa tur ku pone fe den dje no bai pèrdí, ma haña bida eterno.” (Huan 3:16) Dor ku Hesus a ofresé su mes boluntariamente komo un sakrifisio di reskate, el a kumpra bèk tur loke Adam a pèrdè. a

Pronto, Dios su promesa pa kombertí tera den un paradeis lo bira realidat. Abo tambe por disfrutá di e futuro maravioso ei si bo tuma loke Hesus a bisa na pechu: “Drenta di e porta smal, pasobra e kaminda ku ta hiba na destrukshon ta hanchu i espasioso, i hopi ta esnan ku ta pasa riba dje; miéntras ku e porta ku ta hiba na bida ta smal i e kaminda ta pèrtá, i poko ta esnan ku ta hañ’é.” (Mateo 7:13, 14) Sí, bo futuro ta den bo man. Kiko abo lo hasi?