Un regalo por ta masha spesial pa nos pasobra nos a hañ’é di un hende ku tin outoridat òf un hende ku nos ta respetá mashá. Anto aunke tin otro regalo ku no ta kosta mashá, nos ta balorá nan pasobra nos a haña nan di un famia stimá òf un bon amigu. Esaki tabata e kaso ku e regalo ku Russell a duna Jordan, menshoná den e artíkulo anterior. Kiko esaki tin di haber ku e regalo di e reskate?

Di promé, Beibel ta bisa ku “Dios a manda su Yu unigénito na mundu pa nos por haña bida pa medio di dje.” (1 Huan 4:9) Esei ta hasi e regalo akí masha spesial pasobra niun hende no tin mas outoridat ku Dios. Relashoná ku Dios, un salmista hebreo a bisa: “Abo, kende su nòmber ta Yehova, abo so ta e Haltísimo riba henter tera.” (Salmo 83:18, NW) Pues, nos no por haña un regalo for di un ser mas importante ku Dios.

Di dos, Dios ta “nos Tata.” (Isaías 63:16) Kon asina? E ta esun ku a duna nos bida. Ademas, e ta perkurá pa nos lealmente, meskos ku un bon tata ta perkurá pa su yunan. Dios a referí na parti di su pueblo di pasado ku e nòmber Efraim, i a bisa: “Ta Efraim ta mi yu hòmber stimá? E ta mi yu faborito? . . . Mi kurason ta anhelá na dje; siguramente lo mi tin miserikòrdia di dje.” (Yeremías 31:20) Dios ta pensa meskos di su sirbidónan awe. E no ta solamente nos Kreador todopoderoso sino tambe nos Tata i Amigu leal. Esei sigur ta hasi su regalonan mas balioso ainda.

Loke por hasi un regalo masha spesial tambe ta ora e hende ku a duna nos e, no a hasié pasobra e tabata obligá pa duna nos nada, sino pasobra e ta stima nos. Un hende ku ta duna di kurason no ta ferwagt di haña algu a kambio di su bondat.

Dios a duna nos su Yu pasobra e ta stima nos. Beibel ta bisa: “Pa medio di esaki Dios a revelá e amor ku e tin pa nos: Dios a manda su Yu unigénito.” Ku ki propósito? “Pa nos por haña bida pa medio di dje.” (1 Huan 4:9) Dios tabata obligá pa hasi esei? Niun ora so! “E reskate ku Kristu Hesus a paga” ta un muestra di Dios su “bondat inmeresí.”—Romanonan 3:24.

Dikon Dios su regalo ta un muestra di “bondat inmeresí”? Beibel ta splika: “Dios a demostrá su amor pa nos di e manera akí: Kristu a muri pa nos miéntras ku nos tabata pekadó ainda.” (Romanonan 5:8) Motivá pa su gran amor, Dios a yuda hende débil, desampará i pekadó. Nos no meresé e amor ei ni nunka nos lo no por paga Dios bèk. Su regalo ta e muestra di amor di mas grandi di historia.

Un regalo por ta masha spesial tambe pasobra e persona ku a duna nos e a hasi un gran sakrifisio. Ora un persona ta dispuesto pa duna nos algu ku ta di gran balor p’e, nos ta balorá e regalo ei pa motibu di e sakrifisio ku el a hasí.

Dios “a duna su Yu unigénito.” (Huan 3:16) El a duna nos e persona ku mas e ta stima. Durante e míles di miónes di añanan ku Dios tabata krea e universo, Hesus a traha na su lado i a bira Dios “su delisia.” (Proverbionan 8:30) Hesus ta Dios su “Yu stimá” i “e imágen di e Dios invisibel.” (Kolosensenan 1:13-15) Nunka no tabatin dos persona mas será ku otro.

Ma Dios “no a spar ni su mes Yu.” (Romanonan 8:32) Yehova a duna nos lo mihó ku e tabatin. Ningun regalo no a kost’é mas ku esei.

Un regalo por ta masha spesial tambe pasobra e ta satisfasé un nesesidat ku nos tin, kisas un nesesidat urgente. Por ehèmpel, lo bo no keda masha gradisidu si un hende, di su propio boluntat, paga pa un tratamentu médiko ku bo mes no por afòrt i ku lo por salba bo bida? E regalo ei sin duda lo ta masha presioso, no ta bèrdat?

Beibel ta bisa: “Meskos ku den Adam tur ta muri, asina tambe den Kristu tur lo haña bida.” (1 Korintionan 15:22) Komo desendiente di Adam, nos tur ta “muri,” i nos no por skapa di malesa i morto ni nos no por rekonsiliá nos mes ku Dios i keda sin kulpa dilanti dje. I komo simpel sernan humano, nos no por duna nos mes òf otro hende “bida.” Beibel ta bisa: “Di ningun manera un hende por redimí su ruman, ni paga Dios plaka di reskate p’e . . . E lo no por paga p’e nunka.” (Salmo 49:7, 8) Nos tin mester di yudansa urgente pasobra nos no por paga e preis di e reskate. Riba nos mes, nos lo no logra nada.

Pa motibu di Yehova su gran amor, di buena gana el a paga pa e ‘tratamentu’ ku nos tin mester pa salba nos bida, i el a hasi esei mediante Hesus. Kon e reskate ta logra esaki? Beibel ta bisa: “E sanger di Hesus, su Yu, ta limpia nos di tur piká.” Sí, fe den e sanger ku Hesus a drama ta habri kaminda  pa nos haña pordon pa nos pikánan i bida eterno. (1 Huan 1:7; 5:13) I kon e reskate lo benefisiá nos sernan kerí ku a muri? Beibel ta bisa: “Ya ku morto a bini pa medio di un hende, resurekshon di e mortonan tambe ta bini pa medio di un hende [Hesus].”—1 Korintionan 15:21. *

E sakrifisio di Hesus ta e regalo di mas grandi den historia pasobra ta e ser di mas haltu a duna nos e debí na su gran amor. Niun persona no a yega di hasi un sakrifisio mas grandi pa nos ku Yehova Dios. No tin niun otro regalo ku ta satisfasé nos nesesidat di mas grandi, esta, di ser librá di piká i morto. Sí, e reskate ta un regalo úniko.