E SLEIPER ku forma di boto den Jordan su man no tabata parse algu masha spesial. Sinembargo, e sleiper akí tabata un di e kosnan di mas balioso ku e tabatin. Jordan a bisa: “Ta Russell, un amigu di kas di edat avansá, a duna mi e sleiper akí tempu mi tabata chikí.” Despues di Russell su morto, Jordan a haña sa ku Russell tabata un gran yudansa pa Jordan su tawela i mayornan den momentonan di difikultat. Jordan a bisa: “Awor ku mi sa mas tokante Russell, e regalo chikitu akí tin mas balor ku nunka pa mi.”

E eksperensia di Jordan ta mustra ku kisas pa algun hende, un regalo tin poko òf niun balor. Pero pa esun ku a hañ’é i ku tin un kurason gradisidu, e por ta algu presioso, di hopi balor. Beibel ta deskribí un regalo di gran balor ku e siguiente palabranan konosí akí: “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.”—Huan 3:16.

Un regalo ku por duna hende bida eterno! Ta eksistí un regalo mas balioso ku esei? Aunke algun hende kisas no ta mira e balor di e regalo akí, kristiannan berdadero sí ta mir’é komo algu “presioso,” òf “kostoso.” (Salmo 49:8; 1 Pedro 1:18, 19) Pero, dikon Dios a ofresé e bida di su Yu komo un regalo pa humanidat?

Apòstel Pablo ta splika dikon ku e siguiente palabranan: “Pa medio di ún hende piká a drenta mundu, i morto pa medio di piká, i asina morto a pasa pa tur hende.” (Romanonan 5:12) E promé hòmber, Adam, a peka ora ku konsientemente el a desobedesé Dios, i p’esei el a haña e kastigu di morto. Pa medio di Adam, morto a pasa pa tur su desendientenan, esta, pa henter humanidat.

Beibel ta bisa: “E salario ku piká ta paga ta morto, ma e regalo ku Dios ta duna ta bida eterno pa  medio di Kristu Hesus, nos Señor.” (Romanonan 6:23) Pa libra hende for di e kondena di morto, Dios a manda su Yu, Hesukristu, na tera pa e sakrifiká su bida perfekto pa humanidat. Anto a base di e sakrifisio ei, konosí komo “e reskate,” tur hende ku pone fe den Hesus lo haña bida eterno.—Romanonan 3:24.

Relashoná ku tur e bendishonnan ku Dios ta duna su sirbidónan mediante Hesukristu, Pablo a deklará: “Nos ta gradisí Dios pa su regalo ku nos no por deskribí ku palabra.” (2 Korintionan 9:15) Sí, e reskate ta un regalo asina ekstraordinario ku nos no tin palabra pa deskribié. Pero di tur e regalonan ku Dios a duna humanidat generosamente, dikon e reskate ta asina sobresaliente? Kiko ta hasié diferente for di kualke otro regalo di Dios? * I kiko esaki mester motivá nos pa hasi? E siguiente dos artíkulonan lo kontestá e preguntanan ei.