PRINSIPIO BÍBLIKO: “Stòp di ta anshá pa boso bida.”—Mateo 6:25.

Kiko esei ta nifiká? Hesus a bisa e palabranan akí den su Sermon Riba Seru. Di akuerdo ku un dikshonario di Beibel, e verbo griego ku a ser tradusí komo “anshá” por referí na “e reakshon natural di un hende debí na pobresa, hamber i otro problemanan ku e ta enfrentá den su bida diario.” Hopi biaha hende ta sinti nan anshá pa kosnan ku lo por sosodé den futuro. Ta normal i ta na su lugá ku nos ta preokupá tokante e nesesidatnan material i bienestar di nos sernan kerí. (Filipensenan 2:20) Pero ora Hesus a bisa pa “no sea nunka anshá,” e tabata konsehá su siguidónan pa evitá di preokupá demasiado, ya ku ora un hende tin muchu miedu di loke por sosodé mañan, esei por kita su goso den bida awe.—Mateo 6:31, 34.

E ta práktiko awe? Ta sabí di nos parti pa apliká e konseho di Hesus. Dikon? Wèl, algun obra di referensia ta bisa ku ora un hende ta preokupá hopi, su sistema nèrvioso ta keda konstantemente aktivo, i e kondishon ei “por kousa problema di salú, manera úlsera, problema ku kurason i asma.”

Hesus a duna un bon motibu pakiko nos no mester ta demasiado preokupá: E no tin sentido. Hesus a puntra: “Kua di boso, ni maske kuantu e ansha, por rèk su bida un krenchi?” (Mateo 6:27) Si nos enfoká riba nos preokupashonnan, nos lo no mehorá ni alargá nos bida ku ni un frakshon di un sekònde. Ademas, hopi biaha, kosnan ta bai mihó di loke nos a imaginá nos mes. Un eksperto a bisa: “Preokupá ku futuro ta tempu pèrdí, i hopi biaha futuro no ta mes malu ku nos a ferwagt.”

Kon nos por evitá ansiedat? Di promé, konfia den Dios. Si Dios ta perkurá kuminda pa para i ta bisti e flornan ku bunitesa, lo e no perkurá pa e nesesidatnan di hende ku ta pone su adorashon na promé lugá den nan bida? (Mateo 6:25, 26, 28-30) Di dos, no wòri ku e dia di mañan. Hesus a bisa: “No sea nunka anshá pa e dia di mañan, pasobra e dia di mañan lo tin su mes inkietutnan.” Bo no ta di akuerdo ku “kada dia tin su mes problemanan”?—Mateo 6:34.

Ora nos ta apliká e konseho di Hesus, nos lo evitá problema físiko. Mas ku esei, nos lo ta trankil, loke Beibel ta yama “e pas di Dios.”—Filipensenan 4:6, 7.