Mustra Empatia
Kiko Ta e Problema?
Si nos enfoká demasiado riba e diferensianan ku tin entre nos i otro hende, nos por mira e diferensianan ei komo defekto. Konsekuentemente, nos por kuminsá pensa ku e personanan ei ta inferior na nos. Un punto di bista asina ta pone ku ta bira difísil pa mustra empatia, esta, pone nos mes den sapatu di otro hende.
Prinsipio di Beibel
“Alegrá ku esnan ku ta alegrá; yora ku esnan ku ta yora.”—ROMANONAN 12:15.
Kiko e versíkulo akí ta siña nos? Ku nos mester mustra empatia. Pa mustra empatia, nos mester pone nos mes den sapatu di otro hende i sinti loke nan ta sinti.
Dikon Ta Importante pa Mustra Empatia?
Ora nos ta mustra empatia na un persona, nos lo ripará ku nos tin hopi kos en komun. Kisas, nos lo haña sa ku un persona ta sinti i aktua meskos ku nos. Empatia ta yuda nos komprondé ku nos tur, sin importá ken nos ta, ta parti di un solo famia. Si nos enfoká riba loke nos tin en komun ku hende, nos lo stòp di husga nan.
Ademas, empatia ta yuda nos mustra rèspèt na otro hende. Wak e ehèmpel di Anne-Marie, di Senegal. E tabatin kustumber di despresiá hende ku ta pertenesé na grupo ku ta ser konsiderá komo inferior. Anne-Marie a splika kon empatia a yud’é: “Ora mi a mira kuantu difikultat e grupo di hende akí tabata pasa aden, mi a puntra mi mes kon ami lo a sinti mi si mi tabata den nan sapatu. Esaki a yuda mi komprondé ku mi no ta mas ku nan, ni mi no a hasi nada ku ta hasi mi mihó ku nan.” En bèrdat, si nos hasi esfuerso pa komprondé kiko un persona ta eksperensiá, esei por yuda nos mustra empatia en bes di kritik’é.
Kiko Bo Por Hasi?
Si bo tin un punto di bista negativo di un grupo di hende, purba di wak den ki manera nan ta meskos ku bo. Por ehèmpel, imaginá kon nan lo por sinti nan den e siguiente situashonnan:
Empatia ta yuda nos mira ku nos tur ta parti di un solo famia
Ora nan ta kome ku nan famia.
Ora nan kaba di traha duru.
Ora nan pasa tempu ku nan amigunan.
Ora nan skucha nan kantika faborito.
Despues, purba di hinka bo mes den nan sapatu. Puntra bo mes:
‘Kon ami lo reakshoná si un hende ta laga mi sinti ku mi no ta bal nada?’
‘Kon ami lo sinti si un persona husga mi sin ku e konosé mi?’
‘Si mi tabata parti di e grupo ei, kon ami lo ke pa hende trata mi?’
Otro Artíkulo Interesante
E TOREN DI VIGILANSIA
Dios Ta Mustra Empatia?
Beibel ta sigurá nos ku Dios ta mira nos, komprondé nos i ta sinti pa nos.
SPIÈRTA!
Mehorá Bo Bida—Bida di Famia i Amistat ku Otro Hende
Pa bo por tin bon amistat ku otro hende, bo mester pensa riba loke abo por hasi pa nan i no riba loke nan por hasi pa bo.
