DURANTE E ÚLTIMO AÑANAN, HENDE A HASI HOPI INVESTIGASHON TOKANTE E DOLÓ KU UN HENDE TA SINTI ORA E PÈRDÈ UN SER KERÍ. Sinembargo, manera nos a kaba di wak den e artíkulonan anterior, e mihó konseho di ekspertonan hopi biaha ta kuadra ku loke tin den Beibel, un buki di sabiduria ku ta hopi bieu. Esaki ta mustra ku Beibel su konsehonan nunka ta bira ouderwets. Pero Beibel ta kontené mas ku djis konseho konfiabel, e ta kontené informashon ku bo no por haña ningun otro kaminda i ku por duna konsuelo na esnan ku ta tristu. Ban wak algun ehèmpel:

• Nos sernan kerí ku a muri no ta sufriendo

  Eklesiástes 9:5 ta bisa ku “e mortonan no sa nada,” i Salmo 146:4 ta bisa ku nan “pensamentunan ta peresé.” P’esei Beibel ta kompará morto ku un soño profundo.—Huan 11:11.

• Dios su amor pa nos ta konsolá nos

  Promé Pedro 3:12 ta bisa: “Pasobra Yehova * su wowo ta riba e hustunan, i su orea ta habrí pa nan súplika.” Ora nos ekspresá nos sintimentunan den orashon, esei ta mas ku djis un bon terapia òf un manera pa ordená nos pensamentunan. Orashon ta yuda nos haña un bon relashon ku nos Kreador, kende por usa su poder pa konsolá nos ora nos ta tristu.

• E speransa pa un mihó futuro

  Imaginá e tempu ora ku esnan ku ta den graf lo ser resusitá aki riba tera. Beibel ta papia hopi biaha di e tempu ei i ta deskribí kon bida lo ta riba tera. Beibel ta bisa ku Dios lo “seka tur lágrima for di [nos] wowo, i lo no tin morto mas; ni tristesa ni sklamashon ni doló lo no tin mas.”—Revelashon 21:3, 4.

Hopi di esnan ku ta kere den Yehova, e Dios di Beibel, ta haña e forsa ku nan tin mester pa trata ku nan tristesa pasobra nan tin e speransa ku nan lo wak nan sernan kerí atrobe. Por ehèmpel, Ann, kende a pèrdè su esposo despues di 65 aña kasá, a bisa: “Beibel a sigurá mi ku nos sernan kerí ku a muri no ta sufriendo i ku Dios lo resusitá tur esnan ku ta den su memoria. Kada biaha ku mi pensa riba mi kasá, mi ta kòrda riba Dios su promesa. Esei ta yuda mi trata ku e kos di mas pió ku a yega di pasa ku mi.”

Tina, kende nos a menshoná kaba, a bisa: “Desde e dia ku Timo a muri, mi a sinti kon Dios a sostené mi. Mi a sinti kon Yehova su man poderoso a yuda mi durante mi angustia. I Beibel su promesa di resurekshon ta hopi real pa mi. Esei ta fortalesé mi i yuda mi sigui padilanti te dia ku mi wak Timo atrobe.”

Miónes di hende ku ta konvensí ku loke Beibel ta bisa ta bèrdat tambe ta sinti meskos. Kisas bo ta pensa ku loke Beibel ta bisa ta parse muchu bunita pa kere òf ta solamente un soño. Pero tòg ta bon pa bo investigá pa bo mes si Beibel su promesa- i konsehonan ta konfiabel. Lo bo haña sa ku Beibel ta e mihó yudansa pa esnan ku a pèrdè un ser kerí.

Wak e vidionan ku tin di haber ku e tópiko akí riba nos website, jw.org

 KIKO TA PASA KU NOS ORA NOS MURI?

BO KE SKUCHA BON NOTISIA?