PA MAYORNAN
7: Norma i Balor
LOKE ESAKI TA NIFIKÁ
Norma i balor ta prinsipionan personal ku un hende ta skohe pa apliká den su bida. Por ehèmpel, abo ta hasi bo bèst pa ta onesto den tur kos? E ora ei, probablemente lo bo hasi bo bèst pa bo yunan tambe ta onesto.
Ademas, lo bo ke siña nan ku ta importante pa traha duru, trata hende na un manera hustu i mustra konsiderashon na nan. Un hende por desaroyá e kualidatnan akí hopi mas mihó si e siña nan for di chikitu.
PRINSIPIO DI BEIBEL: “Instruí un mucha den e kaminda ku e mester kana, i asta ora ku e bira bieu e lo no apartá su mes for di dje.”—Proverbionan 22:6.
DIKON ESEI TA IMPORTANTE?
Den e mundu di teknologia moderno, norma i balor ta hopi importante. Un mama ku yama Karyn a bisa: “Bo yu por topa algu malu riba su aparato elektróniko na kualke momento. Nos yunan por ta sintá banda di nos ta wak algu inapropiá!”
PRINSIPIO DI BEIBEL: “Hende madurá . . . a entrená [nan kapasidat di komprondé] pa distinguí loke ta bon for di loke ta malu.”—Hebreonan 5:14.
Ta importante pa pensa riba otro hende. Esaki ta enserá usa palabranan di kortesia (manera, “por fabor” i “danki”) i mustra interes den otro hende. Awendia, kasi niun hende no ta hasi esei mas pasobra nan ta parse di ta mas interesá den kosnan material, manera aparatonan elektróniko, ku den hende.
PRINSIPIO DI BEIBEL: “Manera boso ke pa hende hasi ku boso, boso mester hasi meskos ku nan.”—Lukas 6:31.
LOKE BO POR HASI
Splika bo yunan kiko ta bo normanan moral. Por ehèmpel, tin estudio ku ta mustra ku tin mas chèns ku tinernan lo apstené di sèks promé ku matrimonio si nan mayornan a siña nan bon kla ku e tipo di kondukta ei ta malu.
UN SUGERENSIA: Usa algu ku a pasa resientemente pa kuminsá un kòmbersashon tokante normanan moral. Por ehèmpel, si tin un notisia tokante un krímen, lo bo por bisa: “Esta horibel ku hende ta odia otro asina hopi! Ta kiko bo ta kere a pone nan odia otro di e forma ei?”
“Ta hopi mas difísil pa yunan skohe entre loke ta bon i loke ta malu si nan no sa kiko ta bon i kiko ta malu.”—Brandon.
Siña nan bon manera. Asta mucha chikitu por siña bisa “por fabor” i “danki” i mustra interes den otro hende. Segun e buki Parenting Without Borders, “Mas konsiente muchanan ta ku nan no ta e sentro di universo, es desir, ku nan ta forma parti di un famia, skol i komunidat, mas dispuesto nan lo ta pa hasi aktonan di bondat na bienestar di otro hende i no pa nan mes so.”
UN SUGERENSIA: Duna bo yunan trabou pa hasi paden i pafó di kas pa nan siña e balor di sirbi hende.
“Si nos yunan ta hasi trabounan di kas awor, nan no ta haña nan ku sorpresa ora nan bai biba riba nan mes. Nan lo a kustumbrá di kumpli ku nan responsabilidatnan kaba.”—Tara.
