Esposo- i esposanan ku ta determiná pa keda ku otro ta mira nan matrimonio komo un union permanente, i esei ta pone nan sinti safe. Kada un di nan tin e konfiansa ku nan lo keda ku otro, asta den tempu difísil.

Algun pareha ta sinti nan obligá di keda ku otro pa motibu di preshon di famia, amigu i kolega di trabou. Pero ta hopi mas mihó pa nan keda ku otro pasobra nan ta stima otro i ta respetá otro.

PRINSIPIO DI BEIBEL: “Un esposo no mester bai laga su esposa.”—1 Korintionan 7:11.

“Si bo ta determiná pa keda ku bo kasá, lo bo no rabia lihé i lo bo ta kla pa pordoná i pidi despensa. Lo bo konsiderá problema komo opstákulo, i no komo un motibu pa divorsiá.”—Micah.

Ora un pareha kasá ku no ta determiná pa keda ku otro haña problema, nan lo ta mas lihé pa konkluí ku nan no ta pas ku otro i lo buska tur manera pa divorsiá.

“Hopi hende ta kasa ku e pensamentu ku si nan matrimonio no bai bon, nan por divorsiá. Ora un pareha ta kasa ku e pensamentu ku divorsio ta un opshon, nan a kuminsá malu pasobra nan no ta determiná pa keda ku otro.”—Jean.

PUNTRA BO MES:

Ora nos ta pleita ku otro . . .

• Mi sa pensa ta ken a manda mi kasa kuné?

• Mi sa pensa kon mi bida lo tabata si mi ta ku un otro hende?

• Mi sa bisa: “Mi ta bai laga bo” òf “Mi ta bai buska un hende ku sí ta balorá mi”?

Si bo kontesta riba un òf mas di e preguntanan akí ta sí, esei ke men ku a bira tempu pa fortalesé bo determinashon pa keda ku bo kasá.

PAPIA KU OTRO TOKANTE LO SIGUIENTE:

• Akaso nos no ta asina determiná mas pa keda ku otro? Si ta asina, dikon?

• Kiko nos por hasi pa fortalesé nos determinashon pa keda ku otro?

ALGUN SUGERENSIA

• De bes en kuando, skirbi un mensahe di amor pa bo kasá.

• Pone potrèt di bo kasá riba bo mesa na trabou pa asina demostrá ku bo ta determiná pa keda ku bo kasá.

• Yama bo kasá tur dia ora bo ta na trabou òf ora boso no ta huntu.

PRINSIPIO DI BEIBEL: “No laga ningun hende separá loke Dios a uni bou di un yugo.”—Mateo 19:6.