• Bo yu ta komportá su mes na un manera hopi arogante, anto pa kolmo ta dies aña so e tin.

• E ke pa tur hende trat’é manera un rei.

Por ta bo ta puntra bo mes: ‘Ta kiko a pas’é? Mi ke pa e ta kontentu ku su mes, pero mi no ke pa e sinti ku e ta mihó ku otro hende.’

Ta posibel pa siña bo yu pa e ta humilde sin pèrdè balor propio?

Den e último dékadanan, mayornan a ser animá pa malkriá nan yunan, elogiá nan tur ora, asta ora nan no hasi nada ku meresé elogio, i pa no korigí nan ni disipliná nan. Nan tabata pensa ku si bo pone bo yunan sinti ku nan ta spesial, nan lo lanta ku balor propio. Pero kiko tabata e konsekuensianan? E buki Generation Me ta bisa: “En bes di lanta yu stabil i felis, e movementu ku ta promové e idea di balor propio a krea un ehérsito di mucha egoista.”

Mucha ku ta haña elogio tur ora bai no por enfrentá desepshon, krítika ni frakaso den bida ora nan bira grandi. Komo ku nan a siña enfoká riba nan mes deseonan, ta masha difísil pa nan forma un amistat duradero ku otro hende ora nan bira grandi. Komo konsekuensia, hopi di nan ta sufri di ansiedat i depreshon.

Loke ku realmente ta yuda un yu haña e sintimentu di balor propio ta ora e mes logra algu, i no pasobra un hende ta bis’é henter ora ku e ta un mucha spesial. Pues, e mester kere den su mes. Pero no ta esei so, e tin ku siña sierto abilidatnan, apliká loke e ta siña i mehorá. (Proverbionan 22:29) Tambe e mester siña mustra interes den e nesesidatnan di otro hende. (1 Korintionan 10:24) Pa e logra tur esei, e mester ta humilde.

Duna bo yu elogio ora e meresé esei. Si bo yu muhé haña un bon punto na skol, elogi’é pa esei. Si e haña un mal punto, no kulpa e maestro di skol sin buska drechi. Asina bo no ta siña bo yu pa e ta humilde. Ta mas mihó pa yud’é mira kon e por mehorá e siguiente biaha. Anto elogi’é ora ku di bèrdat e logra algu bon.

Korigí bo yu ora ta nesesario. Esei no ke men ku bo mester kritiká bo yu kada bes ku e faya. (Kolosensenan 3:21) Pero fayonan grandi sí bo mester korigí. I meskos ta konta ora e tin un aktitut robes; si bo no korigié, ta bira mas difísil pa e kambia.

Por ehèmpel, suponé ku bo yu hòmber tin tendensia di broma. Si bo no korigié, lo e por bira arogante i hende lo kuminsá alehá for di dje. Pues, splika bo yu ku si e broma, hende lo haña un mal impreshon di dje i lo e por pasa bèrgwensa. (Proverbionan 27:2) Splik’é tambe ku si e tin un punto di bista balansá di su mes, lo e no tin nodi di kana konta hende kiko e ta bon aden. Si bo duna bo yu e tipo di korekshon ei ku amor, bo ta siñ’é pa e ta humilde sin ku e ta sintié humiá.—Prinsipio di Beibel: Mateo 23:12.

Prepará bo yu pa enfrentá realidat. Si bo duna bo yu tur loke e ke, e por kuminsá pensa ku e mester haña tur kos. Pues, si bo yu, por ehèmpel, ke algu ku bo no por kumpra, splik’é dikon ta importante pa bo no gasta mas ku loke bo tin. Si bo tin ku kanselá un fakansi òf un salimentu, splika bo yu ku na un dado momento nos tur lo keda desepshoná den e bida akí, anto kisas lo bo por bis’é kiko ta yuda abo ora bo ta desepshoná. En bes di protehá bo yu di tur problema, prepar’é pa e enfrentá desafio ora ku e bira grandi.—Prinsipio di Beibel: Proverbionan 22:6.

Anim’é pa duna. Laga bo yu mira ku “tin mas felisidat den duna ku den risibí.” (Echonan 20:35) Kon bo por hasi esei? Traha un lista huntu ku bo yu di hende ku no por hasi kompras, ku no tin transpòrt òf ku mester di yudansa pa drecha algu na kas. I ora bo ta bai yuda algun di nan, bai ku bo yu serka nan. Laga bo yu mira kon kontentu abo ta sinti ora bo ta yuda hende. E mihó manera pa siña bo yu pa e ta humilde ta mediante bo ehèmpel.—Prinsipio di Beibel: Lukas 6:38.