Ta hopi importante pa parehanan felismente kasá ekspresá nan apresio pa otro. Sinembargo, hopi esposo ku esposa ta stòp di wak e bon kualidatnan di nan kasá, i komo resultado nan no ta ekspresá niun tipo di apresio pa otro mas. Den e buki Emotional Infidelity, un konsehero a splika ku hopi pareha ku ta buska yudansa serka dje “ta mas preokupá pa loke no ta pasando [den nan matrimonio] ku loke sí ta pasando. Nan ta bini serka mi pa bisa mi loke mester kambia, no loke mester keda meskos. E fout ku tur e parehanan akí ta hasi ta ku nan no ta mustra apresio, i asina demostrá nan amor pa otro.”

Kon parehanan kasá por evitá di kai den e trampa ei?

Ekspreshonnan di apresio por aliviá tenshon den matrimonio. Normalmente, ora un esposo i un esposa ta hasi esfuerso pa mira e bunita kualidatnan di nan kasá i ta elogiá nan pa esei, nan relashon ta mehorá. Asta ora un matrimonio ta bou di hopi tenshon, e apresio ku kada un tin pa e otro por aliviá esei.

Pa esposa. E buki ku nos a kaba di menshoná, Emotional Infidelity, ta bisa: “Hopi hende muhé no ta ripará ku un hende hòmber ta sinti un preshon enorme pa perkurá pa nan famia.” Esei por ta e kaso asta den famianan kaminda tantu e esposo komo e esposa ta traha.

Pa esposo. Hopi bes hende hòmber no ta balorá e esfuerso ku nan esposa ta hasi pa e famia: sea ta dor di traha pa gana plaka, lanta e yunan òf komo ama di kas. Fiona, * kende tin rònt di tres aña kasá, a bisa: “Nos tur ta hasi fout, i ora ami hasi fout, mi ta sinti mi masha malu. P’esei, ora mi esposo elogiá mi pa por ehèmpel un trabou di kas ku mi a hasi bon, mi ta realisá ku ainda e ta stima mi apesar di mi imperfekshonnan i ku e ta apoyá mi. Esta kontentu mi ta sinti!”

Di otro banda, ora un hende sinti ku su kasá no ta balor’é, esei por daña e integridat ku mester tin den e matrimonio. Un esposa ku yama Valerie a komentá: “Ora bo kasá no ta  mustra apresio pa bo, ta fásil pa bo sinti bo atraí na un persona ku sí ta mustra apresio pa bo.”

Opservá bon. Wak durante un siman kua ta e kualidatnan bon ku bo ta mira den bo kasá. Ademas, opservá esfuerso ku bo kasá ta hasi pa tur kos kana bon den kas: kosnan ku kisas nunka bo a ripará. Anto, na fin di e siman, traha un lista di (1) e kualidatnan ku bo ta apresiá di bo kasá i (2) e kosnan ku el a hasi pa e famia.—Prinsipio di Beibel: Filipensenan 4:8.

Dikon ta nesesario pa opservá? Un esposa ku yama Erika a bisa: “Despues di un par di aña kasá, kisas bo no ta mira e balor di bo kasá mas. Bo ta stòp di opservá e bon kosnan ku e ta hasi i kuminsá konsentrá mas riba e kosnan ku e no ta hasi.”

Puntra bo mes: Mi ta lubidá di mustra apresio pa e trabou duru di mi kasá? Por ehèmpel, si bo esposo ta drecha algun kos na kas, bo ta sinti ku bo no tin nodi di bis’é danki pasobra tòg esei ta su deber? Si bo ta un esposo, bo ta sinti ku bo no tin nodi di elogiá bo esposa ora e ta eduká e yunan pasobra tòg ta su trabou esei ta? Ta bon pa pone meta pa opservá tur e esfuerso ku bo kasá ta hasi pa boso famia i gradisié pa eseinan; sea ku nan ta poko òf hopi.—Prinsipio di Beibel: Romanonan 12:10.

Duna hopi elogio. Beibel no ta djis bisa ku nos mester ta gradisidu. E ta bisa pa boso “mustra ku boso ta gradisidu.” (Kolosensenan 3:15) Pues, purba di hasi esei un kustumber. Gradisí bo kasá! Un esposo ku yama James a bisa: “Ora mi kasá ekspresá apresio pa e kosnan ku mi ta hasi, esei ta duna mi gana di traha mas duru pa bira un mihó esposo i hasi mas esfuerso pa mehorá nos matrimonio.”—Prinsipio di Beibel: Kolosensenan 4:6.

Esposo- i esposanan ku ta ekspresá apresio pa otro ta mehorá nan relashon ku otro. Un esposo ku yama Michael a bisa: “Ami ta kere ku hopi matrimonio por keda intakto si e pareha ta sigui konsentrá riba loke nan gusta di otro. Ora tin problema, nan lo ta ménos inkliná na kibra e matrimonio pasobra semper nan ta kòrda ku nan kasá ta balioso.”