Hóbennan Sa Puntra . . .

Kon Mi Por Bis’é Loke Mi Ta Sinti P’e?

“Mi tin gana di haña un kontesta riba e pregunta: Ken ta esun ku mester deklará amor na e otro—e mucha hòmber òf e mucha muhé?”—Laura. *

E TA un mucha hòmber ku bo a topa resientemente òf kisas bo konos’é pa algun tempu kaba—i bo ke pa e ta mas ku djis un amigu. Bo ta konvensí ku e tambe ta sinti meskos pero ku e ta muchu verlegen òf tímido pa bisa esei. Pues bo ta puntra bo mes si lo ta un bon idea pa abo dal e promé paso i bis’é kiko bo ta sinti p’e. *

Na promé lugá, laga nos kuminsá na wak kon e hendenan rònt di bo—bo famia i bo komunidat—ta pensa di e asuntu aki. Por ehèmpel, segun kustumbernan lokal, ta bo mayornan tin ku buska un kasá pa bo? * Podisé bo ta haña ku freimentu i kasamentu ta algu personal. Pero tòg kristiannan ta purba evitá di ofendé otro hende innesesariamente. Tambe nan ke tene kuenta ku e sintimentu di nan famia i nan sernan kerí.

Sin embargo, awe den hopi pais ta masha normal pa parehanan mes skohe ken nan ta frei promé ku nan disidí si nan ta kasa òf laga. Awor, ta inkorekto pa e mucha muhé tuma e inisiativa pa bisa e mucha hòmber ku e ta gust’é? Aki tambe mester tene kuenta kon e famia i e komunidat ta mira e asuntu. E paso ei ta bai shòk òf ofendé hopi hende?

Ki informashon Beibel ta duna riba e pregunta di si ta korekto pa un hende muhé tuma e inisiativa? Den tempu bíbliko un muhé temeroso di Dios ku yama Rut a aserká un hòmber ku yama Boaz i propon’é pa kasa. I Yehova Dios a bendishoná su esfuersonan! (Ruth 3:1-13) Klaru ku Rut no tabata mucha mas; e tabata un biuda, opviamente ku sufisiente edat pa kasa. Tampoko e no a bai flirt ku Boaz. Mas bien, el a sigui e lei di Dios tokante matrimonio kuidadosamente.—Deuteronomio 25:5-10.

Tal bes bo tin sufisiente edat pa pensa riba kasamentu, i tin un sierto yònkuman ku bo ta interesá den dje. Tòg e asuntu di habri bo kurason pa un mucha hòmber ku kisas no ta sinti meskos pa bo ta un asuntu delikado i riská. Ta komo si fuera bo ta saka bo kurason i pon’é den man di otro hende. Lo e trat’é ku ternura òf lag’é kai abou? E mihó manera pa evitá di keda innesesariamente na bèrgwensa òf ku un kurason kibrá ta di sigui prinsipionan di Beibel.

Sea Prudente

Ta fásil pa sinta soña ku bo ta namorá di un mucha hòmber. Bo por asta imaginá e dia di  bo kasamentu i e tempu despues. Sin embargo, pa agradabel ku e tipo di soñonan aki por ta, nan ta puru ilushon. Nan por produsí deseonan fuerte ku bo no por satisfasé. Manera Beibel ta bisa, “speransa posponé ta hasi e kurason sinti malu.” (Proverbionan 13:12) Ademas, fantasia por stroba bo di pensa sano. Sin embargo, Proverbionan 14:15 ta bisa: “E hòmber prudente ta wak bon unda e ta bai.” Ser prudente ta nifiká usa sano huisio. Kon bo por ta prudente ora bo ta sinti ku bo gusta un mucha hòmber?

Na promé lugá, purba aktua “ku konosementu.” (Proverbionan 13:16) Pa usa e palabranan di un mucha muhé, “tanten bo no konosé un persona, bo no por ègt stim’é.” Promé ku bo entregá bo kurason na un mucha hòmber, paga tinu kon e ta aktua i kon e ta papia. Opservá kon e ta trata otro hende. Un yònkuman a sugerí: “Puntra su amigunan tokante dje, foral hende grandi ku konos’é bon.” E rumannan den su kongregashon kristian ta “duna bon testimonio di dje”? (Echonan 16:2) Manera un mucha muhé ku yama Isabel a sugerí tambe, “algu ku por yuda hopi ta pa sali den grupo i konosé su famia.” Ora bo sali den grupo bo por opservá kosnan sin ku bo ta bou di hopi preshon.

Pa bo konosé un persona den e manera aki ta tuma tempu, i bo mester tin pasenshi. Pero lo bo haña chèns di mira aktitut-, karakterístika- i kualidatnan ku lo sea konfirmá òf kambia bo sintimentunan. Proverbionan 20:11 ta bisa: “Te asta un mucha [òf yònkuman] ta konosí pa su echonan, si su kondukta ta puru i rekto.” Sí, tardi òf trempan su akshonnan lo revelá ken e ta realmente.

P’esei, ta sabí pa resistí e tentashon di dal bai mesora i revelá bo sintimentunan muchu lihé. Si bo ta purá i e mucha hòmber reakshoná positivamente, bo por bin ripará despues ku e no ta adekuá pa kasa kuné. * Si bo drenta ku e mucha hòmber, i despues kibra kuné, esei lo por kibra su kurason—tal bes profundamente.

E Impreshon Ku Bo Ta Kousa

Ta eksistí e posibilidat ku e yònkuman aki tambe por ta opservando abo! Bo ta presentando bo mes den un manera ku ta laga bo kualidatnan kristian resaltá? Isabel a bisa: “Mi a ripará ku hopi mucha muhé no ta bisti na un manera adekuá. Si bo ke pa bista di un persona spiritual kai riba bo, bo tin ku bisti ku modestia.” Sin importá kiko ta ‘in’ aworakí, si bo ta bisti na un manera “apropiá, desente i moderá,” bo ta bira mas atraktivo pa un mucha hòmber ku tin kualidatnan ku ta agradá Dios.—1 Timoteo 2:9.

Tambe Beibel ta animá hóbennan kristian pa ta ‘un ehèmpel den nan forma di papia.’ (1 Timoteo 4:12) E manera ku bo ta papia ta revelá hopi di bo. Kiko bo mester hasi ora bo haña chèns di kòmbersá ku e yònkuman? Si e ta tímido, podisé e ta nervioso i ta sinti su mes inkómodo. Un mucha muhé ku yama Abbie a bisa: “Ta abo lo tin ku kuminsá e kòmbersashon pa mira kon e ta reakshoná.”

Kon pa kuminsá? Si bo papia nònstòp tokante bo mes, probablemente e por konkluí ku ta den bo mes so bo ta interesá i ku bo no tin konosementu di tópikonan profundo. Beibel ta rekomendá pa “no buska [bo] interes personal so, ma buska tambe interes di otronan.” (Filipensenan 2:4) Algu ku por yud’é habri un tiki ta ora bo ta hasi un par di pregunta apropiá tokante di e mes òf su interesnan.

Kòrda, no ta e momentu apropiá pa rekurí na un “lenga engañoso” ni “lepnan mentiroso” ku ta usa labiamentu. (Salmo 120:2) Un mucha hòmber ku ta diserní bon lo mira mesora ku e papiá ei no ta sinsero. Na mes momentu, evitá di bisa kosnan djis pasobra bo ta pensa ku e kier tende nan, foral ora bo ta kòmbersá tokante kosnan mas serio i bo kuminsá papia di nan komo bo metanan spiritual. Semper ser bo mes dor di ta sinsero, papia e bèrdat i men loke bo ta papia. Ta e ora ei so bo por sa si boso bida ta bayendo den e mesun direkshon.

 Kiko Si Bo No Haña Reakshon?

Awor, kiko si apesar di tur bo esfuersonan diskreto, e mucha hòmber no demostrá ni un chispa di interes romántiko? Kisas ta pasa vários siman òf luna i ainda e no ta mustra ningun interes den bo. Ta djis pasobra e ta tímido? Puntra bo mes: ‘Si en bèrdat e ta dje tímido ei, e ta kla pa kasa? Si mi kasa kuné, lo e por dirigí kosnan komo kabes di kas, òf lo e ferwagt ku ta ami tin ku hasi esei?’ (1 Korintionan 11:3) Un otro pregunta pa pensa ariba ta: ‘E ta realmente tímido òf simplemente e no ke tin un relashon amoroso ku mi?’ E último ei lo por ta un konklushon doloroso. Pero mihó bo aseptá e realidat ei en bes di pasa e bèrgwensa di revelá bo sintimentunan romántiko na un persona ku simplemente no ta sinti nada pa bo.

Kisas bo ta pensa ku bo a mira algun indikashon ku e mucha hòmber gusta bo. Bo ta sinti ku simplemente e ta muchu slow pa mustra esei i ku un tiki animashon lo e respondé. Tal bes. Pero si bo disidí di tuma e inisiativa, bo tin ku kòrda sí ku esaki tin su rísikonan kuné. Bo tin ku pensa hopi riba no solamente kiko bo ta bai bisa sino tambe ki ora ta e mihó momentu pa bisa sierto kos.

Por ehèmpel, bo por disidí pa lag’é sa na fini manera ku lo bo ta kontentu ku su atenshon en bes di bula bis’é ku bo ta stim’é. Den un ambiente relahá i apropiá, bo por djis bisa ku bo tin gana di konos’é mihó. No preokupá si bo manera di ekspresá ta mustra un poko torpe. E sintimentunan sinsero tras di bo palabranan por bisa muchu mas ku e palabranan mes. Kòrda tambe ku bo ta djis ekspresando un deseo pa kuminsá un namorashon; bo no ta bezig ta propon’é matrimonio. Asina mes, esaki por kohe e mucha hòmber for di base; pues dun’é tempu pa e pensa riba loke bo a bis’é.

Si di bèrdat bo konosé e yònkuman aki i bo mes a mira ku e ta amabel i ku e tin bon karakter, bo no tin nodi tene miedu ku e ta bai reakshoná na un manera antipátiko òf humiante. Pero kon bo tin ku reakshoná si su kontesta ta un nò na un manera nèchi pero firme? I kon un yònkuman mester komportá su mes den un situashon asina? Un siguiente artíkulo lo kontestá e preguntanan aki.

[Nota]

[Plachi na página 22]

Opservá kon e ta komportá su mes; kisas esei por kambia bo sintimentunan pa kuné

[Plachi na página 22]

Si bo tin interes romántiko den un mucha hòmber, papia ku hende grandi responsabel ku konos’é