E Benefisionan di Lesa pa Mucha

DI UN ESKRITOR DI SPIÈRTA! NA POLONIA

E organisadónan di e kampaña anual “Henter Polonia Ta Lesa pa Mucha” ta bisa: “Lesamentu ta e yabi tantu pa konosementu komo pa abilidat intelektual. . . . E ta habri e porta pa yega n’e tesoro di pensamentu i konosementu humano.” Si esaki ta bèrdat, pakiko hopi adulto i mucha ta konsiderá lesamentu djis un obligashon desagradabel?

E personanan ku a lansa e kampaña aki ta deklará: “Ta den infansia mester kultivá e kustumber di lesa i un amor pa buki.” Nan ta bisa mayornan: “Si bo ke pa bo yunan ta sabí i bai bon na skol i den bida, lesa pa nan na bos haltu tur dia pa 20 minüt.”

Tambe nan ta animá mayornan pa no posponé lesamentu pa nan yunan sino pa “kuminsá mas pronto posibel.” Na ki tempu? Nan ta urgi mayornan: “Laga nos lesa pa nos beibi, ten’é den nos brasa, wak e ku ternura, i lanta su interes pa medio di nos bos. Den e manera aki nos ta forma un konekshon duradero entre lesamentu i un sintimentu di siguridat, plaser i intimidat. Ademas, esei ta stimulá su desaroyo mental.”

E organisadónan di e kampaña ta enfatisá ku “aworakí lesamentu pa mucha ta mas importante ku nunka promé,” i nan ta mustra riba mas benefisio. Lesamentu na bos haltu ta siña mucha pensa, “ta yuda nan komprondé otro hende, mundu i nan mes, . . . ta lanta interes, ta desaroyá imaginashon, ta stimulá desaroyo emoshonal, ta kultivá komprenshon i sintimentu pa otro hende, ta siña nan balornan moral, . . . ta edifiká balor propio.” Sin duda, manera e lidernan di e kampaña aki ta terminá bisando, e ta “e antídoto kontra influensianan indeseabel . . . ku ta menasá mente i kurason di mucha.”

Pa lesamentu duna mihó resultado ainda, ta bon pa usa publikashonnan ku ta enkurashá mucha pa hala serka nan Kreadó selestial. E mihó buki ku por yuda nos hala serka Dios ta Beibel. E ta bisa ku “for di infansia [e hóben Timoteo] a konosé e skrituranan santu.” (2 Timoteo 3:15) Den un programa di lesamentu na bos haltu pa yu, mayornan por inkluí bukinan basá riba Beibel manera Mi buki di relato bíblico i Siña for di e Gran Maestro, skirbí spesialmente pa mucha i publiká dor di Testigunan di Yehova.