Revistanan Lombrante—“Ata Mi Aki, Kumpra Mi!”

ATA nan ei, kolorido i briante, i tur ta purba haña bo atenshon. Bo no tabatin intenshon di para wak nan mes, pero awor nan ekshibishon kolorido na un stènt ta atraé bo. Ta komo si fuera e revistanan lombrante na un stènt di revista i korant ta bisando bo, “Ata mi aki, kumpra mi!” I ounke por lo general bo no por husga un buki a base di su portada, mester atmití sí ku potrèt riba revistanan ku ta lombra tin un impakto spesial riba posibel kumpradónan. Den hopi pais tin tur tipo di e revistanan aki riba merkado, i e kompetensia ta fuerte.

Por dividí revista den dos kategoria prinsipal: revistanan spesialisá, esta revistanan pa un ramo spesífiko di teknologia òf komersio—i revistanan pa e públiko general. E di dos kategoria aki ta kubri kasi tur tópiko, pero hopi bes e editornan ta dirigí nan mes riba sierto grupo. Un revista no ta meskos ku un korant. Tantu e estilo komo e kontenido ta diferente. Ademas, un revista ta mas kompakto i imprimí riba mihó kalidat di papel, loke por lo general ta dun’é un akabado lombrante ku ta hasié asina atraktivo pa e kumpradó. Pa loke ta kontenido, distinto di korantnan, revistanan ta dediká ménos atenshon na susesonan i notisia ku ta kambia di un ora pa otro. Hopi bes nan tin diferente eskritor ku ta kontribuí ku artíkulonan ku ta kubri un variedat amplio di informashon i opinion. Ademas, kada un tin nan estilo di skirbi; algun ta djis duna informashon di echonan, otronan ta mas personal òf emoshonal.

Ora bo ta para wak revista na un stènt, sin duda tin vários kos ku lo tin nan influensia riba loke bo ta skohe òf asta yuda bo disidí si bo ta kumpra òf laga. Bo sekso sigur lo ta un faktor klave, i tambe bo interesnan personal i tal bes, mas ku tur kos, e preis dje revista. Sí, un revista ku ta lombra por ta bastante kostoso, tal bes tres òf kuater biaha mas karu ku un korant. Sin embargo, pronto e korant djawe ta traha lugá pa esun di mañan, miéntras ku un revista sí no ta bira bieu asina lihé. Bo por lesa esun ku bo ta skohe na un manera trankil,  i bo por ward’é pa hopi siman òf luna i kisas dun’é na un otro hende. Bibliotekanan sa ta interesá den ehemplarnan mas bieu di revista, i algun revista ta bira artíkulonan di kolekshon.

Nan Ta Bal Nan Preis?

Klaru ku ta abo mester sa si un revista ta bal su preis. E motibu prinsipal pakiko nan tin un preis relativamente mas haltu ta, ku ta kosta basta pa produsí nan. Un editor tin ku investigá un merkado ekstensamente promé ku e lansa un revista nobo riba un merkado ku ya tin hopi kompetensia. Awendia, algun di e kasnan editorial grandi ta publiká i imprimí mas ku 30 diferente revista i nan ta usa nan propio imprenta. Asina mes, e gastunan ta enorme, ya ku kada publikashon ta rekerí su propio personal.

Si bo wak parti paden di e kaft di un revista pa públiko general, lo bo keda sorprendí pa mira kuantu redaktor i gerente ta nesesario. Kada un ta perkurá pa un sekshon diferente di e kontenido, i kada un tin su mes personal. Por lo general, e revistanan di mayor sirkulashon tin nan mes eskritor- i fotógrafonan, ounke hopi eskritor i fotógrafo ta traha riba nan mes òf ta traha pa diferente kompania mediante un agensia, loke ta nifiká ku mester kontratá nan riba un base regular òf part-time.

Tur artíkulo ku eskritornan manda ta ser kontrolá kuidadosamente. Mayoria ta ser revisá kasi kompletamente òf kambiá parsialmente dor di e redaktornan. Ya ku potrètnan ta forma un parti importante di revistanan lombrante, mester di diseñadónan gráfiko tambe. E kompiladónan ta kuminsá traha e layout general. Ta nan ta disidí kiko ta aparesé riba kada página. Mester presentá e teksto i e plachinan den un manera ku ta atraé e lektor; kada página mester ta yamativo. Mayoria kas editorial ta usa un buki di estilo, esta, un manual ku ta deskribí ki término i estilo mester usa den nan publikashonnan. Esun ku tin e responsabilidat final ta e hefe di redakshon. Lo e tin ku tuma desishonnan rápido pa no tarda e publikashon. Promé ku imprimí e revista, ta prepará un muestra p’e direktornan eksaminá.

E kosto di un revista ta pa kubri gastu di imprenta i distribushon, i tambe salario di personal. Por lo general e rebendedónan ta haña un porsentahe di e preis pa kada ehemplar ku nan bende. Loke no bende di e kantidat ku nan risibí, nan ta entregá bèk n’e kas editorial. Ta bèrdat ku e preis riba merkado no ta kubri e kosto di produkshon. De echo, si no ta pasobra gran parti di e revista promedio pa públiko ta dediká na propaganda, lo e no por wanta riba merkado. E edishon resien di un revista yamativo internashonal di 200 página tabatin mas ku 80 página kompletu na propaganda. E kompanianan ku ta hasi propaganda sa ku un aviso komersial riba papel lombrante di kalidat na kuater koló ta un bon promoshon pa nan produkto.

Segun kálkulonan na Oustralia, kada individuo ta dediká un promedio di 1,2 minüt pa dia na lesa un revista. Na komparashon ku esei, kada hende ta dediká un promedio di 1,1 minüt pa dia na bai sine òf 0,7 minüt pa dia na skucha muzik. Sin duda, esaki ta un motibu pakiko revista ta un medio lukrativo pa hasi propaganda.

Kiko Ta Atraé Bo na Nan?

Ounke nos no por analisá delaster un revista ku ser publiká, nos por tira un bistaso breve riba revistanan pa hende muhé. Últimamente a kuminsá investigá e kontenido di revistanan lombrante pa hende muhé, pasobra ounke algun hende ta konsiderá nan inofensivo,  otronan ta haña ku nan ta probechá di hende muhé. Un kos ta sigur: nan ta fasinante i atraktivo, i esaki ta kontribuí na nan benta. Sin embargo, den e último añanan revista pa hende muhé a kambia bastante. Algun di nan ku tabata trata solamente ku asuntunan di kas, awor ta presentá mas artíkulo tokante selebridatnan. Artíkulonan tokante salú tambe a bira popular. Un tempu hende muhé tabata gusta kuenta kòrtiku, i hopi biaha ta e serinan ku tabata kontinuá den e siguiente edishon tabata subi e benta. Pero awor ta un par di revista lombrante so tin kuenta kòrtiku i serinan.

Kiko ta pone revistanan lombrante bende awe? Aparentemente ta loke tin riba portada ta pone e revista bisa: “Ata mi aki, kumpra mi!” Si tin un hende muhé riba e portada, e mester ta famoso òf bunita. Ademas, e modelo riba e kaft mester ta yòn i delegá, i ahustenan digital ta pon’é lusi mas riba e potrèt. Kiko di e palabranan riba e portada? Klaru ku esaki mester varia segun e gruponan di edat i estilonan di bida riba kua e revista ta enfoká. Algun portada di revista ta resaltá moda. Otronan ta ofresé premionan pa gana. Hopi bes e portada ta duna bo un indikashon kiko tin den e revista.

Revistanan Lombrante Por Influensiá Nos?

Publikadónan di revista ta bisa ku nan sa kiko hende muhé kier. I ta bèrdat ku nan ta hasi hopi estudio di merkado pa por haña sa kiko hende muhé por lo general kier. Pero ta bon pa puntra: Nan ta satisfasiendo un nesesidat ku di bèrdat ta eksistí, òf ta nan mes a krea un nesesidat pa nan satisfasé? Laga nos konsiderá den ki manera hopi revista lombrante pa hende muhé ta influensiá hende su manera di pensa. Promé, tuma por ehèmpel e manera kontinuo ku nan ta eksponé estilo di bida i opinion di selebridatnan. Kisas esaki ta loke e públiko kier lesa, pero por tin peligernan skondí? Den su buki About Face (Tokante Kara), Jonathan Cole, un neurofisiólogo klíniko n’e Universidat di Southampton, Inglatera, ta spièrta ku ora bo konosé un kara sin nunka a topa e persona mes òf a tende su stèm, esei por krea un afekto artifisial. Tambe tin e gran kantidat di informashon skirbí tokante selebridatnan. Esei ta yuda nos komprondé e fenómeno moderno di e tristesa profundo ku públiko ta manifestá ora un hende ku nan no konosé muri, pero kende su potrètnan nan a mira ku frekuensia den revistanan lombrante. Klaru ku informenan di televishon i korant tambe por kontribuí na e afekto artifisial aki.

Un otro asuntu ku ta hañando atenshon aktualmente ta e potensial ku revistanan tin pa influensiá aktitut di hende muhé pa loke ta un figura ideal. Ounke normanan ta varia di pais pa pais, e mensahe general ku ta bini atraves di e revistanan djawe pa hende muhé den paisnan desaroyá ta ku loke ta ‘in’ ta un figura  delegá. Algun maestro, mayor i asta modelo mes ta sensurá esaki, i ta bisa ku e imágennan konstante mustrá den revistanan pa hende muhé ta parsialmente responsabel p’e oumento den iregularidatnan ku komementu i e konstante kaprichonan di dieta ku hende muhé, foral esnan mas yòn, tin.

Pa averiguá si e afirmashonnan ei ta válido, un edishon oustraliano di un revista internashonal a realisá un enkuesta bou di su lektornan i a invitá un pènel di eksperto pa komentá riba e resultadonan. Mas ku 2.000 hende muhé a tuma parti; 82 porshento di nan tabatin entre 16 pa 29 aña di edat. Nan a konsultá un tabèl di peso rekomendá, esta, peso di akuerdo ku haltura, edat, etcetera. Rònt di 60 porshento di e hende muhénan a haña ku nan tin peso di mas, ounke solamente 22,6 porshento tabata pisa mas ku e peso rekomendá. Miéntras ku 59 porshento di e personanan ku tabata pisa ménos di e peso rekomendá a pensa ku nan tabatin un peso normal, 58 porshento ku a ser deskribí komo normal a pensa ku nan tabata pisa demasiado. Ta 12 porshento so tabata satisfecho ku nan peso. Algun hende a kritiká e tabèl ku e Departamentu di Salú di e Mankomunidat Oustraliano a suministrá, afirmando ku e ‘range’ di peso duná riba e tabèl pa kada haltura tabata muchu grandi. Ademas, 67 porshento a atmití ku konstantemente nan tabata envidiá kurpa di otro hende muhé, i 1 di kada 8 persona a atmití ku sea e tin òf tabatin un iregularidat opseshoná ku komementu.

Fiona Pelly, e eksperto di nutrishon den e pènel, a bisa: “Ta opvio ku peso ta birando un prioridat prinsipal den bida di hende muhé.” I Dr. Janice Russell, direktora di un klínika di iregularidat ku komementu na Sydney, a komentá: “Loke ta mas dañino ta ku sintimentu manera kulpa i envidia ta faktornan importante [den e enkuesta]. No ta saludabel pa keda kana henter ora ku e tipo di sintimentunan ei.”

Sin embargo, e loke mas a resaltá ta ku ounke algun di e personanan entrevistá a atmití ku nan a imitá aktornan di pelíkula, 72 porshento a bisa ku e modelonan ku ta aparesé den revista a influensiá nan mas. Un señora yòn, ku a haña yudansa di un klínika di dieta, a bisa ku e tabata sinti su mes orguyoso ku e tabata pisa 55 kilo, pero el a atmití: “Ainda mi ta sinti e preshon di medionan di komunikashon, revista- i selebridatnan.” Otro enkuestanan realisá otro kaminda a produsí e mesun resultadonan.

Dos Revista di un Otro Kategoria

Un di e revistanan mas saludabel i informativo disponibel ta esun ku bo tin den bo man, Spièrta! No ta na un stènt di revista i korant bo a kumpr’é. Kisas ta un persona riba kaya a ofresé bo e, òf tal bes un persona a tres’é pa bo na kas. Trahadónan boluntario ta publiká, imprimí i repartí e revista aki rònt mundu sin kobra p’e. Eskritornan di Spièrta! ta manda artíkulonan for di tur parti di mundu, i nan tambe ta trahadónan boluntario, meskos ku tur e pintornan i traduktornan. E revista Spièrta! a aparesé pa promé biaha na 1946. Promé kuné tabatin Konsuelo i e Époka di Oro, ku a kuminsá ser publiká na 1919. Semper a publiká e revistanan sin ningun tipo di propaganda pagá. Aktualmente ta imprimí Spièrta! den 87 idioma. Hopi di nan ta sali dos bes pa luna, i e tin un sirkulashon mundial di mas ku 22 mion ehemplar.

E Toren di Vigilansia, e revista kompañero di Spièrta!, tin un rèkòrt mas impreshonante ainda. Aktualmente e ta ser imprimí den 148 idioma. Di kada edishon di E Toren di Vigilansia ta imprimí mas ku 25 mion ehemplar i e ta den sirkulashon for di aña 1879. Entre nan dos, e revistanan aki a duna un tremendo aporte na informá públiko enkuanto asuntunan importante di bida, i nan ta di interes pa tantu hende hòmber, muhé komo hóben rònt mundu.

Nos tur tin ku meditá riba e echo ku nos no a nase ku konosementu. Nos ta haña sabiduria i konosementu segun ku nos ta krese i desaroyá, i hopi bes nos ta forma nos opinionnan i desaroyá un estilo di bida a base di loke nos ta lesa. Pa e motibu ei ta masha importante pa selektá material ku ta edifikante i bale la pena pa lesa.

[Plachi na página 17]

Revistanan por influensiá aktitut tokante figura di hende

[Plachi na página 18]

Ounke nan no ta revista lombrante, E Toren di Vigilansia tin un sirkulashon di mas ku 25 mion ehemplar den 148 idioma i e Spièrta! tin un sirkulashon di mas ku 22 mion ehemplar den 87 idioma