Dios Tin Nòmber!

Kiko ta Dios su nòmber? Tur hende tin un nòmber personal. Hopi hende asta ta duna nan bestia di kas nòmber! Lo no ta rasonabel anto ku Dios tambe tin nòmber? Un kos ta sigur, un parti masha importante di hende su relashon i trato ku otro ta e echo ku kada hende tin un nòmber personal i ku e ta wòrdu usá. Akaso esei lo mester ta diferente pa loke ta nos relashon ku Dios? Kontrario na loke kisas bo ta ferwagt, miónes di hende ku ta pretendé ku nan tin fe den e Dios di Beibel no ta usa su nòmber personal. I tòg, Dios su nòmber ta konosí pa siglonan. Segun ku bo ta lesa e seri di artíkulo aki, lo bo haña sa di tempunan di ántes ora ku hende tabata usa Dios su nòmber ampliamente. Mas importante, lo bo haña sa kiko Beibel ta bisa tokante siña konosé Dios na su nòmber.

YA PA siglo 17, vários pais europeo tabata traha moneda ku e nòmber di Dios ariba. Un moneda aleman trahá na aña 1634 tabatin e nòmber Yehova prominentemente riba dje. E monedanan ei a bira popularmente konosí komo Jehovah talers, es desir, monedanan di Yehova, i tabata den sirkulashon pa hopi dékada.

Yehova, * ta un tradukshon di e nòmber di Dios ku hende a rekonosé pa siglonan. Na hebreo, un idioma ku hende ta lesa di banda drechi bai banda robes, e nòmber ta aparesé komo kuater konsonante, יהוה. E kuater lèternan hebreo aki—di spèl den nos álfabèt komo YHWH—ta konosí komo e Tetragramaton. Pa hopi dékada, nan a graba e nòmber di Dios den e forma aki tambe di Tetragramaton riba monedanan europeo.

Tambe nos por haña e nòmber di Dios riba edifisio-, monumento- i obranan di arte i den hopi kantika di misa. Segun e ensiklopedia aleman Brockhaus, un tempu prensnan protestant tabatin e kustumber di bisti un emblema ku a konsistí di un diseño di solo ku e Tetragramaton. E símbolo aki, ku nan a usa tambe riba bandera i moneda, tabata konosí komo e emblema di Yehova-Solo. Pues ta bisto anto ku e europeonan sumamente religioso di siglo 17 i 18 tabata sa ku Dios Todopoderoso tabatin un nòmber. Loke ta mas importante ainda ta ku nan no tabatin miedu di us’é.

E nòmber di Dios no tabata un misterio tampoko na Merka den su era kolonial. Tuma por ehèmpel, Ethan Allen, un sòldá di e Revolushon Merikano. Segun su outobiografia, na aña 1775 el a eksigí di su enemigunan pa entregá nan mes “den nòmber di e Gran Yehova.” Despues, durante presidensia di Abraham Lincoln, vários konsehero a menshoná Yehova su nòmber ku frekuensia den nan kartanan dirigí na Lincoln. Den hopi biblioteka tambe bo ta haña otro dokumentonan históriko di Merka ku ta kontené e nòmber di Dios i ku públiko por wak libremente. Esakinan ta djis un par di ehèmpel ku ta mustra kon pa siglonan hende a duna prominensia na e nòmber di Dios.

Kiko djawe? Hende a lubidá e nòmber di Dios? Apsolutamente ku nò. Tin vários tradukshon di Beibel ku ta usa e nòmber personal  di Dios den hopi versíkulo. * Un bishita kòrtiku na un biblioteka òf un par di minüt di investigashon den bo propio dikshonarionan, probablemente lo revelá ku e nòmber Yehova ta ser aseptá ampliamente komo e ekivalente lokal di e Tetragramaton. Por ehèmpel, e Dikshonario Hulandes – Papiamentu di Sydney Joubert ta bisa bou di e entrada Jehova: “E nòmber hebreo di e Dios di Israel.” Un edishon resien di The New Encyclopædia Britannica ta splika ku Yehova ta e “nòmber hudiu-kristian pa Dios.”

Pero kisas bo ta puntra bo mes: ‘Hende ta interesá anto den Dios su nòmber awe?’ Wèl, ainda bo ta haña e nòmber di Dios den vários forma na hopi lugá públiko. Por ehèmpel, e nòmber Yehova ta grabá riba e piedra di skina di un edifisio na New York City. Den e mesun stat ei, bo ta haña e nòmber tambe skirbí na hebreo riba un mozaïk kolorido ku ta dòrna un stashon di metro hopi drùk. Sin embargo, ta probablemente bèrdat ku di e míles di personanan ku a kana pasa banda di e lugánan aki, masha poko di nan lo a konsiderá e inskripshonnan aki komo importante.

E nòmber di Dios ta importante pa hende kaminda abo ta biba? Òf mayoria di nan ta yama e Kreadó “Dios,” komo si fuera e título aki ta su berdadero nòmber? Podisé bo mes a ripará ku hopi hende no ta pensa mes riba e asuntu di si Dios tin nòmber. Ke tal di abo? Bo ta sinti bo kómodo pa yama Dios na su nòmber personal, Yehova?

[Nota]

[Kuadro/Plachi na página 4]

Un Rei Ku A Hasi e Nòmber di Yehova Konosí

Na aña 1852 un grupo di misionero a biaha for di Hawai rumbo pa e islanan di Mikronesia. Nan tabatin un karta di introdukshon ku e seyo ofisial di Rei Kamehameha III, ku e tempu ei tabata e monarka ku a goberná e Islanan di Hawai. E karta aki, originalmente skirbí na idioma hawaiano i dirigí na vários gobernante di Islanan di Pasífiko, a bisa en parte: “Tin algun maestro di e Dios Haltísimo, Yehova, ku ta a punto di sali rumbo pa boso islanan, pa laga boso konosé Su Palabra pa boso salbashon eterno. . . . Mi ta konsiderá e bon maestronan aki digno di boso alto estima i amistat i ta animá boso mashá pa skucha nan instrukshon. . . . Mi ta konsehá boso pa benta boso ídolonan afó, aseptá e Señor Yehova komo boso Dios, ador’é i stim’é i E lo bendishoná boso i salba boso.”

[Plachi]

Rei Kamehameha III

[Rekonosementu]

Hawaii State Archives

[Plachi na página 3]

E Tetragramaton, ku ta nifiká “kuater lèter,” ta spèl e nòmber personal di Dios na hebreo