Bo Mester Paga Bo Belasting?

“Duna tur hende loke boso debe nan: si boso ta debe belasting, paga belasting; si ta tributo, tributo; si ta rèspèt, rèspèt; si ta onor, onor.”—Romanonan 13:7.

MIRANDO kon tarifanan di belasting ta sigui subi, e konseho ariba por parse difísil pa aseptá. Sin embargo, e palabranan ei ta di apòstel Pablo, i nan ta pará skirbi den Beibel. Sin duda, bo ta respetá Beibel. Pero kisas bo ta puntra bo mes: ‘Realmente kristiannan mester paga tur belasting, inkluso esnan ku algun por konsiderá irasonabel òf inhustu?’

Pensa riba e spièrtamentu ku Hesus a duna su disipelnan. E tabata sa ku su kompatriotanan hudiu tabatin masha rabia riba e belasting ku Roma tabata imponé riba nan. Apesar di esaki, Hesus a urgi: “Duna Cesar loke ta di Cesar, i Dios loke ta di Dios.” (Marko 12:17) Ta interesante ku Hesus a boga pa paga belasting na e mesun régimen ku despues di poko tempu lo a ehekut’é.

Un par di aña despues, Pablo a duna e konseho sitá den introdukshon. El a urgi pa paga belasting, apesar di e echo ku sumanan grandi di e plaka di belasting tabata ser usá pa finansiá e forsanan militar di Roma i pa mantené e estilo di bida inmoral i eksagerá di emperadornan romano. Dikon Pablo a tuma un posishon impopular asina?

Outoridatnan Ku Ta Goberná

Konsiderá e konteksto di e palabranan di Pablo. Na Romanonan 13:1, el a skirbi: “Laga tur hende someté nan mes na e outoridatnan ku ta goberná. Pasobra no tin outoridat ku no ta di Dios, i esnan ku ta eksistí, ta Dios a establesé nan.” Ora e nashon di Israel tabatin gobernante temeroso di Dios, tabata fásil pa konsiderá dunamentu di apoyo finansiero na e nashon komo un deber di siudadano i un deber religioso. Pero kristiannan tabatin e mesun responsabilidat ora ku e gobernantenan  tabata hende inkrédulo ku a adorá dios falsu? Sí! Pablo su palabranan ta mustra ku Dios a duna gobernantenan e “outoridat” pa goberná.

Gobièrnunan ta hasi hopi pa mantené órden. Esaki ta permití kristiannan kumpli ku e vários aktividatnan spiritual ku nan tin. (Mateo 24:14; Hebreonan 10:24, 25) P’esei Pablo a bisa relashoná ku e outoridatnan gubernamental: “E ta un sirbidó di Dios pa bo, pa bon.” (Romanonan 13:4) Pablo mes a probechá di e protekshon ku gobièrnu romano a ofresé. Por ehèmpel, un biaha ku el a bira víktima di un multitut violento, ta sòldánan romano a skap’é. Despues el a apelá na e sistema hudisial romano pa asina e por a sigui sirbi komo misionero.—Echonan 22:22-29; 25:11, 12.

P’esei Pablo a duna tres motibu pa paga belasting. Promé, el a papia tokante e “furia” di gobièrnu ora di kastigá kibradónan di lei. Di dos, el a splika ku e konsenshi di un persona deboto na Dios lo ser perhudiká si e ta desonesto den su pagamentu di belasting. Por último, el a indiká ku belasting ta simplemente un kompensashon pa e servisionan ku gobièrnu ta rindi komo “sirbidó” públiko.—Romanonan 13:1-6.

Pablo su rumannan kristian a tuma su palabranan na pechu? Evidentemente ku sí, pasobra Justino Mártir, un eskritor supuestamente kristian di siglo 2 di nos era (rònt di aña 110 pa 165), a bisa ku kristiannan tabata paga nan belasting “ku mas buena gana ku tur hende.” Awe, ora gobièrnu ta eksigí pago, sea den forma di tempu òf plaka, kristiannan ta sigui kumpli ku esei boluntariamente.—Mateo 5:41, NW. *

Klaru ku kristiannan ta liber pa probechá di kualke bentaha ku nan por haña di dedukshonnan legal di belasting. Den algun kaso nan lo por haña dedukshon a base di kontribushonnan ku nan ta duna na organisashonnan religioso. No opstante, komo ku kristiannan berdadero ta obedesé e Palabra di Dios, nan no ta partisipá den evashon di impuesto. Nan ta paga nan belasting, i ta laga e outoridatnan karga pleno responsabilidat pa e manera ku nan ta usa e plaka.

Demasiado belasting ta djis un di e maneranan ku “hende a ehersé outoridat riba un otro hende pa su daño.” (Eklesiastés 8:9) Testigunan di Yehova ta haña konsuelo den e promesa di Beibel ku pronto hustisia lo reina pa tur hende bou di e gobièrnu di Dios, un gobièrnu ku nunka lo no pone e peso di belasting inhustu riba lomba di hende.—Salmo 72:12, 13; Isaias 9:7.

[Nota]

[Komentario na página 11]

E promé kristiannan a paga nan belasting “ku mas buena gana ku tur hende.”—JUSTINO MÁRTIR

[Plachi na página 10]

Kristiannan berdadero ta obedesé lei di belasting

[Plachi na página 11]

Hesus a bisa: “Duna Cesar loke ta di Cesar”

[Rekonosementu pa Potrèt na página 10]

© European Monetary Institute