Orkidianan den Tur Nan Gloria

DI UN ESKRITOR DI SPIÈRTA! NA COSTA RICA

“Ku orguyo nan ta prònk ku nan beyesa riba e mosaikonan di muraya. Nan ta koketeá ku e brisa, sombra i solo, i awor mas ku nunka nan ta lusi sinfin.”

ASINA un artíkulo den korant a anunsiá e Eksposishon Nashonal di Orkidia ku ta tuma lugá anualmente na San José, Costa Rica. E simpel menshon di orkidia kisas ta pone bo pensa riba algun di e flornan di mas eksótiko i bunita na mundu. Un bishitante di e eksposishon a tende un hende bisa un otro bishitante: “Kon un hende por nenga e man di Dios komo e Diseñadó, ora e mira flornan asina kompliká i bunita?” En bèrdat Yehova Dios, kende su kualidatnan invisibel por wòrdu mirá klaramente na e kosnan ku el a krea, ta meresé alabansa pa e bunitesa di orkidia!—Romanonan 1:20.

Ya ta míles di aña kaba ku hende ta duna balor na orkidia. Evidensia ta indiká ku chinesnan tabata kultivá orkidia mas ku 4.000 aña pasá. Na e otro banda di mundu segun informe, Montezuma, kende a goberná kaminda awe ta Mexico for di aña 1502 pa 1520, a kultivá vários sorto di orkidia. Sin embargo, ta te den e dékadanan di 1800 e búskeda pa e matanan aki a oumentá drástikamente.

Na 1818 un hòmber na Inglatera ku yama William Cattley a risibí un kargamentu di mata tropikal for di Brazil. Den e material ku nan a empaketá e matanan, el a ripará pidanan di mata ku parse rais. El a planta nan, i despues a keda enkantá ora nan a saka un bunita flor lila. Awe e sorto di orkidia aki ta konosí komo Cattleya.

Durante añanan 1800, tabata popular entre hende riku pa kolekshoná orkidianan úniko. Bendedónan tabata pidi un preis eksorbitante, foral pa sorto nobo di orkidia. Sin embargo, na prinsipio di añanan 1900 e lokura di orkidia a mengua. Anto el a bolbe lanta kabes dékadanan despues ora ku nan a deskubrí métodonan barata pa reprodusí orkidia artifisialmente. Awor tur hende por a disfrutá di e flornan eksótiko aki!

 Un Variedat Inkreibel

E famia di orkidia kisas ta e famia mas grandi di mata ku ta saka flor, ya ku tin kasi 20.000 sorto rònt mundu. * Nan ta krese kasi tur kaminda, for di e Sírkulo Polar te na regionnan semi-desiértiko. Bo ta haña algun orkidia den tòp di palu na un haltura di 3.000 meter den Serunan di Andes, miéntras ku otro sorto—manera esnan na Oustralia—ta pasa mayor parti di nan bida komo mata bou di tera.

Tin tur tamaño i koló di orkidia i tambe tur tipo di aroma. Na Papua Nueva Guinea, nan tin orkidia ku ta midi vários meter haltu i ku ta pisa te ku dos tonelada. Otronan, ku tin flor tamaño di un kabes di angua, ta pas fásilmente den un vingerhoed. Tin orkidia ta krese ku nan rais den tera, miéntras ku mayoria (nan ta yama esakinan epifit) ta krese riba palu òf otro mata, sin saka nutrishon for di e palu- òf matanan ei. Tin orkidia ta perfumá e aire ku un holó suave di koko òf raspberry, miéntras ku otronan ta hole manera karni putrí.

Kisas bo ta puntra: ‘Tur e diferente flornan aki por ta bini di e mesun famia?’ Ounke tin asina un variedat inkreibel di orkidia, tin dos rasgo ku ta distinguí orkidia for di otro mata ku ta saka flor. Na promé lugá, orkidia su pétalonan tin un areglo úniko. Na di dos lugá, orkidia tin un kolumna  ku di un manera úniko ta djòin e órganonan reproduktivo maskulino i femenino.

Orkidianan Nativo di Costa Rica

Apesar ku Costa Rica ta un pais chikí, e tin un di e konsentrashonnan mas grandi di orkidia na mundu. De echo, e pais ta e habitat natural di aproksimadamente 1.400 sorto di orkidia, i indudablemente tin mas pa nan deskubrí. Costa Rica ta un área ku vários grado di humedat debí ku e tin Laman Caribe den ost i Oséano Pasífiko den wèst loke ta moderá e wer. I esei ta fomentá e kresementu di un variedat di orkidia. Tambe e pais tin hopi área húmedo un poko haltu (ku nan ta yama selva di nubia), kaminda mayoria orkidia ta bona. Den un selva di nubia asina nan a topa un palu ku tabatin 47 sorto di orkidia ta krese riba dje!

Hende ta hasi esfuerso kontinuo pa salba hopi sorto di orkidia ku ta ser menasá ku ekstinshon. Pero afortunadamente tin otro sortonan ku ainda ta prosperá den e selvanan di Costa Rica. Awendia hende di tur gremio tin e hòbi di kria orkidia. Nan no ta difísil pa kria, pero tin un problema. Bo por bira adikto na kriamentu di orkidia. Un eskritor a ekspres’é asina’kí: “Purba kria un orkidia so ta manera purba kome un pinda so!”

[Nota]

[Kuadro/Plachi na página 23]

Eksposishon Nashonal Anual di Orkidia

E Asosiashon Kostarikeño di Orkidia a organisá su promé eksposishon nashonal na 1971 pa konsientisá hende pa konserbá e habitat natural di orkidia. E promé eksposishon tabata chikí, i nan a show solamente 147 mata riba un par di mesa. Sin embargo, resientemente nan a show mas ku 1.600 mata. Ora bishitantenan drenta den e eksposishon nan ta haña nan diripiente ku un eksploshon di koló segun ku nan ta deleitá nan bista riba e orkidianan di tur tamaño i forma imaginabel.

[Rekonosementu]

Jardín Botánico Lankester

[Kuadro/Plachinan na página 24]

Hardin Lankester

Fundá na 1917 dor di e biólogo britániko Charles Lankester Wells, e paradeis trankil aki ta ser konsiderá komo un di e hardinnan botániko mas balioso di kontinente merikano. Hardin Lankester tin 800 sorto di orkidia nativo i eksótiko ku ta krese riba un tereno di 10,7 hèktar di selva i hardin. Tambe e ta fungi komo un sentro di reskate nashonal. Tin biaha hende ta bende orkidianan salbahe ilegalmente, foral e sortonan masha skars. Ora outoridatnan konfiská nan, nan ta hiba e orkidianan aki na Hardinnan Lankester ku e speransa di salba nan.

[Rekonosementu]

Potrètnan ariba: Jardín Botánico Lankester de la Universidad de Costa Rica

[Kuadro/Plachinan na página 25]

Kon pa Kria Orkidia na Kas

▪ Mayoria orkidia por krese den pòchi òf makutu yená ku piedra òf kaska di palu.

▪ Ounke mayoria orkidia no tin mester di tera, mester duna nan vitamina sí ku regularidat, foral ora nan ta saka flor.

▪ E kantidat di lus ku nan mester ta dependé di e sorto di orkidia. E sorto Vanda ta gusta lus briante for di un bentana kara pa zùit. Miéntras ku lus briante for di wèst òf klaridat no muchu fuerte for di zùit ta mihó pa Cattleya. E sorto Phalaenopsis ta bona ku klaridat for di wèst òf ku klaridat no muchu fuerte den un bentana ku ta kara pa zùit.

▪ Mester muha un orkidia te ora ku awa kuminsá sali for di e burakunan di e pòchi. E mata mester seka un tiki promé ku bolbe muh’é.

▪ Orkidia ta bona den humedat. Pues si bo ta biba den un ambiente seku, pone bo mata di orkidia den un skalchi ku piedra i kasi tapa e piedranan ku awa.

[Plachinan]

“Phalaenopsis”

“Vanda”

“Cattleya”

[Rekonosementu]

Jardinería Juan Bourguignon

[Plachi na página 24, 25]

E orkidia tiger por krese bira mas ku shete meter haltu i pisa te ku dos tonelada

[Rekonosementu]

Noemi Figueroa/Brooklyn Botanical Garden

[Plachi na página 25]

E orkidianan mas chikí na mundu ta midi solamente un milimeter hanchu