Un Benefisio pa Komunidat

DI UN ESKRITOR DI SPIÈRTA! NA SPAÑA

PA SIGLONAN siudatnan spañó tabata duna tereno grátis pa traha lugánan di adorashon. Outoridatnan munisipal tabata di opinion ku fe religioso lo a benefisiá nan komunidat. Siendo ku katolisismo tabata e religion estatal, propiedat munisipal tradishonalmente tabata ser duná kasi eksklusivamente na Iglesia Katóliko. Pero tempu a kambia.

Na 1980 un lei spañó ku a garantisá libertat di religion, a deklará ku “ningun religion lo ta e religion Ofisial di Estado.” Esaki a motivá algun funshonario munisipal pa rekonosé públikamente e trabou ku Testigunan di Yehova ta hasi. Komo prueba di e rekonosementu aki, nan a duna nan tereno grátis pa konstruí Salònnan di Reino.

Vários munisipio a ekspresá e opinion ku tal donashon ta bon meresí debí na “e karakter edukativo di e obra [di Testigunan di Yehova],” i debí na su “benefisionan públiko i sosial.” Otro funshonarionan a menshoná “e presensia notabel di Testigunan di Yehova den e siudat” i “e echo ku nan obra no ta wòrdu hasí ku e propósito di hasi ganashi.”

E Testigunan a traha hopi di nan Salònnan di Reino denter di 48 ora, hasiendo uso di métodonan spesial di konstrukshon implementá dor di timnan di konstrukshon ku a konsistí di Testigunan boluntario. E alkalde di siudat La Línea, den parti zùitwèst di Spaña, a komentá: “E aktitut inegoista di e boluntarionan a impreshoná mi mashá, i mi ta kere ku nan meresé nos apoyo. Nos tin mester di mas hende ku e aktitut aki den e mundu dividí djawe.” El a yama e Salòn di Reino nobo “un monumento na e spiritu di koperashon.”

Bisiñanan tambe a opservá e spiritu òf aktitut di koperashon aki. Durante e konstrukshon di dos Salòn di Reino pegá na otro na Vitoria, den nort di Spaña, Marian, ku ta biba djis eibanda, a bisa: “Si tur hende tabata reflehá e klase di amor aki, e problemanan ku nos ta sufri di dje awe, lo no a eksistí.” Despues ku un arkitekto lokal a mira konstrukshon di e edifisio, el a deklará: “Mi ke ta un Testigu di Yehova pa mi por sinti boso goso!”

Den e siudat Zaragoza, den nortost di Spaña, funshonarionan a duna e Testigunan un tereno di 600 meter kuadrá grátis. Un korant lokal a deskribí e sitio di konstrukshon manera “un nèshi di vruminga di Testigunan di Yehova, i sentenáres di vruminga trahando huntu.” Bisiñanan a duna e trahadónan un kaluroso bonbiní. Un di e bisiñanan a bisa: “Pastornan a pone mi pèrdè mi fe, pero boso a duna mi e bèk.”

E Testigunan ta gradisidu pa e yudansa ku tantu bisiña- komo outoridatnan lokal ta duna na e konstrukshon di nan lugánan di adorashon. Nan ta desididu pa usa nan Salònnan di Reino pa e mihó obra edukativo ku tin disponibel pa komunidat: e obra di prediká i siña e Palabra di Dios.

[Plachi na página 29]

La Línea, Cádiz, Spaña