Tepnan di un Piloto Eksperensiá pa Ora di Biaha

MI STIMA bulamentu ku avion, semper mi a gust’é. Bula ku avion no solamente ta duna bo e libertat di biaha rápidamente di un lugá pa otro, sino tambe e ta permití bo pasa dor di nubia riba un dia nublá i subi yega e lus radiante di solo te aya riba. Mi a gusta e sensashon di bula for di mi promé vuelo den avion komo mucha na aña 1956. Esaki a pone ku mi a sigui un karera komo piloto profeshonal, pero tambe mi a traha un tempu komo investigadó di aksidente di avion.

Kon safe bulamentu ta? I ki prekoushon bo mester tuma ora bo haña e chèns di biaha ku avion?

Prekoushonnan pa Hasi Bulamentu Mas Safe Ainda

Tur aña kasi 18.000 avion regularmente ta aterisá i lanta vuelo na míles di aeropuerto rònt mundu, hibando mas ku 1,6 mil mion pasahero na nan destinashon. Tur esaki ku masha tiki aksidente. De echo, e kompania di seguro renombrá, Lloyd di Lònden, ta kalkulá ku ta 25 bes mas safe pa biaha ku avion ku pa biaha ku outo. Pues segun estadístika, e parti mas peligroso di bo biahe lo ta ora bo ta den outo ta bai òf bini di aeropuerto. Pero tòg, bo por tuma un par di prekoushon rasonabel ora bo ta bai biaha ku por yuda hasi e manera relativamente safe aki di biaha, mas safe ainda.

● Wak bon kua kompania bo ta skohe: No ta tur kompania di aviashon tin e mesun reputashon di siguridat. Kompanianan di renombre por lo general ta safe. Nan ta usa avionnan moderno i nan tin bon reputashon debí na nan registro di siguridat i mantenshon.

● Wak bon ku ki paña bo ta biaha: Sobrebibientenan di un aksidente di avion ta konfrontá e peliger di kandela i huma. P’esei e mihó protekshon kontra vlam i kayente ta di bisti paña manga largu i un karson pia largu òf un saya largu. Paña di tela natural (por ehèmpel katuna) ta duna bon protekshon, pero material sintétiko hopi bes ta dirti òf kremp riba bo kueru ora e haña kayente, lokual lo por kousa kemaduranan mas severo. Paña di kueru tambe por kremp ku kayente i p’esei e no ta rekomendabel. Tambe bo ta haña mihó protekshon si bo tin vários paña bistí riba otro, i paña koló kla ta resistí kayente mas mihó ku paña skur. Sapatu plat, preferiblemente ku feter, tin mas chèns di keda na bo pia i protehá bo kontra kòrtá i kemadura, i mea di lana ta mihó ku mea sintétiko.

● Skucha e instrukshonnan di siguridat: E stewardessnan lo duna bo instrukshonnan ekstenso di siguridat promé ku e avion lanta. Den e kaso improbabel di un aksidente, lo bo tin ku sali for di e avion usando loke bo ta kòrda di e instrukshonnan ei ku nan a duna. P’esei skucha e informashon ku sumo atenshon. Un enkuesta di biaheronan kanades a revelá ku ta solamente 29 porshento di pasahero riba un vuelo a lesa òf wak e karchi di instrukshonnan di siguridat. Tuma un poko tempu pa studia e instrukshonnan, foral esnan ku ta mustra kon pa habri e porta- i bentananan di salida, ya ku podisé bo ta e promé ku ta yega na nan. Pensa riba kon lo bo haña e salida si ta skur òf si huma ta stroba bo di mira. Un téknika simpel ta di konta kuantu rei di stul tin entre kaminda bo ta sinta i e salidanan.  Anto asina, asta si ta skur, lo bo por haña i habri e salida di emergensia.

● Limitá bo ekipahe di man: “Un peliger ku kada bes ta presentá [pa pasaheronan] ta artíkulonan ku ta kai durante vuelonan normal for di e kompartimentu riba nan kabes ku sea no tabata bon será òf ku e pasaheronan a habri durante vuelo, kousando leshonnan serio na kabes i asta morto,” segun e revista Flight International. Pues anto no lubidá, ekipahe di man muchu pisá por ta un peliger pa siguridat. P’esei, den un situashon di emergensia, laga TUR bo ekipahe atras. Buska manera di skapa bo bida! Lo bo por haña otro ekipahe despues pa remplasá loke bo pèrdè.

Den Kaso di un Emergensia

E evakuashon di mas peligroso ta ora tin kandela, huma i gas. Un rapòrt di un aksidente a deklará: “Ora e avion a aterisá, [debí na huma] tabata kasi imposibel pa mira kiko tabatin den e kabina na mas ku un pia for di suela. E sobrebibientenan a deklará ku apénas nan tabatin e forsa i kapasidat mental pa yega na e salidanan.” Pa nan a skapa nan mester a sali lihé for di e avion.

E tripulashon ta entrená pa yuda evakuá e avion lihé i safe. P’esei, sigui nan instrukshonnan mesora. Sin embargo, kos no ta bai semper segun plan. Problema ku e sistema di zonidu, miembronan di tripulashon heridá, konfushon i e efekto di bochincha, kayente i huma por desbaratá e mihó esfuersonan di e tripulashon. Kisas e aerolínea ku bo ta bulando kuné no ta papia bo idioma nativo, i esaki tambe por stroba bon komunikashon entre abo i e tripulashon.

Análisisnan di aksidente ta mustra ku bo propio determinashon pa sobrebibí ta un faktor klave pa bo por keda na bida durante un emergensia. Bo mester tin un plan di akshon bon kla na mente i bo mester ta dispuesto pa tuma responsabilidat pa bo propio sobrebibensia. Bo plan mester inkluí esnan ku ta biahando huntu ku bo—foral mucha òf hende di edat—i tambe e pasonan ku bo ke tuma pa keda huntu pa yuda otro durante evakuashon. E revista Flying Safety ta rekomendá: “Si bo tin ku evakuá ora tin huma, laga [bo hendenan] tene na otro. Òf laga nan tene na bo faha, lokual por ta manera un kabuya salbabida.” Bisa bo kompañero òf kompañeronan di biahe kiko ta bo plan di akshon den kaso di un emergensia.

Tur forma di biaha ta karga sierto riesgo, pero avionnan moderno di pasahero ta yuda nos evitá hopi peliger i ta permití nos yega na nos destinashon bon sosegá i kla pa traha òf rekreá. Prepará bo mes pero no hansha. Relahá i disfrutá di bo vuelo, ami semper ta hasi esei.—Kontribuí.

[Plachi na página 31]

Entrenando pa un evakuashon di emergensia

[Plachi na página 31]

Skucha e instrukshonnan di siguridat