Parke Nashonal di Nairobi—Kaminda Bestia Ta Kana Liber

DI E KORESPONSAL DI SPIÈRTA! NA KENIA

TA MITAR di shete di mainta. Solo, saliendo den ost, ta parse un hoya grandi koló kòrá ku ta bria ekstraordinariamente. Anunsiando e komienso di un dia nobo, su rayonan ta penetrá dor di e bentananan di glas di e edifisionan haltu, kreando un koló di oro masha bunita. No muchu leu for di e edifisionan aki tin un drama di bida real ta tumando lugá.

Un leon, skondiendo su mes den e yerba haltu, tabatin basta ratu ta slùip un biná impala ku tabata kome yerba. E biná hóben ta sinti un peliger i ta saka un kareda kore bai, ku e leon pegá su tras. Un persekushon intenso i desesperá ta kuminsá. Si e leon aki logra, lo e mata e pober bestia desafortuná aki i asina kumpli ku e asina yamá lei di selva: esun mas fuerte ta sobrebibí.

Diariamente persekushonnan impreshonante asina ta tuma lugá den e Parke Nashonal di Nairobi, situá pegá ku e kapital di Kenia, Nairobi. E bisiñanan mas serka di e bestianan aki ta hende. Figurá bo ku na 1962 nan a mira un leon ta kana dual pafó di un hotèl luhoso, kisas pa eksigí bèk su anterior teritorio ekstenso. Kon bini bestia di mondi i habitante di stat ta kompartí e tereno aki?

Un Komienso Difísil

No tabata fásil pa establesé e parke. Tabatin vários opstákulo ku hende mester a vense promé ku e bestianan por a disfrutá di e benefisionan di un kas bon protehá. Te ku prinsipio di siglo 20, nan tabata kana libremente riba áreanan grandi di Ost Afrika. Aki e pueblonan semper tabatin laso estrecho ku bestia salbahe, lagando nan krio di bestia kome yerba basta serka di nan. Tabatin algun pueblo ta asta konsiderá sierto bestianan komo nan tou di onor!

Sin embargo, yagdónan di bestia grandi, armá ku rifel a basha drenta e pais, i hopi di nan kier a kolektá mas tantu bestia posibel komo trofeo. Entre  nan tabatin eks-presidente merikano Theodore Roosevelt, kende a bishitá Kenia na 1909 spesialmente pa kolektá sierto mata ku bestia pa museonan. E tabatin 600 kargadó di karga i yagdó profeshonal, i a mata mas ku 500 bestia i manda nan kueru kas. Rònt di mesun tempu tabatin un otro yagdó hopi konosí, Edward, prínsipe heredero di Gran Bretaña. Nan akshonnan a hasi ekspedishonnan pa yag riba bestia grandi algu masha popular. Klaru ku un tiru di skopèt tabata mas lihé, i por a mek e skopèt mas presis ku un flecha i bog tradishonal.

Despues ku nan a kompletá e famoso Trein di Lokura, manera e sporban di Kenia pa Uganda tabata konosí e tempu ei, e área rònt di Nairobi a habri pa hende establesé nan mes. Esaki a stroba e bestianan mas ainda di kana liber. Tabata parse ku hende tabata a punto di kore ku tur bestia for di e área.

Anto durante dékada di 1930 algun bos a kuminsá lanta na fabor di e bestianan. Entre e aktivistanan aki tabatin Archie Ritchie, kende e tempu ei tabata supervisá yagmentu di bestia, i Mervyn Cowie, un akountent. Mediante konferensianan i boletinnan di notisia, nan a pidi outoridatnan kolonial pa establesé un parke nashonal ku lo a yuda redusí—asta stòp—e matamentu pa loko di bestia. Gobièrnu no tabata masha dispuesto pa aseptá e idea. Nan no tabata kla pa reservá tereno solamente pa e propósito di konserbá flora i founa den un área ku tabata birando e stat mas grandi na Ost Afrika.

E esfuersonan di konserbashon a haña un otro gòlpi durante segundo guera mundial, ora ku trupanan ku tabata train pa guera a daña e tereno kaminda e parke ta situá aktualmente. Bestia tambe a bira víktima di guera. E presensia konstante di sòldá den e área a pone e bestianan pèrdè nan miedu di hende, lokual a oumentá e probabilidat ku nan lo a bira bestia komedó di hende. Pa prevení esei, nan a mata algun bestia, entre nan un leon hembra famoso ku tabata yama Lulu i su grupo enkantador di leon.

Sin embargo, komo ku outoridatnan a kambia di opinion relashoná ku e asuntu di konserbashon di bestia, konserbashonistanan a logra surpasá hopi di e opstákulonan i alkansá nan meta. Finalmente, despues di un periodo largu i turbulento di embaraso, na moda di papia, Parke Nashonal di Nairobi—e promé parke asina na Ost Afrika—a nase dia 16 di desèmber 1946, ora ku e gobernadó kolonial di Kenia di e tempu ei, Sir Philip Mitchell, a firma su sertifikado di nasementu.

Un Paradeis pa Bishitante

Kompará ku otro parkenan di bestia salbahe na Ost Afrika, e Parke Nashonal di Nairobi ta relativamente chikí. Su tamaño ta mas o ménos 117 kilometer kuadrá, i su entrada prinsipal ta keda na ménos ku 10 kilometer for di e sentro di e stat di Nairobi. Sin embargo, ta su tamaño chikí mes ta hasié famoso. Masha tiki lugá na mundu ta ofresé un bishitante e bunita bista ku e refugio di bestia aki ta duna bo: un kontraste raro entre e stat di Nairobi, ku ta desaroyando rápidamente, i e mondi afrikano.

E tamaño chikí di e parke ta permití bishitante mira mayoria di e bestianan mas grandi—ku eksepshon di olefante—na un kantidat mas hopi huntu ku na otro parkenan i reservanan natural ku ta mas ekstenso. E parke tin 100 tipo di mamífero i mas ku 400 tipo di para. E ta keda riba e ruta di avionnan ku ta preparando pa aterisá na e aeropuerto internashonal di Nairobi.

Un bishitante di Nairobi por sali for di e komodidat di un hotèl moderno den stat, pasa banda di edifisionan impreshonante i den un par di minüt yega na sabananan antiguo, terenonan di mondi i selva. Akinan bo por mira leon i otro bestia yagdó den pleno aktividat. E esena ei di e bestianan yagdó koriendo tras di nan víktima, i den background e edifisionan haltu ta bria den solo, ta un bista inolvidabel.

 E parke tin masha hopi bestia di mondi, manera búfalo, leopardo, cheetah òf jachtluipaard, zjiraf, makaku, sentenáres di biná òf antilop, i e neushoorn pretu ku ta masha skars i den peliger di ekstinshon. Mayoria di e bestianan aki ta habitante permanente. Durante e temporada di sekura di febrüari/mart i ougùstùs/sèptèmber, bo por mira trupa grandi di bestianan migratorio manera wildebeest (gnu) rònt di e hopi damnan ku tin den e parke.

Den algun dam, ku nan ta yama apropiadamente pisina di hipopótamo, bo ta haña grupo di e gigantenan aki, ku nan kurpa forma di barí, ta keda henter dia bou di awa, anto anochi ta sali pa kome yerba. Pegá ku e fuentenan di awa aki tin rutanan spesial kaminda bo por baha for di bo outo i hasi un kaminata. Pero, kuidou: E kaminatanan ei por ta hopi peligroso, komo ku tin krokodel ta biba den algun dam, i kisas nan ta deskansando na kantu i un bishitante deskuidá no ta mira nan! Pa evitá ku bo ta bira e almuerso di un di nan, ta konsehabel pa bo kana den kompania di un park ranger entrená.

Tin un kantidat grandi di para bon konosí ta biba den e parke. Abestrus, e para mas grandi na mundu—ku ta bira mas ku dos meter haltu—a haña un kas permanente einan. Bulando masha haltu den e shelu riba e stat bo ta mira samuro, un para hopi kalumniá, ehersiendo su papel di komedó di sushi. E para aparentemente mahos aki ta un bentaha pa e medio ambiente di e parke, komo ku e ta deshasí di tur kadaver ku di otro manera lo a fomentá bakteria ku ta perhudisial pa otro bestia.

De bes en kuando bo por mira un para sekretario. Tras di su oreanan e tin plumanan largu ku ta parse e pènnan di pluma di ántes ku sekretarionan tabata usa pa skirbi kuné. Semper e para aki tin purá, i ta parse manera kos ku e ta hanshando pa bai di un sita pa otro. Otro paranan ku bo ta mira ta: kabes di martin, kroonkraanvogel, zadelbekooievaar i bubi di baka.

Pa relativamente chikí ku e parke ta, e ta un obra maestro ekológiko i tin un gran variedat di habitat. Den su parti wèst, tin un selva ta okupá kasi 6 porshento di e tereno, i pa aña e ta haña entre 700 pa 1.100 milimeter di awa. Einan bo ta mira un gran kantidat di palu, entre otro kastanje di Kaap i bunita kroton (‘negrita loko pa oro’). Sabananan grandi, i tambe vayenan i lombanan di seru ta kubri e parti sùit i ost di e parke, kaminda nan ta haña entre 500 pa 700 milimeter di áwaseru pa aña. Yerba kòrá di avena, dadel di desierto, palu di venenu di flecha, i vários tipo di palu di wabi ta duna e área un berdadero ambiente di sabana afrikano.

Ta bale la pena tambe pa bo mira e magnífiko murayanan di puru baranka ku ta keda 100 meter haltu for di fondo di e vaye. Nan por ta agotador pa fanátikonan di subimentu di baranka, a lo ménos pa esnan ku ta dispuesto pa purba subi nan!

E Parke den Peliger

Hopi problema relashoná ku konserbashon di bestia di mondi tin un karakterístika en komun: hende. Pa motibu di hende su ‘esfuersonan pa desaroyá,’ e Parke Nashonal di Nairobi pronto lo por pasa pa olvido. E stat di Nairobi, e komunidat humano ku inisialmente a hasi e parke mundialmente famoso, ta sigui ekspandé, pushando e bestianan den un huki. Segun ku mas hende ta bin biba den e stat, tin mas demanda pa tereno, i e bestianan no por hasi nada. Riunan ku desperdisio líkido di fábrikanan den bisindario tambe ta forma un menasa pa tur forma di bida den e parke.

Un otro faktor importante pa e parke por sobrebibí ta ku mester tin un ruta disponibel pa sierto bestia migratorio. Gran parti di e parke ta será ku waya pa stroba e bestianan di dual drenta stat. Pero un oumento di agrikultura i di krio di bestia doméstiko ta blòkiando e pasashi smal ku a keda na parti sùit di e parke. Si nan sera e parke kompletu ku waya esei lo tin resultadonan trágiko. Bestianan ku sali bai buska yerba pa kome nunka mas lo tin chèns di regresá! Pa skapa e ruta di migrashon, Servisio di Naturalesa di Kenia, e organisashon prinsipal di e pais pa konserbashon di bestia den naturalesa, a logra hür un tereno pegá ku e parke. Apesar di e problemanan, Parke Nashonal di Nairobi ta sigui atraé míles di bishitante tur aña ku ta bin pa mira su kontraste di enkantonan.

[Plachi na página 24]

Zjiraf

[Plachi na página 25]

Leopardo

 [Plachi na página 26]

Un trupa di oyevar marabú

[Plachi na página 26]

Krokodel

[Plachi na página 26]

Leon

[Plachi na página 26]

Kroonkraan-vogel

[Plachi na página 26]

Neushoorn pretu

[Plachi na página 26]

Abestrus