Kon Beibel por Yuda Hende Diabétiko

DOMINIO PROPIO i un punto di bista positivo ta masha importante p’e salú i bienestar di hende ku diabétis. Pero pa e diabétikonan por kultivá e kualidatnan ei, nan tin mester di apoyo kontinuo. P’esei, miembronan di famia i amigunan no mester hinka un persona diabétiko den tentashon pa kome kuminda insaludabel, kisas dor di bisa: ‘Un biaha so no ta hasi nada.’ “Mi kasá ta apoyá mi hopi bon,” segun Harry, kende tin malesa di kurason i diabétis Tipo 2. “Na mi kas no tin kos ku mi no tin mag di kome. Pero tin hende ku no ta komprondé esei, i nan no sa kon difísil ta tin biaha ora bo tin e kosnan ei den kas.”

Si bo ta asosiá regularmente ku un persona diabétiko, kòrda e dos bunita prinsipionan bíbliko aki: “No laga ningun hende buska su mes interes, sino esun di su próhimo,” i “Amor . . . no ta buska su propio interes.”—1 Korintionan 10:24; 13:4, 5.

Tur hende ku ta interesá den nan salú—sea ku nan tin diabétis òf nò—mester kome na un manera moderá. Beibel ta yuda nos den esaki pasobra e ta mustra ku nos tur mester kultivá dominio propio. Bo a determiná pa kultivá e kualidat aki den bo bida? (Galationan 5:22, 23) Bo por haña mas yudansa for di ehèmpelnan bíbliko, manera por ehèmpel esun di apòstel kristian Pablo. Un persona ku diabétis a bisa: “E tabatin un sumpiña permanente den su karni, pero tòg el a sirbi Dios fielmente i plenamente. Pues, ami tambe por!”

Sí, Pablo a aseptá loke e no por a kambia i e tabatin hopi éksito komo misionero. (2 Korintionan 12:7-9) Dustin di 18 aña di edat a nase siegu, i el a haña diabétis ora e tabatin 12 aña. El a skirbi: “Mi sa ku den e mundu aki no tin ningun hende ku tin tur kos perfekto. Mi ta spera ansiosamente riba e tempu den Dios su mundu nobo ora ku lo mi no tin diabétis mas. Pa mi e ta djis algu temporal. Podisé e ta dura mas tantu ku un verkout òf grip sí, pero un dia lo e kita.”

Ora Dustin a bisa e palabranan ei, e tabatin na mente e speransa ku Beibel ta duna di haña salú perfekto den un paradeis riba tera bou di e Reino di Dios. (Revelashon 21:3, 4) E Palabra di Dios ta primintí ku bou di e gobièrnu divino ei, “ningun habitante lo no bisa: ‘Mi ta malu.’” (Isaias 33:24; Mateo 6:9, 10) Lo bo kier siña mas tokante e promesa bíbliko aki? Tuma kontakto ku Testigunan di Yehova den bo área, òf skirbi publikadónan di e revista aki na e adrès apropiá menshoná na página 5.

[Plachi na página 12]

Dominio propio i un punto di bista positivo ta masha importante