E Mito Ku pa Nada di Mundu No Kier Muri

DI E KORESPONSAL DI SPIÈRTA! NA FRANSIA

MUCHANAN rònt mundu stim’é sinfin. Den un aña resien, servisio postal di Fransia a risibí kasi 800.000 karta p’e, prinsipalmente di muchanan entre 3 pa 8 aña. E personahe simpátiko di Papa Pasku (Santa Claus), ku su barba blanku i mantel kòrá ku rant di lana blanku, aparentemente ta un di e atrakshonnan mas popular di e festividatnan di dianan di fiesta. P’esei, bo por imaginá bo anto ku nan ta kima un pòpchi di dje? Esei ta presis loke a sosodé mas ku 50 aña pasá na Dijon, Fransia. Dia 23 di desèmber 1951, nan a “ehekutá” Papa Pasku dilanti mas o ménos 250 mucha.

Ki malu el a hasi? E korant France-Soir a informá ku e ehekushon aki a tuma lugá “ku aprobashon di klero, kendenan a kondená Papa Pasku di sakrilegio i di tuma onor ku no a tok’é” i a akus’é di a “pone Pasku bira pagano.” Segun un komunikado, e ehekushon tabata “un akto simbóliko.” “Falsedat no por stimulá sintimentu religioso den mucha i sigur e no ta e manera pa eduká nan.”

Algun miembro di klero tabata di opinion ku e kustumbernan relashoná ku Papa Pasku a pone hende desviá di “e berdadero nifikashon kristian” di e nasementu di Hesus. De echo, den e edishon di mart 1952 di e revista Les Temps Modernes (Tempu Moderno), Claude Lévi-Strauss, un analista di kultura, a yama e kerementu den Papa Pasku “un di e kunanan mas aktivo di paganismo serka hende moderno” i a deklará ku iglesia tin bon motibu pa denunsiá e kreensia aki. Lévi-Strauss a remarká tambe ku Papa Pasku a originá ku e rei di Saturnalia. Den antiguo Roma nan tabata selebrá e fiesta di Saturnalia di 17 pa 24 di desèmber. Durante e siman ei, nan a dòrna edifisionan ku blachi òf mata bèrdè i a duna otro regalo. Meskos ku Pasku, den e dianan di Saturnalia nan tabata hasi hopi fiesta.

Kon katólikonan na Fransia ta konsiderá Papa Pasku awe, mas ku 50 aña despues ku nan a kima e pòpchi di Papa Pasku? E famia djaleu aki di e Saturnalia di Roma tambe ta un parti integral di Pasku, meskos ku e figura di Hesus den pesebre. De bes en kuando, un pastor ta denunsiá Santa Claus komo un forma di komersialismo ku ta saka Kristu for di Pasku. Sin embargo, pa mayoria di nan, te na ora mes ku e raisnan pagano di Papa Pasku a molestiá nan konsenshi, e echo ku públiko en general a asept’é ku brasa habrí a pone nan lubidá tur esei.

[Plachi na página 13]

DR/© Cliché Bibliothèque nationale de France, Paris