For di Nos Lektornan

Kabei Mi a gusta e artíkulo “Bo Kabei Ta Preokupá Bo?” (8 di ougùstùs 2002) Mi tin 14 aña komo spesialista di beyesa. E manera ku boso a bisa pa skeiru kabei maltratá, ta e manera ku nos ta hasié. Mi a keda impreshoná pa e manera profeshonal ku boso artíkulonan ta wòrdu skirbí.

K. K., Hapon

Komo un lesadó ferviente di Spièrta! mi tin ku ekspresá mi apresio pa e artíkulo aki. Mi a kuminsá haña kabei blanku for di ora ku mi a bira teenager. Pa ora mi tabatin banda di 17 aña, bo por a mira e kabei blankunan djaleu. Mi tabata sinti hopi bèrgwensa. E artíkulo aki a yuda mi haña un punto di bista mas moderá di mi aparensia, miéntras mi ta konsentrá mas riba desaroyá kualidatnan ku ta agradá Dios.

E. J., Nigeria

Lo mi kier gradisí boso di fondo di mi kurason pa e artíkulo “Bo Kabei Ta Preokupá Bo?” (8 di ougùstùs 2002) Mi tin 36 aña, i pa basta tempu kaba mi ta preokupá ku, tiki-tiki mi kabei ta kai i mi kabes ta birando limpi. E artíkulo aki a yuda mi komprondé ku ta normal ku bo ta pèrdè un tiki kabei tur dia. Awor mi ta sinti mi hopi mas trankil. Sigui publiká e tipo di artíkulonan aki!

V. G., Slovakia

Mi a haña e artíkulo aki nèt na ora. Mi tabata bou di masha hopi strès pasobra mi kabei tabata kai. E artíkulo aki a kalma mi, foral e frase ku a bisa ku “hopi bes otro hende no ta dje preokupá ei tokante bo kabei manera abo mes.” Loke a yuda mi tambe ta ora mi a haña sa ku maske bo no tin problema ku bo kabei, tòg aproksimadamente 70 pa 100 kabei ta kai pa dia!

E. L., Merka

Enamorá Danki pa e artíkulo di “Opservando Mundu” ku e tema “E Euforia di Amor.” (8 di ougùstùs 2002) E artíkulo aki a yuda mi realisá ku asta den kaso ku bo ta sigui sinti bo enamorá di un persona, no nesesariamente esei ta un base sólido pa un matrimonio felis. E tipo di konseho aki realmente por skapa un persona di sigui un rumbo bobo!

P. L., Rusia

Wega di Plaka Nèt mi a kaba di lesa e seri “Wega di Plaka—E Ta un Dibertishon Inofensivo?” (8 di ougùstùs 2002) Mi ta gradisí Yehova ku el a usa boso pa perkurá e informashon oportuno aki. Mi no por a kere mi bista ora mi a lesa tokante e komportashon di un hende ku posiblemente ta adikto na wega di plaka. Tabata komo si fuera boso a deskribí mi kasá! Lamentablemente, e práktika pekaminoso aki a hiba na otro pikánan serio. Wega di plaka ta un pèst. Mi ta ègt spera ku tur hende lo kòrda ku e no ta un dibertishon inofensivo.

M. G., Merka