Desplegando Amor den Tempu di Angustia

DI E KORESPONSAL DI SPIÈRTA! NA NIGERIA

DJADUMINGU, 27 di yanüari 2002, a ser yamá Djadumingu Pretu na Lagos, Nigeria. Un eksploshon den un depósito di arma bou di tera a sagudí henter e stat violentamente i a iluminá shelu djanochi. Durante vários ora eksploshonnan a kousa un yobida di proyektil, piedra i otro kosnan te ku tres kilometer leu, okashonando pániko den e stat.

Rumornan straño a kousa mas miedu. Multitutnan di hende morto spantá a kore subi kaya, sin sa di kiko nan tabata hui ni na unda nan tabata bai. Den e skuridat djanochi, sentenáres di hende, inkluso hopi mucha histériko, a kore drenta den un kanal ku awa trubel i a hoga. Kas-, skol- i establesimentunan komersial a ser destruí òf a sufri daño konsiderabel, lagando míles di hende sin kas i sin trabou. Nan ta kalkulá ku mas o ménos 1.000 a pèrdè nan bida den e tragedia. Kálkulonan mas despues ta menshoná un kantidat asta mas haltu.

Un kantidat di 1.350 bòm, rakèt i granada di man ku no a eksplotá a ser rekuperá for di áreanan residensial rònt di e instalashon militar kaminda e eksploshonnan a tuma lugá. Un hòmber a haña un opheto di metal den su sala. Sin realisá ku tabata un bòm, el a koh’é, pon’é den baul di su outo, i hib’é bèk pa outoridatnan.

Ora ku e ofisina di sukursal di Nigeria di Testigunan di Yehova a tende e notisia di e eksploshonnan, nan a tuma kontakto mesora ku un ansiano na Lagos i a manda e 16 superintendentenan biahero den e área pa evaluá e situashon di e 36.000 Testigunan na Lagos. E sukursal a manda un mion naira (mas o ménos 18.000 florin antiano), huntu ku  instrukshon pa forma un komité di ousilio pa duna yudansa.

Di e Testigunan di Yehova, ta un hòmber a resultá seriamente heridá dor di fragmentonan di bòm; lamentablemente, dos señora hóben a pèrdè nan bida; i dos Salòn di Reino i kas di 45 famia a sufri daño.

Dia 2 di febrüari 2002, seis dia despues di e eksploshon di munishon, a lanta un konflikto étniko den un otro parti di e stat. Segun Krus Kòrá, e bringamentu ei tabatin un saldo di 100 morto, 430 herido, 50 kas kimá i 3.000 hende a haña nan obligá di bandoná nan kas. E komité di ousilio ku tabata atendé e nesesidatnan di e víktimanan di e “Djadumingu Pretu,” rápidamente a bai buska drechi di nan rumannan kristian den e área ei.

Na e okashon ei ningun di e Testigunan no a pèrdè nan bida, ya ku mayoria di nan tabata na un asamblea di sirkuito ora ku e bringamentu a kuminsá. Sin embargo, hopi miembro di e sinku kongregashonnan den e área no a haña nan kas ora nan a regresá. Mesora nan rumannan kristian a tuma nan den kas. Un Testigu dòkter ku su kasá a duna alohamentu na 27 persona ku a haña nan obligá di bandoná nan kas.

E Testigunan na Lagos ku no a ser afektá dor di e eksploshon ni dor di e bringamentu étniko, generosamente a kontribuí ku alimento, paña i artíkulonan di kas. E superintendente di siudat a informá: “Loke e rumannan di e área di Lagos ta kontribuí kuné ta hopi mas di loke esnan afektá tin mester.” E sukursal mester a skirbi e kongregashonnan pidi nan pa no manda mas kontribushon. Asina mes a yena tres trùk ku artíkulonan ku a sobra, i a manda nan sukursal pa warda den depósito.

Ansianonan di kongregashon a bishitá hopi víktima i tambe famia di esnan ku a muri. Nan a purba duna konsuelo bíbliko. E komité di ousilio a organisá reparashon di e kasnan ku a risibí daño. Nan a sòru pa e víktimanan di ámbos desaster haña artíkulonan di kas, paña i alimento i a yuda esnan ku mester a bandoná nan kas, pa nan haña alohamentu mas safe. Na total e komité a yuda 90 famia i persona individual.

Hopi víktima a keda masha emoshoná ku e yudansa ku nan a risibí. Un Testigu a bisa e komité di ousilio: “Tanten mi ta na bida, lo mi hasi Yehova mi ‘refugio i fortalesa’!”—Salmo 46:1, 2.

Personanan ku no ta Testigu a tuma nota di e manera ku Testigunan di Yehova a perkurá pa otro durante e krísisnan aki. Tio di un di e Testigunan ku a fayesé a bisa e ansianonan di e kongregashon kaminda e ruman muhé tabata asistí: “Lo mi bin bèk pa gradisí boso manera mester ta i pa siña mas.” I el a bisa su famianan: “Loke mi a mira na Lagos ta maravioso. Ni famianan no a hasi loke e hendenan aki a hasi.”

[Plachi na página 29]

Un trùk kargá ku artíkulonan di ousilio

[Plachi na página 29]

Algun persona ku a risibí yudansa

[Plachi na página 30]

E pareha aki a duna alohamentu na 27 persona

[Plachi na página 30]

Testigunan trahando riba un kas ku a sufri daño

[Rekonosementu pa Potrèt na página 29]

Ariba: Sam Olusegun – The Guardian