For di Nos Lektornan

Maternidat Danki pa e seri di artíkulo “Bo Mester Ta un Supermuhé pa Bo Ta Mama?” (8 di aprel 2002) Awendia hopi hende ta kere ku mama ku ta na kas no ta mes drùk ku mama ku ta traha. Boso artíkulo a yuda boso lektornan mira ku tur mama ta mama ku ta traha!

T. M., Merka

E promé kos ku a kapta mi atenshon tabata e plachi di un supermuhé na página 2. Mi kier a lesa e artíkulo mesora. Siendo mama di dos yu chikí, mi por bisa ku e artíkulonan a duna un deskripshon realístiko di e rutina diario di un mama.

C. L., Alemania

Mi ta un mucha muhé di 12 aña, i ora mi a haña e revista aki mi a les’é mesora. Awor mi ta komprondé kiko mi mama ta hasi pa mi ku mi tata. Awor mi ta apresi’é i yud’é mas tantu!

A. L., Merka

Dos aña pasá mi a haña un yu hòmber. Promé ku esei mi tabata un predikadó di tempu kompletu i tabata traha partaim. Komo ku mi tabata anhelá mi estilo di bida anterior, mi tabata sinti ku mi no ta digno di mi papel komo mama. Mi tabatin mester di un konfirmashon ku mi tabata hasiendo bon, i esei ta loke mi a haña lesando e artíkulonan aki.

S. T., Italia

Poko tempu pasá mi a realisá ku mi mester traha tempu pa relahá, manera boso ta konsehá. Mi a kuminsá hasi esaki promé ku mi a haña e artíkulonan aki, i mi tabata sinti mi kulpabel ku mi ta hasié. Danki pa yuda mi mira ku mi no tin ku sinti mi kulpabel tanten mi keda balansá.

C. C., Merka

Tin mama ta sinti ku nan no ta haña sufisiente rekonosementu pa nan trabou duru. E artíkulonan aki a duna nan e rekonosementu ku nan meresé. Mi ta mama di kuater yu, i mi sa kon difísil ta pa haña e balansa entre ser un ama di kas i traha. E echo ku Yehova a usa Sálomon pa skirbi tokante mamanan ku ta traha duru, ta duna mi konsuelo i ta animá mi pa sigui hasi mi bèst.

E. S., Alemania

Mi ta mama di un yu muhé di tres aña, i mi ta sinti mi kulpabel pasobra tur ora mi ta kansá. E artíkulonan aki a yuda mi mira ku no ta ami so ta sinti asina, i nan a duna mi algun sugerensia hopi bon tokante kiko mi por hasi pa drecha mi situashon.

K. J., Merka

E portada di e revista aki ta mustra un mama ku un beibi den brasa. Ta parse manera ku e beibi ta komiendo un hotdog. Ami ku mi kasá a kaba di sigui un lès di reanimashon i e instruktor a bisa ku komementu di hotdog ta e kousa prinsipal di stekmentu serka beibi i mucha. El a pidi nos mashá pa no laga mucha chikí kome hotdog.

G. E., Merka

“Spièrta!” ta kontestá: Nos ta di akuerdo ku komementu di hotdog por pone beibi i mucha chikí stek. Pero e mucha riba nos portada ta chupando un wòrtel den brasa di su mama.

Relato di Bida Mi a yora di goso i di tristesa ora mi a lesa e relato di bida “Apesar di Prueba, Mi Speransa A Keda Briante.” (8 di mei 2002) Ruman Hanák su kurashi na edat di 20 aña a rekordá mi ku nos por konfia ku Yehova ta duna asta hóbennan e determinashon pa apoyá su normanan hustu. Danki ku boso ta sigui saka artíkulonan asina ekselente ku ta duna nos e bon animashon ku nos mester den e tempu trabahoso aki.

K. G., Merka