En Buska di Maneranan Mas Safe pa Bula

DJIS un par di siman promé ku 11 di sèptèmber, Alex a sinti ku e tabata a punto di vense su miedu di bula. Segun ku e avion di pasahero ku e tabata aden a lanta vuelo for di Aténas rumbo pa Boston, Alex, di 42 aña i manager di relashonnan públiko di su kompania, a kuminsá sinti un atake leve di pániko: su kurason a kuminsá bati purá i el a kuminsá soda den su man i na su frenta.

Pero e tabata sa kiko e mester hasi. E terapista ku tabata purba yud’é vense su miedu di bula a bis’é ku e tin ku hala rosea profundo, pensa riba un paisahe plasentero i tene e man di e stul duru i lag’é bai kuater biaha pa minüt. Ora ku Alex kasi no por a soportá mas e turbulensia den laira i zonidunan spantoso, el a imaginá ku e tabata kantu di un laman trankil. “Mi a pensa ku mi a bai hopi dilanti,” Alex a deklará.

Miónes di pasahero di avion tabatin miedu di bula. Último añanan hopi di nan a sigui kursonan pa vense miedu di bula. Hopi bes ta miembronan di famia, doñonan di trabou i kompanianan di aviashon ta esnan ku a konvensé nan pa hasi esei, ya ku nan tur tabatin motibu pa pone nan bula. Pa mayoria pasahero e lèsnan tabata probechoso; hopi klínika ta gaba ku 90 porshentu di esnan ku sigui e lèsnan ta vense nan miedu.

Pero 11 di sèptèmber a kambia tur esei. Alex a stòp di bai lès mesora. I su doño di trabou a keda desepshoná ora ku el a kanselá tur plan pa bula bai topa un potensial kliente prestigioso. Alex a bisa: “Mi miedu di bula, kombiná ku atake terorista, tabata demasiado pa mi. E terapia no a prepará mi pa esei.”

 Un Análisis di Medidanan di Siguridat

Biaheronan nervioso ta mustra tambe ku ta e mesun preguntanan ku sa hasi pasaheronan promé ku nan drenta avion, a hasi e sekuestradónan dia 11 di sèptèmber. Pregunta manera: “Hende ku bo no konosé a pidi bo bai ku un paki pa nan riba e vuelo aki? Parti di bo ekipahe no tabata bou di bo supervishon na sierto momentu for di ora ku bo a paket’é te awor?” E sekuestradónan sin duda a kontestá meskos ku mayoria hende: “Nò!” Algun eksperto di siguridat tambe ta konsiderá e echo ku e sekuestradónan a subi avion sin problema komo muestra di e fayo den kontròl di siguridat den biahamentu ku avion. Jim McKenna, eks-direktor di Aviation Safety Alliance, a bisa: “Niun hende ni nada por a fòrsa un kambio. Pero e kombinashon di kuater avion sekuestrá i destruí ku a kousa morto di míles di hende, kisas ta sufisiente pa fòrsa e kambio ei.”

A konsekuensia di e aksidentenan mortal ei, henter e asuntu di siguridat di aeropuerto i avion ta bou di un eksaminashon intenso. Na un oudiensia di kongreso merikano, e inspektor general di Departamentu di Transporte, Kenneth M. Mead, a deklará: “Apesar di medidanan di siguridat eksistente i nobo, tòg ainda tin buraku grandi den e sistema di siguridat i algun . . . punto débil ku nos mester hasi mas safe.” Kiko ta ser hasí pa sera e burakunan ei?

Kontròl Riba Posibel Menasanan di Siguridat

Ora nan a puntra un funshonario di siguridat di alto rango di un kompania di aviashon grandi na Merka si e tin miedu di bula, el a bisa “nò” sin vasilá. El a splika ku e tin konfiansa den e sistema di ‘screen’ òf kontrolá pasahero via kòmpiuter (CAPS), un sistema ku ta registrá tur ticket bendí pa e kompanianan di aviashon ku ta us’é. E sistema ta indiká si un ticket ta kumprá na ofisina di e aerolínea òf na un agensia di biahe òf via Internet. Ademas, e ta registrá otro informashon manera si e pasahero ta bula su so òf ku  miembronan di famia òf ku otro kompañero, i tambe detayenan manera si e pasahero tin konekshonnan kriminal òf si el a yega di komportá su mes malu ku e aerolínea òf ku personal òf propiedat di e aerolínea.

Kada bes ku un pasahero chèk in na un aeropuerto, nan ta verifiká e informashon aki i pon’é al dia ku e mas resiente informashon, inkluso e persona su kontesta riba e preguntanan di kontròl. Detayenan spesífiko di e informashon rekompilá i kua ta e métodonan ku ta ser usá pa prosesá i identifiká e karakterístikanan di personanan ku ta forma un menasa pa siguridat, ta keda un di e sekretonan mihó wardá di e industria di aviashon. Rònt mundu nan ta usa vários sistema paresido na CAPS, i algun ta direktamente konektá ku otro agensianan gubernamental òf di polis internashonal, manera Interpol. Na hopi aeropuerto europeo e sistemanan di kontrolá pasport por registrá i sigui presis un pasahero su ruta ku avion di un pais pa otro i tambe unda i ki dia el a biaha.

E sistema aki di analisá informashon ta sali for di e punto di bista ku hendenan ku mente maligno ta un menasa hopi mas grandi ku artíkulonan manera ekipahe na man i maleta ku ta bai bagage. P’esei, pa mas siguridat na aeropuerto, algun kompania ta usando kaba i otronan tin pensá di usa aparatonan biométriko (métodonan di identifikashon ku ta usa karakterístikanan personal úniko manera fingerprint, variashon di stèm, etc.) i tarhetanan elektróniko.

Un otro preokupashon grandi di siguridat na aeropuerto, fuera di identifiká pasaheronan ku por forma un posibel menasa pa siguridat, ta pa evitá ku artíkulo- i supstansianan peligroso ta yega na bordo di avion. Kontròlnan hasí ku mashin di skèn tin nan limitashon. No ta fásil pa personal di siguridat di aeropuerto keda atento pa periodonan largu, ya ku ta masha laf mes pa sinta wak pa oranan largu e imágennan wazig riba pantaya. I e aparatonan di detektá metal ta keda bati alarma falsu bes tras bes, detektando yabi di kas, sèn largá i hèspu di faha.

Leinan Mas Estrikto

Pa kontrarestá e limitashonnan ei, gobièrnunan a bini ku leinan pa hasi siguridat na aeropuerto mas estrikto. Na Merka, esaki ta nifiká ku nan mester implementá e siguiente medidanan promé ku fin di 2002: hasi sigur ku no ta bai ku maleta sin ku nan doño ta riba e vuelo, inspekshon kompletu di tur kos ku ta bai den kabina i kontrolá tur maleta pa mira si nan tin eksplosivo. Nan ta den proseso pa hasi porta di cockpit mas fuerte i mas sigur. Personal di aerolíneanan ta haña mas training pa ora di krísis. I tambe nan a kuminsá usa polis federal armá riba vuelonan komersial.

Den e simannan i lunanan despues di 11 di sèptèmber, nan tabata listra pasahero i maleta na man den hopi aeropuerto rònt mundu. Den algun kaso, nan tabata hasi un di dos kontròl manual di pasahero i ekipahe di man. Biaheronan europeo tabata konosé e tipo di prekoushonnan aki kaba, ya ku a implementá nan tur kaminda for di e dékada di 1970, tempu ku tabatin un kantidat  rèkòrt di sekuestro di avion. Awor pasaheronan no mag subi abordo ku ophetonan skèrpi i ta solamente esnan ku tin ticket por pasa kontròl di siguridat. Hopi hende a bin kustumbrá ku e filanan mas largu di chèk in i ku e presensia di personal militar armá na aeropuertonan.

Énfasis Riba Mantenshon

Imaginá e esena konosí aki: Despues di a chambuká dor di un kantidat di kontròl di aeropuerto, e pasahero porfin ta yega na sala di salida, en espera di e yamada pa abordá. Pero e pasahero na bachi pará banda di dje ta bis’é: “B’a tende? Tin problema tékniko ku e avion.” E ta trèk kara i agregá: “Mi ta spera ku nan no ta laga nos bai ku un motor ménos!”

Loke mayoria pasahero no ta realisá ta ku agensianan di aviashon tin sistemanan rigoroso i masha minusioso di inspekshon. Nan ta wak ki klase di reparashon ta nesesario dor di kontrolá e avion su lògbuk mekániko, kaminda ta registrá tur vuelo i detaye kuidadosamente. E agensianan ei de echo ta eksigí pa drecha i mantené avion- i nan motornan a fondo segun un programa estrikto⁠—⁠un programa hopi mas frekuente ku pa un outo⁠—⁠asta si e avion nunka no tabatin problema.

Un funshonario di mantenshon na un kompania grandi di aviashon a eksperensiá esaki personalmente. El a bisa: “Mi tin kasi 15 aña den e industria aki, i nunka mi no a mira, ni papia ku un hende ku ta traha den mantenshon ku no a tuma siguridat mashá na serio. Kon ku bai bini, e trahadó su amigu- i famianan tambe ta bula ku e avion ku e ta traha kuné, p’esei nan no ta tuma riesgonan imprudente.”

Téknikonan di avion i trahadónan di mantenshon ta sinti un responsabilidat personal pisá. Un di nan ta kòrda: “Nunka lo mi lubidá e anochi  ku nos a pèrdè un DC-10 na Sioux City, Iowa. Mi tabata traha komo tékniko di avion e tempu ei, i mi trabou tabata pa inspekshoná i service parti paden di e rabu di e mesun tipo di avion ei. N’e momentunan ei nos no tabata sa kiko presis a pasa ku e avion ku nan a pèrdè. Mi ta kòrda ku kuantu konsentrashon mi a hasi mi trabou e anochi ei, puntrando mi mes: ‘Ta kiko a pasa ku e avion ei? Akaso un hende a pasa por haltu di algu ku ami lo por haña awor i asina evitá un tragedia similar? Mi ta hasiendo tur kos presis manera mi mester hasié?’ E anochi ei mi a keda hopi ora den e rabu, kontrolando i pensando.”

Téknikonan di avion konstantemente ta haña training riba tur tereno di nan trabou, for di tareanan rutinario te na inspekshon hopi avansá i nan abilidat di identifiká problema i solushoná nan. Tur aña nan ta aktualisá e kursonan di entrenamentu pa asina trata tur tipo di situashon ku nan lo por topa, for di kosnan komun i koriente te na kosnan ekstraordinario.

Despues di un aksidente di avion, nan ta analisá tur e informashon ku nan kompilá i hink’é den un simulador. Pilotonan di prueba i ingenieronan di avion ta bula e simulador pa wak ki otro posibel solushon nan por deskubrí, ya asina téknikonan por manehá problemanan similar mihó den futuro. Ora kaba, nan ta organisá un programa di training ku ta  trata ku esaki pa asina nan por duna e téknikonan instrukshon spesífiko. E manera aki di analisá problema ta hiba tambe na kambionan den diseño di avion i partinan di avion, ku e speransa ku nan por siña for di e tipo di fayonan ei i prevení nan mas tantu posibel.

Un trahadó di mantenshon ta konkluí: “Nan ta bisa nos tur ku ‘siguridat no ta sosodé pa kasualidat, mester plani’é.’”

Bulando Atrobe

Despues di un periodo di kuater luna⁠—⁠durante kua e no kier a bula⁠—⁠Alex a disidí ku tabata tempu pa trata ku su miedu di bula. E presensia di agentenan polisial i di guardia nashonal na Logan International Airport di Boston aparentemente no a molosti’é, ni e filanan largu pa chèk in ni e listramentu na man di su ekipahe.

Pa Alex e kosnan aki tabata señalnan ku a trankilis’é den su búskeda pa un vuelo mas safe. Ainda el a soda un tiki i su kurason a bati un poko mas duru, pero segun ku Alex tabata hinka su ekipahe di man den e kompartimentu riba su stul, el a bisa: “Mi ta sinti mi muchu mas mihó awor.”

[Kuadro/Plachi na página 5]

Datonan di Bulamentu

Segun kálkulo, 20% di pasahero tin miedu di bula. Sin embargo, no ta tur e hendenan aki ta haña ku bulamentu no ta safe. Hopi bes nan miedu ta originá di otro fobia ku nan tin, por ehèmpel, miedu di haltura òf di lugá ku hopi hende.

[Tabèl na página 8]

KUANTU CHÈNS TIN PA UN AKSIDENTE FATAL?

Chèns den un Chèns den henter

aña ta 1 den: bo bida ta 1 den:

Vehíkulo di motor 6.212 81

Asesinato 15.104 197

Kousá pa mashin 265.000 3.500

Aksidente ku avion 390.000 5.100

Hoga den badkuip 802.000 10.500

Bestia i mata venenoso 4,2 million 55.900

Werlek 4,3 million 56.000

[Rekonosementu]

Fuente: Konseho Nashonal di Siguridat

[Rekonosementu pa Potrèt na página 6,7]

AP Photo/Joel Page

[Plachi na página 7]

Kontròl i identifikashon di pasahero

[Plachi na página 7]

Mihó mantenshon

Mayor siguridat na aeropuerto

[Komentario di e plachi na página 7]

Kontròl i identifikashon di pasahero

[Komentario di e plachi na página 7]

Mihó mantenshon

[Plachi na página 8]

Pilotonan ta profeshonalnan hopi bon entrená