Kon Safe Tapeit Ta?

KUANTU tempu bo ta pasa den lugánan será, ku tin tapeit “wall-to-wall”? Un informe den e revista New Scientist ta indiká ku e kontesta por ta un asuntu di preokupashon, foral pa mucha.

E revista a komentá: “Den ambientenan será nos ta ser eksponé entre 10 pa 50 biaha mas tantu na mayoria elemento venenoso ku ta kousa kontaminashon ku ora nos ta pafó.” John Roberts, un eksperto di medio ambiente na Merka, ta bisa ku muestranan di stòf di tapeit for di kasnan típiko por kontené nivelnan alarmante di elemento ku ta kousa kontaminashon. Esakinan ta entre otro, chumbu, katmio, merkurio, pestisida i e supstansianan ku ta kousa kanser polychloorbifenylen (PCB) i polycyclische aromatische koolwaterstoffen (PAH).

Segun informe, e pestisidanan ku ta drenta den kas bou di sapatu i na pata di bestia di kas por subi e kontenido di pestisida den e stòf di tapeit i hasié 400 biaha mas tantu. Ekspertonan ta bisa ku e elementonan venenoso aki ta keda pa hopi aña. Komo ku pestisida i PAH ta supstansianan ku ta evaporá lihé, nan ta zueif rònt i despues ta baha riba tapeit i otro superfisie.

Hopi bes mucha chikitu ta hunga riba flur i despues ta hinka nan dede den boka. P’esei nan ta mas vulnerabel pa elementonan venenoso. Komo ku mucha chikitu su metabolismo ta traha mas haltu ku di hende grandi, ounke nan ta pisa ménos, nan ta hala hopi mas aire aden ku hende grandi.

Tin investigadó ta puntra nan mes si no ta e oumento di tapeit den lugánan será por ta kontribuyendo na e oumento di asma, alergia i kanser serka mucha. Roberts ta remarká: “Un kas ku flur bashí i djis un par di tapeit chikitu aki-aya, lo tin mas o ménos un désimo parti di e kantidat di stòf ku bo ta haña den un kas ku tapeit wall-to-wall.”

Roberts ta sugerí ku pa hasi tapeit mas safe, bo mester usa un stòfzùiger ku un kabes potente. Anto un biaha pa siman, durante un periodo di vários siman, bo ta pasa 25 biaha riba e tapeit denter di un meter i mei for di e entradanan prinsipal. Tambe 16 biaha kaminda hopi pia ta pasa i 8 biaha riba e sobrá di área kubrí ku tapeit.

Despues ku bo kompletá e prosedura simpel aki, lo bo por mantené e nivel di stòf abou si tur siman bo pasa ku stòfzùiger riba e tapeit mitar dje kantidat di biahanan rekomendá ariba. Tambe Roberts ta konsehá: “Pone un mat diki pa limpia pia na kada entrada di bo kas i limpia bo pianan dos biaha riba dje promé ku drenta paden.”