Observando Mundu

“Catibunan” di Barcu Djawe

“Dies di miles di nabegante riba barcunan comercial ta ser tratá manera catibu,” International Herald Tribune a comentá. Un raport dje Comision Internacional di Carga Marítimo a revelá cu e nabegantenan aki ta “ser someté na condicionnan insigur, demasiado ora di trabou, salario cu no ta ser pagá, falta di suficiente cuminda, violacion i sota.” Nabegantenan di algun tripulacion cu keha of busca yudansa di sindicato ta core riesgo di bai riba blacklist of di asta ser bentá den laman. E víctimanan principal dje “sclabitud moderno” aki ta bini for di paisnan den desaroyo. Debí na problemanan económico den nan pais natal, hopi di nan no tin niun otro manera pa haña entrada. Pues, segun e autor dje raport, nan ta resultá den un situacion den cua nan ta ‘vulnerabel, i hende ta estafá nan i horta nan.’

E “Secretonan di Naturalesa” Ta Bai Perdí

“NU [Nacionnan Uní] ta calculá cu te cu 90% dje idiomanan di mundu lo disparcé durante e siguiente siglo, i huntu cu nan tambe hopi conocimentu balioso di naturalesa,” segun un boletin dje agencia di noticia BBC. Idiomanan nativo hopi bes ta sirbi como mangasina di tradicion, cantica i cuenta cu ta pasa di generacion pa generacion, transmitiendo lesnan balioso tocante e medio ambiente local i su mundu di animal. Por ehempel, e pueblo turkana di nortwest Kenya pa hopi tempu a observá e comportacion di cierto paranan pa nan por a sa ki ora awaceru ta bai cai. Esaki ta yuda nan determiná ki ora pa planta. Si nan lenga disparcé, conocimentu di vários generacion lo bai perdí. Ya caba nan sa cu tin 234 idioma nativo cu a disparcé, i 2.500 mas ta peligrosamente cerca di disparcé. “Secretonan di naturalesa, scondí den cantica, cuenta, arte i obranan di man di pueblo nativo, por bai perdí pa semper,” segun e raport di NU, cu ta spierta cu como resultado lo por tin un aumento den fracaso di cosecha.

Ainda Nan Ta Preferá Papel

Mas cu 25 aña pasá, nan a predicí cu uso di papel lo baha segun cu computer ta bira mas comun den oficina i hende lo warda informacion electrónicamente. Sin embargo, demanda pa papel ta sigui subi. Segun e korant Vancouver Sun, ora ta trata dje tipo di papel cu ta ser usá den mashin di copia i di fax, na 1999 canadesnan a usa 25 porciento mas tantu cu nan a usa na 1992. Esei ta suma “66 liber (30 kilo) di papel pa aña pa cada canades, incluso mucha.” Un encuesta bou di trahadónan di oficina a mustra cu aunke hende na promé instante ta usa computer pa wak informacion, tog nan kier un copia riba papel. Mescos ta conta pa esnan cu tin computer na cas, segun e korant. Muchanan a bira e “principal consumidónan di papel,” ya cu nan kier print tur loke nan crea of mira riba computer.

E Menasa di Crímen Organisá

“Crímen organisá internacionalmente ta un menasa mas grandi awor pa e siguridad di hende comun cu guera.” Esei tabata segun e agencia di noticia France-Presses, un punto presentá na un conferencia recien tocante crímen transnacional. Papiando na e conferencia na Tokyo, e subsecretario general dje Oficina di NU pa Combatí Droga i Prevení Crímen, Pino Arlacchi a bisa: “E nivel i intensidad di crímen internacional a bai mas ayá di loke gobiernunan i e poblacion general ta prepará pa aceptá.” El a mencioná traficacion di hende como e crímen internacional cu ta creciendo mas lihé cu tur, i gruponan criminal ta pone cu rond di un miyon hende muher i mucha ta crusa frontera ilegalmente, generando ganashi inmenso pa nan. Bunmei Ibuki, ex-hefe di agencianan policial di Hapon a bisa: “No tin un solo pais cu por enfrentá crímen organisá transnacional riba su mes. Ta p’esei ta birando hopi esencial pa nos tin instancianan hudicial regional of mundial.”

Nos Basurero Espacial

For di tempu cu hende a cuminsá bai den espacio rond di 40 aña pasá, nan a combertí e region rond di tera den un basurero. Segun The News di Ciudad di México, hende a lansa casi 4.000 raket, creando “mas cu 23.000 obheto  espacial ‘observabel,’ cada un di nan mas grandi cu un bala di cricket.” Dje obhetonan aki, rond di 6.000 ta “basura,” i segun cálculo nan tin un peso combiná di 1.800 ton. Dor cu e obhetonan espacial ta dal den otro nan a producí un 100.000 pida mas chikitu. Aunke e obhetonan aki no ta forma un menasa pa tera, nan ta un menasa serio pa biahe espacial debí na nan velocidad. Un pida splenter di metal chikirititu cu ta move na un velocidad di 50.000 kilometer pa ora por sker bentana di un stacion espacial, habri un buracu den un panel solar of bora e bistí di un astronauta durante un caminata den espacio. “NASA ta trahando riba e Proyecto Orion, un ‘basora cósmico’ pa bari limpia shelu di basura,” segun The News. “E idea ta pa supla e basura cu laser, . . . pusha nan den e atmósfera mas haltu di Tera caminda nan lo mester kima na nada sin causa daño.”

Hende Sin Cas Ta Aumentá

“Den e Declaracion Universal di Derechonan Humano di 1948, NU a describí acceso na bibienda adecuá como esencial, pero, mas cu mei siglo despues, no tin niun garantia dje derecho riba un cas sigur,” segun e agencia di noticia BBC. Un raport recien di NU ta calculá cu 100 miyon hende rond mundu ta sin cas—incluso mas cu 30 miyon mucha—i ta spierta cu e situacion ta birando pió. Den paisnan den desaroyo, NU ta culpa principalmente urbanisacion rápido pa e problema. Ademas, den Zuidoost Asia i África, un 600 miyon hende ta biba den proyectonan di bibienda di mal calidad, sobrepoblá, sin riolering i awa adecuá. Paisnan mas ricu no ta immuun p’e problema. Na Merca, te cu 700.000 hende ta biba riba caya. Den algun parti di West Europa, 12 di cada 1.000 persona ta sin cas.

“Un Arte Cu Ta Muriendo”?

“Zakkenroller ta un arte cu ta muriendo na Osaka,” Hapon, debí cu “hóbennan no ta interesá mas den desaroyá e abilidad ei,” e korant Asahi Evening News ta informá. Segun un funcionario policial local, pa un hende bira apto den e tipo di ladronicia aki ta exigí vários aña di práctica. Pero ta parce cu criminalnan hóben ta preferá maneranan mas fácil pa horta. Por ehempel, casonan di rancamentu di tas ta aumentando drásticamente. Un tercera parti di tur sospechoso arestá como zakkenroller aña pasá na e warda di Osaka tabatin 60 aña bai ariba. Esun mas bieu, un homber di 78 aña, a ser arestá pa di 12 bes ora nan a gar’é ta horta un estuche di bril for di tas di un señora hende grandi. “Su bista tabata asina malu cu el a horta e estuche keriendo cu tabata un potmoni,” segun un investigadó.

Core Auto na Manera Ehemplar

“Mayornan mester ta conciente cu nan lo por ta sirbi como ehempel pa nan yunan tantu promé cu e yunan haña rijbewijs i ora e yunan ta siña core auto,” segun Susan Ferguson dje Instituto di Seguro pa Siguridad Riba Caretera. Manera a ser informá den e revista New Scientist, e cu su coleganan a controlá e registronan di accidente di 140.000 famia mericano, i a compará mayornan cu nan yunan di 18 pa 21 aña. Yunan di mayornan cu tabata den tres of mas accidente di auto den cincu aña tabatin 22 porciento mas chens di dal cu auto, cu yunan di mayornan cu no tabatin accidente. Mescos tabata e caso relacioná cu violacion di reglanan di tráfico manera core auto duru of pasa dor di lus corá. Den e casonan aki e muchanan tabatin 38 porciento mas chens di haci mescos cu nan mayornan. Segun Jane Eason dje Sociedad Británico pa Prevencion di Accidente: “Mayornan mester pone un bon ehempel. Nunca ta muchu trempan pa siña hende tocante siguridad riba caminda.”

“E Organismo Bibu Mas Grandi na Mundu”

“Gatiando pa gran parti invisibel dor dje mondi semper berde di Oregon, bo ta haña e organismo bibu mas grandi na mundu: un schimmel cu yama Armillaria ostoyae,” segun e revista National Wildlife. “E schimmel tin por lo ménos 2.400 aña i ta cubri mas cu 900 hectar—esta casi 1.700 veld di bala—segun científiconan asociá cu e Servicio Forestal di Merca cu a descubrié.” E schimmel ta biba bou di tera, e ta plama lentamente i hopi bes ta usa rais di palu pa pasa di un palu pa otro. Pero e schimmel tin un “banda negativo,” e specialistanan di mondi ta bisa. “Armillaria ta causa un malesa na rais di palu cua cu tempu por mata palu,” e revista ta informá.