Na Rand di Extincion

SAM, e gorila di tres aña riba e potret, su cara ta hopi tristu. Pero podisé esei no mester sorprendé nos. Yagdónan a mata su mama, i a lagu’e huérfano sin e posibilidad di bolbe den naturalesa. Desafortunadamente, djis un par di luna despues cu a saca e potret aki, Sam a muri di un problema respiratorio. Pero e no tabata e único gorila cu un futuro scur.

E destruccion implacabel di nan habitat natural a pone gorila riba e lista di especienan den peliger di extincion. I como cu na algun lugá nan ta mata gorila pa come, yagdó ekipá cu rifle moderno ta menasá e bestianan su sobrebibencia riba término largu. Aunke e futuro di gorila ta mustra scur, tin hopi otro especie cu nan futuro ta asta pió.

Un informe dje Union Internacional pa Conserbacion di Naturalesa i Recursonan Natural (UICN) ta pinta un cuadro scur dje estado cu gran parti di mundu su animalnan den naturalesa ta aden. Durante último añanan, mas especie ta den peliger di extincion, i e velocidad cu cua esei ta tumando lugá ta alarmante. UICN, un organisacion cu ta controlá e státus di miles di especie, a publicá recientemente su Lista Corá, diseñá pa aumentá concientisacion dje situacion penoso di animalnan den naturalesa cu ta den peliger di extincion riba nos planeta.

Casi un cuart di tur e mamíferonan na mundu i rond di un octavo parti di tur para ta ser menasá awor cu extincion. I esakinan ta solamente e especienan cu a ser documentá. E státus di conserbacion di mayoria especie riba nos planeta ta keda desconocí.

 Si e situacion trágico aki ta haci bo tristu, ta con nos Creador lo mester sinti? E ta declará den su Palabra, Bijbel: “Tur bestia di mondi ta di Mi.” (Salmo 50:10, Beibel Santu) Pues sigur e no ta indiferente pa loke ta e destruccion pa loco cu ta tumando lugá di su creacion. Den e buki di Revelacion, Dios ta sigurá nos cu lo e “causa e ruina di esnan cu ta ruinando e tera.”—Revelacion 11:18.

Dos dje tareanan urgente cu e Reino di Dios lo atendé ora ‘Dios haci tur cos nobo,’ lo ta di protehá tantu e animalnan den naturalesa como e planeta su medio ambiente delicado, di cua nos tur ta dependé.—Revelacion 21:5; Mateo 6:10.

[Kuadro/Plachi na página 16, 17]

 Tiger (Panthera tigris)

▪ Poblacion calculá den naturalesa: un 5.000 pa 7.500 (compará cu rond di 100.000 un siglo pasá)

▪ Menasanan principal: yagmentu ilegal, venenamentu, pérdida di habitat i isolacion dje poblacion di tiger

[Kuadro/Plachi na página 17]

Panda Gigante (Ailuropoda melanoleuca)

▪ Poblacion calculá den naturalesa: 1.000, loke ta hacié un dje mamíferonan mas scars na mundu

▪ Menasanan principal: reproduccion lento i destruccion di mondinan di bambu di ceru di cua e ta dependé pa cuminda

[Rekonosementu]

Foto: Zoo de la Casa de Campo, Madrid

[Kuadro/Plachi na página 17]

Orangutan (Pongo pygmaeus)

▪ Poblacion calculá den naturalesa: rond di 20.000

▪ Menasanan principal: candela di mondi, kapmentu di palu, yagmentu ilegal i contrabanda pa traficacion como bestia di cas

[Rekonosementu]

Foto: Zoo, Santillana del Mar, Cantabria, España

[Kuadro/Plachi na página 18]

Panda Chikitu (Corá) (Ailurus fulgens)

▪ Poblacion calculá den naturalesa: desconocí, pero ta parce cu e ta bahando debí cu hende ta destruyendo su habitat i nan reproduccion ta lento

▪ Menasanan principal: yagmentu ilegal, destruccion di mondinan di bambu di ceru i tounan cu ta come yerba

[Rekonosementu]

Foto: Zoo de la Casa de Campo, Madrid

[Kuadro/Plachi na página 18]

Macacu di Goeldi (Callimico goeldii)

▪ Poblacion calculá den naturalesa: desconocí (na 1904 numa nan a descubrí e macacu aki)

▪ Menasanan principal: destruccion dje selva di yobida di Amazona i tiki poblacion, loke por pone cu fácilmente nan ta bira isolá

[Rekonosementu]

Foto: Zoo, Santillana del Mar, Cantabria, España

[Kuadro/Plachi na página 18]

Chinese Kraanvogel (Grus japonensis)

▪ Poblacion calculá den naturalesa: rond di 2.000

▪ Menasanan principal: ta dal contra kabel di coriente, destruccion di lugá di brui i contaminacion

[Rekonosementu]

© 1986 Steve Kaufman