Berdadero Reforma Ta Posibel?

“Niun hende por forsa un otro ser humano pa rehabilitá. Cambio tin cu bini for di paden dje persona i di su boluntad.”—VIVIEN STERN, A SIN AGAINST THE FUTURE—IMPRISONMENT IN THE WORLD.

UN CLAVE vital pa berdadero reforma cerca prezunan ta enfocá riba educacion i un cambio den nan normanan i nan punto di bista. No tin duda cu tin personanan sincero ta haciendo esfuerso pa educá i yuda prezunan. Hopi prezu realmente ta apreciá e excelente trabou inegoista aki dje hendenan ei.

Tin hende kisas ta argumentá cu e sistema di prizon den su totalidad ta fuera di reforma i cu ta casi imposibel pa prezunan cambia den un ambiente asina. Aunke por ta cierto cu encarcelacion so no ta inculcá normanan nobo, instruccion bíblico a yuda algun prezu haci cambio den nan bida. Esaki ta ilustrá cu reforma ta posibel riba un base individual.

Awe, cu yudansa di Bijbel, tin detenido ta haci cambionan cu ta producí e forma di pensa i actua corecto. Den ki manera? Dor di haci caso dje conseho bíblico: “Stop di ser formá segun e sistema di cosnan aki, mas bien sea transformá dor di rehací boso mente, pa boso por proba pa boso mes loke ta e bon i aceptabel i perfecto boluntad di Dios.” (Romanonan 12:2) Con nan ta logra esaki?

 E Papel di Bijbel

Hopi hende ta haña cu religion por hunga un gran papel den yuda prezunan repentí di nan accionnan di ántes. Claro cu un problema básico di esaki ta cu cualkier cambio di caracter cu a tuma lugá ora e prezu tabata tras di trali kisas ta disparcé asina cu e sali liber. Un detenido a expres’é asin’akí: “Hopi hende ta haña Cristo den e lugá aki, pero ora nan sali liber, nan ta bai laga Cristo atras!”

Experencia a demostrá cu berdadero cambio tin cu sosodé di paden—den e mente i curason dje criminal—i cu e base mester ta repentimentu sincero pa malechonan di pasado. Un programa di educacion bíblico por yuda un persona haña sa con Dios ta mira maldad i di con e ta malu. Esaki por dun’é motibunan fuerte pakico e no kier sigui anda den tal caminda.

Testigonan di Jehova ta conduciendo un programa asina di educacion bíblico den vários prizon rond mundu, i cu resultadonan maraviyoso. (Wak página 10.) Un prezu a comentá: “Nan a yuda nos descubrí kico Bijbel ta bisa tocante e propósito di bida i e bendicionnan cu futuro ta contené pa humanidad.” I el a agregá: “Esei ta un educacion increibel!” Un otro detenido a remarcá: “Nos ta tumando decisionnan basá riba e conseho di Dios. . . . Nos ta mira cambionan den nos mes. Nos sa kico ta e prioridadnan di bida.”

Claro cu e necesidad di reforma ta extendé mas ayá cu e murayanan di prizon. E berdadero solucion pa e crísis di prizon ta sinta den eliminá e necesidad pa prizon. Un dje berdadnan glorioso di Bijbel cu a toca curason di masha hopi detenido ta ser expresá den e siguiente promesa di Dios: “Malechornan mes lo ser cortá afó . . . E hustunan mes lo poseé tera, i nan lo biba pa semper riba dje.”—Salmo 37:9, 29.

Ora esei tuma lugá, un gobiernu incoruptibel cu ta amoroso i a la bes firme lo soru pa hende cumpli cu Dios su normanan superior. E gobiernu ei ta Dios su reino celestial bou di Cristo, esun cu cristiannan a siña pidi p’e. (Mateo 6:10) Den e mundu nobo ei, tur habitante lo ser reformá dor di siña e leynan superior di Dios. Anto e ora ei manera nunca promé “tera sigur lo ta yená cu e conocimentu di Jehova mescos cu e awanan ta cubri laman.” (Isaías 11:9) Cu ki resultado? E habitantenan dje mundu nobo, hende cumplidó di ley, “berdaderamente . . . lo haña nan deleite exkisito den e abundancia di pas.”—Salmo 37:11.

 [Kuadro/Plachi na página 10]

Habriendo un Bentana di Speransa

Ministernan boluntario di Testigonan di Jehova tin mas cu 20 aña ta efectuá un programa educativo exitoso basá riba Bijbel den e prizon federal na Atlanta, Georgia, Merca. Durante e tempu ei, nan a yuda mas cu 40 detenido bira ministernan bautisá di Testigonan di Jehova, i mas cu 90 otro detenido tambe a beneficiá di studio regular di Bijbel.

Recientemente Spierta! a papia cu vários persona cu inegoistamente ta duna les di Bijbel den e prizon ei.

▪ Di con educacion bíblico ta asina eficas den motivá cierto detenidonan pa cambia nan bida?

David: Hopi prezu ta hende cu no a haña amor, ni sikiera durante nan infancia. Pues ora nan haña sa cu Dios ta stima nan i ora nan drama nan curason na dje den oracion i e contestá nan oracion, e ta bira real pa nan. Nan curason ta ser motivá pa nan, na nan turno, stim’é.

Ray: Nan a abusá di un dje detenidonan cu mi a studia cuné tempu e tabata mucha. Ora mi a puntr’é kico a atraé na Jehova, el a contestá cu ora bo siña e berdad di Bijbel, bo ta ripará cu Jehova realmente ta comprendé bo. Esaki a pone cu e kier a siña mas tocante e personalidad di un Dios amoroso asina.

▪ Tin hende ta bisa cu prezunan ta pega na religion pa motibunan scondí, sea pa reducí nan sentencia of djis pa mata tempu. Kico experencia a mustra boso?

Fred: Ora e detenidonan bini na nos studionan, nos no ta traha riba nan sintimentu. Simplemente nos ta studia Bijbel cu nan. Den corto tempu nan ta descubrí cu nos ta bai siña nan tocante Bijbel i cu esei ta e único cos cu nos ta haci. Mi a yega di haña algun cu ta bini cerca mi i ta pidi mi yuda nan cu nan caso den corte. Mi no ta papia tocante esei cu nan. Como resultado, esnan cu bini den e grupo di studio i keda einan pa un periodo di tempu, kier ègt siña loke Bijbel ta bisa.

Nick: Un cos cu mi ta ripará ta e cambionan cu algun detenido ta haci miéntras nan ta den prizon. Tin di nan a bira minister bautisá i a sufri hopi na man di otro detenidonan. Esei ta hopi duru pa nan. Nan lo no por a keda fiel bou dje circunstancianan ei si Bijbel no a ègt toca nan curason.

Israel: Por lo general, nan ta hende cu un deseo profundo di siña tocante Jehova, i nan ta expres’é den un manera conmovedor. Bo por mira cu esei ta sali di nan curason.

Joe: Esnan cu bira cristian berdadero ta esnan cu a realisá di con cos a bai robes den nan bida. Tambe nan ta comprendé cu tin speransa pa cambio, un bentana di speransa ta habri pa nan. Awor nan por anticipá sinceramente e cumplimentu di Jehova su promesanan pa futuro.

▪ Di con e sistema di prizon riba su so no por cambia criminal?

Joe: E propósito dje sistema penal no ta pa rehabilitá, sino pa tene criminalnan leu for dje resto di sociedad. Esei ta e esencia dje problema: e manera cu e sistema di prizon ta mira e hendenan aki.

Henry: E sistema di prizon no por cambia e curason di criminal. Mayoria dje hendenan aki ta bolbe bai ripití nan crímennan ora nan sali.

[Plachi na página 8, 9]

A yuda un cantidad di prezu siña conocé e berdad di Bijbel