Aunke Surdu i Ciegu, Tog Mi A Haña Siguridad

SEGUN E RELATO DI JANICE ADAMS

For di ora mi a nace mi tabata casi surdu i tog mi a siña anda den un mundu cu ta tende. Anto ora mi tabata na universidad mi a haña un shok ora nan a bisa mi cu lo mi bira ciegu. Mi consehero di scol cu bon intencion a duna mi un artículo tocante biba sin bista i sin oido. Mesora mi wowo a cai riba e frase cu a bisa cu esnan cu ta surdu i tambe ciegu ta e hendenan mas solitario na mundu. Mi a basha na yoramentu.

MI A nace na Des Moines, Iowa, Merca, dia 11 di juli 1954, único yu di Dale i Phyllis Den Hartog. Mi mayornan no a realisá cu ámbos tabata cargadó di un condicion genético conocí como síndrome di Usher, un malesa cu ta pone nan yunan nace surdu i cu pérdida progresivo di bista.

Na principio mi mayornan no a sospechá cu mi tabata falta algu. Kisas pasobra ainda mi por a tende algun zonido di frecuencia abou i tin bes mi tabata reaccioná riba zonido. Pero ora mi no a siña papia, nan tabata sa cu mi tin un problema serio. Finalmente, ora mi tabatin mas o ménos tres aña, dokter a diagnosticá cu mi ta surdu.

E noticia a destrosá mi mayornan. Sin embargo, nan tabata decididu pa mi haña e mihó educacion posibel. Nan a manda mi un kleuterschool excelente pa mucha cu no ta tende bon. Pero como cu mi tabata casi surdu, mi a fracasá teriblemente. Tin biaha mi tabata mustra mi frustracion dor di bati mi cabes contra muraya.

Mandá na un Scol Special

Mi mayornan a dicidí di interná mi den e Instituto Central pa Hende Surdu (CID), na St. Louis, Missouri. Apesar dje gran costo financiero i e dolor di curason di manda mi bai internat na edad di cincu aña, nan a pensa cu esaki ta mi mihó speransa pa por tin un bida felis i exitoso. N’e tempu ei ami cu mi mayornan realmente no por a comunicá.

Mi a wak Mama paketá mi pañanan den un baul. E biahe den auto a parce un eternidad. Na CID, mi ta corda con mi a mira otro mucha muhernan chikitu sin mama i a pensa den mi mes: ‘Ai, ami lo no tin cu keda aki pasobra ami tin un mama i tata.’ Ora a bira tempu pa mi mayornan bai, nan a purba splica mi cu nan lo bini bek den un par di luna. Mi a yora i yora i a tene duru na nan, pero e directora a ranca mi kita for di nan pa nan por a bai.

Mi a sinti mi bandoná. E promé anochi na e scol, mi so huntu cu e otro mucha muhernan, mi a purba consolá un mucha cu tabata yora dor di pretendé di papia cuné, aunke eigenlijk mi no por a papia e tempu ei. E directora a scual mi i a pone un scherm entre nos pa asina nos no purba comunicá. E muraya a keda einan djei padilanti. E isolacion tabata aplastante.

 Poco-poco mi a bin realisá cu nos tur tabata einan pasobra nos no por tende. Kisas mi mayornan a stima mi tog, pero mi a razoná cu tabata mi falta cu mi a fracasá na kleuterschool. Mi tabata decididu pa logra e biaha aki sí i bolbe cerca mi famia un dia.

E educacion na CID tabata excelente. Aunke nan no a permití nos usa idioma di seña, nan a duna nos hopi instruccion individual den lesamentu di lip i den papia. Tambe nan a duna tur e lesnan cu scolnan normal ta duna. Aunke mi ta kere cu e sistema oral so sin idioma di seña, no ta duna bon resultado cerca hopi mucha surdu, el a funcioná pa mi i mi a sinti mi exitoso. Usando aparato di oido, mi a siña con pa decifrá e movementunan di boca i e zonidonan dòf di abla di otro hende. Mayoria hende cu ta tende a cuminsá comprendé mi abla cu a bira mas mihó aunke ainda imperfecto. Mi mayornan i mi scol tabata sumamente satisfecho cu mi éxito. Pero tog, mi a anhelá di bai cas bek.

Tur vakansi grandi mi tabata roga mi mayornan pa laga mi keda cas i bai scol na Iowa, pero ainda no tabatin programanan local. Despues ora mi a bai scol bek, tur dia Mama tabata post un carta pa mi i a manda un bals den e carta. Mi tabata stima e bals ei mashá pasobra el a representá su amor pa mi. En bes di kou e bals, mi tabata spar cada un, i foral ora mi tabata sinti mi deprimí mi a atesorá nan.

Bek na Cas, Pero Ta Surgi Problema

Finalmente, ora mi tabatin dies aña, mi mayornan a trece mi cas bek. Mi tabata sinti mi asina contentu i sigur huntu cu mi famia! Mi a skirbi nomber na un scol special den Des Moines mes pa muchanan cu pérdida di oido. Cu tempu mi a pasa pa klasnan normal ya cu mi por a lesa lip basta bon i a desaroyá abla comprendibel. Sin embargo, mi situacion nobo tabatin hopi desafio.

N’e dormitorio di CID, mi a sinti cu mi pareunan surdu a aceptá mi. Pero awor cu mi mester a trata cu mas cu un persona a la bes, mi abilidad di lesa lip no tabata por cu e comunicacion rápido. Pues nan tabata laga mi afó. Anto mi tabata anhelá asina tantu pa nan aceptá mi!

Esaki a pone mi busca aprobacion di mucha hombernan tiener, loke a hinca mi den situacionnan comprometedor. I mi no tabata sa con pa bisa no. Ora mi tabatin 14 aña mi a ser violá; pero mi no a conta niun hende. Aunke mi mayornan semper tabata interesá i amoroso, mi a sinti mi isolá i perdí.

Usando mi aparato di oido, mi por a disfrutá un poco di música, pero e música cu mi a scoge tabata cuestionabel. Mi a scucha rock ácido (cu letra i zonido basá riba sensacionnan causá dor di uso di droga). I tambe mi a cuminsá usa marihuana regularmente i isolá mi mes mas i mas. Te ainda ta duel mi mashá ora mi wak bek riba e cosnan cu mi a haci durante e añanan turbulento ei i e dolor cu esei a causa mi famia i mi mes.

Intentonan pa Mehorá Mi Bida

Durante henter e periodo aki, mi tabatin un sed continuo pa siña i un deseo pa ta creativo. Mi a lesa constantemente, pinta, cose i borda. Mi kier a saca mas for di mi bida cu djis e futuro cu tabata warda mi amigunan kende nan cabes tabata solamente den droga. P’esei mi a inscribí na un universidad normal cerca di cas pa cultivá mi interes den arte. Rond dje tempu aki mi a dicidí di siña idioma di seña ya cu mi a sinti mi frustrá di ta ser lagá afó socialmente.

Cu tempu mi a transferí pa e Instituto Técnico Nacional pa Hende Surdu na Rochester, New York, pa gradua den arte di cerámica. Aunke progresivamente mi bista tabata empeorá—un echo cu di un manera of otro mi a nenga di admití—tog mi a sinti cu mi bida tabata bayendo den e bon direccion. Pero e ora ei mi consehero di scol a pone mi enfrentá realidad dor di bisa mi cu pronto lo mi bira ciegu.

 E institucion no tabata ekipá pa atendé mi necesidadnan, i mi tabatin cu bai. Kico lo mi a haci awor? Aunke tristu dor dje prospecto cu pronto lo mi bira ciegu, mi tabata decididu pa haña un manera pa biba independiente i pa mi no bira manera e artículo cu e consehero a duna mi a bisa, esta, ‘un dje hendenan mas solitario na mundu.’ Mi a bai cas bek na Iowa pa siña lesa braille i siña usa un garoti pa move cuné.

Mi Ta Muda pa Washington, D.C.

Universidad Gallaudet na Washington, D.C., e único universidad na mundu di arte liberal pa hende surdu, tabatin servicio specialisá pa studiantenan surdu-ciegu. Mi a transferí pa einan i a gradua cu puntonan di onor na 1979. Un biaha mas, mi a sinti mi bon cu mi por a logra riba tereno académico.

Sin embargo, ainda mi a sinti mi socialmente isolá for di mi pareunan. Perdiendo mi bista, mi a siña idioma di seña net na tempu pa sinti como si fuera mi a pertenecé na un grupo, e comunidad di hende surdu. E idioma di seña cu ami ta usa ta mescos cu esun cu hende surdu ta usa. Pero dor cu mi tin cu pone mi mannan riba esnan di hende surdu pa mi comprendé nan, algun hende surdu a evitá mi pasobra nan a sinti nan mes incómodo cu esei. Mi a cuminsá puntra mi mes si un dia lo mi haña un comunidad cu realmente ta aceptá mi.

En Busca dje Religion Berdadero

Religion no a duna mi consuelo tempu mi tabata creciendo. I maske mi a tuma un les di religion na universidad, nunca mi no a haña contesta pa e tantísimo preguntanan cu mi tabatin. Despues di a gradua for di universidad, mi a sigui busca contesta. Durante e tempu ei mi tabata infelis cu mi relacionnan cu hende, pues mi a cuminsá haci oracion na Dios pa e guiá mi.

Na 1981 mi a muda bek pa Universidad Gallaudet pa haña mi ‘master’ como consehero di rehabilitacion. Mi a sigui resa pidi Dios yuda mi haña e iglesia corecto. Vários hende a ofrecé pa hiba mi nan iglesia, pero pa un motibu of otro nunca nan no a cumpli cu esei. Anto mi a topa Bill, kende ta tende normal i tambe tabata bai universidad pa su master. Pa casualidad el a descubrí cu mi tabatin mésun interes cuné den Bijbel, i el a bisa mi cu e ta siñando tur sorto di cos asombroso cerca Testigonan di Jehova.

Mi promé impresion tabata cu Testigonan di Jehova ta un tipo di culto hudiu, un opinion cu mi a ripará cu hopi hende surdu tin. Bill a sigurá mi cu no tabata asina, i el a bisa cu e mihó manera pa haña sa tocante nan lo ta dor di bishitá nan reunionnan. Di berdad mi no kier a bai, pero mi a corda mi oracion. Cu mala gana mi a bisa sí, cu e condicion cu nos ta sinta den e último rij, ya nos por core bai si nan pone cualkier preshon riba nos.

Mi A Sinti Mi na Cas

Mi tabata masha nervioso ora nos tabata riba caminda pa e reunion. Nos tur dos a bisti jeans cu flanel. Mi tabata contentu cu nos a yega un poco lat ya asina nos no tabatin cu trata cu niun hende promé cu reunion. Cu seña Bill a transmití en detaye tur loke mi no por a mira ni tende. Aunke mi no por a comprendé bon-bon kico tabata pasando, dos cos a impresioná mi: E orador a usa Bijbel cu frecuencia, i e muchanan, kendenan tabata sintá banda di nan mayornan, a participá activamente den e reunion. Despues dje reunion, leu di ser preshoná, nan a duna nos un caluroso bon biní, apesar di nos bistí i antecedente racial distinto.

Nos tabata e único dos hende blancu den e Salon di Reino. Aunke mi no tabata conciente di tin prehuicio contra hende color scur, na principio mi tabata sinti mi incómodo einan. Sin embargo, e mensahe dje berdad bíblico tabata muchu persuasivo pa mi laga incomodidad stroba mi. Nos a cuminsá asistí regularmente na reunion. Loke tabata mas  difícil pa mi ta cu no tabatin niun hende surdu den e congregacion ei. P’esei ora nos a tende tocante un otro congregacion na cua algun hende surdu ta asistí, nos a cuminsá bai einan. Atrobe, n’e congregacion nobo aki nos tabata e único hendenan blancu presente. Sin embargo, nan a laga nos sinti mashá na cas.

Nos a aceptá un oferta pa studia Bijbel. Por fin mi tabata haña contesta riba mi preguntanan. No ta tur biaha mi tabata comprendé e contestanan mesora, pero nan tabata basá riba Bijbel. Haciendo mas investigacion i meditacion, mi a capta cu tempu e sentido di berdadnan bíblico. Pa promé biaha den mi bida, mi a sinti mi cerca di Jehova como e Dios berdadero. Na mésun tempu, ami cu Bill a bira bon amigu. Mi tabata sa cu e gusta mi, pero mi a keda sorprendí ora el a pidi mi pa casa cuné. Felis, mi a bisa sí. Bill a bautisá djis despues cu nos a casa i ami a siguié un par di luna despues, dia 26 di februari 1983.

Hañando e Siguridad Cu Mi Tabata Busca

Na principio mi tabatin miedu di keda isolá dor cu nos congregacion tabatin solamente dos otro hende surdu i nan no tabata bon den comunicá cu un persona surdu i tambe ciegu. Mi a sinti cu nos congregacion tabata amoroso i caluroso, pero tog na principio mi no por a comunicá cu nan directamente. Esaki a haci mi tristu. Hopi bes mi a sinti mi desanimá i solitario. Sin embargo, un acto di bondad di parti di un of otro ruman spiritual tabata toca mi curason i lanta mi ánimo. Tambe Bill tabata animá mi pa persistí den mi ministerio i pidi Jehova den oracion pa laga mas hende surdu cuminsá asociá cu e congregacion.

Mi a dicidí di busca un cachó pa guia hende ciegu, ya asina mi por ta mas independiente. E cachó a yuda tambe pa eliminá mi sintimentu di isolacion. Ora Bill tabata na trabou, ami por a cana bai Salon di Reino pa reuní cu e grupo cu ta sali den e ministerio cristian. Den transcurso di añanan mi tabatin cuater cachó di guia, i cada un tabata manera un miembro di famia.

Aunke un cachó di guia tabata útil, mi tabata anhelá mas contacto humano. Cu tempu, Jehova a bendicioná nos esfuerso pa desaroyá interes pa studio di Bijbel cerca hende surdu. E interes a crece te cu a forma un congregacion di idioma di seña na Washington, D.C. Por fin mi por a comunicá cu tur miembro dje congregacion!

Bill a cualificá pa sirbi como anciano i a ser nombrá como superintendente presidente dje congregacion di idioma di seña. Mi a haña gran placer den conducí studio di Bijbel cu otro hende surdu of surdu-ciegu, i awor vários di nan ta sirbiendo Jehova fielmente. Tambe mi a duna les di idioma di seña na rumannan muher cu ta tende pa asina nan por ta mas eficas den e ministerio di hende surdu.

Un Tempu di Prueba

Na 1992 mi a ser aplastá pa un depresion pisá cu tabatin di haber cu e abusu cu mi a sufri como hóben. Pa un par di aña casi mi no por a funcioná. Mi a sinti mi incapacitá—no dor cu mi ta surdu of ciegu—sino dor dje perturbacion emocional intenso cu mi tabata sinti. Hopi biaha mi a pensa cu mi no por soportá pa bai reunion of sali den e ministerio, i mi tabata roga Jehova p’e duna mi forsa pa mantené mi integridad. Como resultado, masha poco bes mi a falta reunion, i mi a keda regular den mi ministerio durante e añanan scur ei.—Mateo 6:33.

Na 1994 nos a muda pa Vancouver, British Columbia, Cánada, pa yuda forma un otro congregacion di idioma di seña. E mudansa ei no tabata fácil. Mi a laga atras un stad conocí cu hopi amigu stimá. Maske e tempu ei ainda mi no a superá e depresion i ansiedad, e goso di mira un congregacion nobo ser formá na Vancouver a haci cu tur e sacrificionan tabata bale la pena. Mi a haña amigunan stimá  den e congregacion nobo, di manera cu despues mi a sinti mi na cas.

Bendicioná dor di Nos Tata Amoroso

Na 1999 ami cu mi casá huntu cu dos otro Testigo a bishitá Haiti pa seis siman pa yuda den e ministerio di hende surdu. Trahando den cooperacion cu e oficina di sucursal di Testigonan di Jehova einan, nos a duna les di idioma di seña na miembronan dje congregacion i a predicá cu nan den e teritorio di hende surdu, un teritorio relativamente bírgen. Den un par di siman, nos a cuminsá mas cu 30 studio di Bijbel cu hende surdu interesá! Mi a regresá cas cu un vigor spiritual renobá i a cuminsá den e ministerio di tempu completo como pionero na september 1999. Cu yudansa di Jehova, di mi kerido casá i un congregacion cu ta apoyá mi, atakenan di depresion no a kita mi goso.

Atrabes di añanan, mi a experenciá ki tierno di cariño Jehova ta. (Santiago 5:11) E ta soru pa henter su pueblo, pero foral pa esnan cu necesidadnan special. Mediante su organisacion, mi a logra ricibí e Traduccion di Mundu Nobo dje Santu Scritura huntu cu hopi otro yudansa pa studia Bijbel na braille. Mi ta disfrutá di congreso i asambleanan na idioma di seña. E congregacion ta apoyá mi cu amor comunicando tur cos cu seña den mi mannan, ya asina mi ta ser incluí plenamente den tur reunion. Apesar di tin un dòbel desabilidad, mi a haña siguridad den e pueblo di Jehova. Mi no ta ricibí so, sino mi por duna tambe, i esaki ta duna mi gran goso.—Echonan 20:35.

Mi ta anticipá e dia cu lo mi recuperá tantu mi oido como mi bista den Jehova su mundu nobo. Miéntras tantu, mi no ta un dje hendenan mas solitario na mundu, mas bien mi tin un famia mundial di miyones di ruman spiritual. Tur esaki danki na Jehova, kende a primintí cu di ningun manera lo e bandoná mi ni di ningun manera desampará mi. Sí, apesar di tur e desafionan, mi por bisa: “Jehova ta mi yudante; lo mi no tin miedu.”—Hebreonan 13:5, 6.

[Plachi na página 23]

Haciendo seña den mi mannan

[Plachi na página 23]

Huntu cu mi casá Bill, awe