Protehando Djente Delicado

NA KI edad bo djentenan a cuminsá desaroyá? Kisas lo bo keda sorprendí di sa cu e proceso a cuminsá miéntras ainda bo tabata den matris, probablemente promé cu bo mama tabata sa mes cu e ta na estado! Pues anto ta importante pa un mama na estado haña un suministro adecuá di nutricion, incluso calcio, fósfor, proteina i vitamina.

Kico di yunan recien nací? Expertonan ta bisa cu foral babynan cu ta bebe botter tin hopi chens cu nan djentenan ta putri, por lo general cuminsando cu e djentenan dilanti ariba. Pero con esaki ta sosodé? Tin baby cu normalmente ta pega soño chupando nan botter cu lechi, djus, awa cu sucu of limonada. E líkidonan aki cu ta fermentá ta contené carbohidrato den cua bacteria ta bona. Na su turno, e bacteria ta producí ácido cu por daña e djentenan di baby, foral si e ácido keda den contacto cu e djentenan durante henter anochi. Tin baby cu djente hopi putrí ta perde nan djentenan promé cu tempu, loke por afectá e desaroyo di nan djentenan permanente.

Con mayornan por protehá nan baby su djentenan delicado? Ta ser recomendá pa duna yu pechu, foral dor cu e lechi di mama ta steril i cu hopi anticurpa. Sin embargo, si ta usa botter, expertonan ta bisa cu mester stop di us’é despues cu e baby tin 18 luna. Tambe nan ta recomendá mashá pa usa botter solamente pa duna cuminda, i no como chupon. Ademas, si ta pone e baby den cama pa drumi cu botter, lo ta mihó si e tin awa so aden. Despues di cada bes cu e baby a come, por usa un paña suave i limpi pa limpia e baby su djentenan.

Por prevení putrimentu trempan di djente. Cuido dental apropiado—sí, asta pa un baby—ta esencial!