E Elementonan A Bin na Existencia pa Casualidad?

“TUR obheto den Universo, asta e strea di mas leu, ta consistí di atom,” segun The Encyclopedia of Stars & Atoms. Atomnan individual ta muchu chikitu pa bo mira, pero paketá huntu nan ta forma elementonan kímico conocí. Algun dje elementonan aki ta materia sólido cu nos por mira, otronan ta gasnan invisibel. Casualidad por splica existencia di tur e elementonan kímico ei?

Elementonan 1 pa 92

Aunke hidrógeno (waterstof) ta e atom di mas simpel, e ta duna streanan manera nos solo, combustibel cu ta esencial pa bida. Un atom di hidrógeno tin un proton den su núcleo i un electron ta move rond dje núcleo ei. Otro elementonan kímico, manera carbon (koolstof), oxígeno, oro i mercurio, ta consistí di atomnan cu hopi electron ta move rond di un núcleo di hopi proton i neutron.

Un 450 aña pasá, hende tabata conocé solamente 12 elemento kímico. Segun cu científiconan tabata descubrí mas elemento, nan a ripará cu e elementonan tin un órden natural. I ora a pone e elementonan den un tabèl di rij cu columna, científiconan a descubrí cu e elementonan cu tabata den e mésun columna tabatin característicanan similar. Pero tambe tabatin buracu den e tabèl, loke a representá elementonan desconocí. Esaki a pone e científico ruso Dmitry Mendeleyev predicí existencia di germanio, e elemento cu number di atom 32, i tambe predicí su color, peso, densidad i e temperatura cu e ta dirti. Mendeleyev su “prediccion tocante otro elementonan cu tabata falta—galio i scandio—tambe a resultá di ta masha exacto,” segun e buki di instruccion científico di 1995 Chemistry.

Cu tempu, científiconan a predicí existencia di otro elementonan desconocí i algun di nan característicanan. Al final nan a descubrí tur e elementonan cu tabata falta. No tin ningun buracu mas den e tabèl. E órden natural dje elementonan ta basá riba e cantidad di proton den e núcleo di atom di cada elemento, cuminsando cu elemento number 1, hidrógeno, i siguiendo te cu e último elemento cu generalmente ta aparecé den naturalesa riba tera, number 92, uranio. Esaki ta djis un coincidencia?

Considerá tambe e variedad ricu di elementonan kímico. Oro i mercurio ta elementonan cu color briyante distintivo. Unu ta sólido, i e otro ta líkido. Sin embargo, nan ta sigui otro como elemento 79 i 80. Un atom di oro tin 79 electron, 79 proton i 118 neutron. Un atom di mercurio tin solamente un electron mas,  un proton mas, i aproximadamente e mésun cantidad di neutron.

Ta puru casualidad cu un cambio chikitu den e areglo dje partículanan di atom ta producí un variedad asina ricu di elemento? I kico dje forsanan cu ta tene e partículanan di atom huntu? “For di su partícula mas chikitu te na su galaxia di mas grandi, tur cos den Universo ta sigui reglanan describí pa leynan di física,” segun The Encyclopedia of Stars & Atoms. Imaginá bo kico lo pasa si mester cambia un dje reglanan ei. Por ehempel, kico si haci un ahuste den e forsa cu ta pone e electronnan sigui move rond dje núcleo di un atom?

Forsa Físico Ta Precisamente Ahustá

Considerá e consecuencianan si e forsa electromagnético lo mester bira débil. “Electron lo no ta mará mas na atom,” dr. David Block ta comentá den su buki Star Watch. Kico precis esei lo nificá? “Nos lo tin un universo caminda reaccionnan kímico lo no ta posibel!” e ta agregá. Ki gradicidu nos por ta pa e leynan fiho cu ta haci reaccionnan kímico posibel! Por ehempel, dos atom di hidrógeno ta combiná cu un atom di oxígeno pa forma un molekuul di awa balioso.

E forsa electromagnético ta mas o ménos 100 bes mas débil cu e forsa nuclear fuerte cu ta tene e núcleo di atomnan huntu. Kico lo pasa si cambia e relacion aki? “Si e potencia relativo di forsanan nuclear i electromagnético lo mester tabata un tiki diferente, e ora ei atomnan di carbon lo no por a existí,” e científiconan John Barrow i Frank Tipler ta splica. Sin carbon, lo no tabatin bida. Atomnan di carbon ta representá 20 porciento dje peso di tur organismo bibiente.

Loke tambe ta crucial ta e potencia dje forsa electromagnético na comparacion cu e forsa di gravedad. E revista New Scientist ta splica cu “e cambio di mas chikitu den e potencia relativo dje forsanan di gravedad i electromagnético, lo combertí streanan manera Solo den gigantenan blou [demasiado cayente pa bida] of enanonan corá [no suficiente cayente pa sostené bida].”

Tin un otro forsa cu ta controlá e velocidad di reaccionnan nuclear den solo, e forsa nuclear débil. “E ta net suficiente débil di manera cu hidrógeno den solo ta kima na un velocidad lento i continuo,” e físico Freeman Dyson ta splica. Nos lo por duna hopi otro ehempel pa mustra con nos bida ta dependé dje leynan i condicionnan cuidadosamente balansá cu bo ta haña den universo. Escritor científico profesor Paul Davies a compará e leynan i condicionnan universal aki cu un set di konopi i a bisa: “Ta parce como si fuera mester ahustá e diferente konopinan cu un enorme precision pa universo por ta di tal manera cu bida por florecé.”

Hopi tempu promé cu Sir Isaac Newton a descubrí e ley di gravedad, Bijbel a referí n’e leynan i reglanan fiho ei. A puntra e homber Job: “Ta abo a proclamá e reglanan cu ta goberná shelu, of determiná e leynan di naturalesa riba tera?” (Job 38:33, The New English Bible) Otro preguntanan cu ta haci hende humilde ta: “Unda bo tabata ora mi a funda tera?” i: “Ken a fiha su midínan, si acaso bo sa?”—Job 38:4, 5.

[Kuadro na página 6]

ELEMENTONAN VITAL

E elementonan kímico, hidrógeno, oxígeno i carbon (waterstof, zuurstof i koolstof) ta forma 98 porciento dje atomnan di bo curpa. Caba ta bini nitrógeno (stikstof), cu ta forma un 1,4 porciento mas. Tin otro elementonan tambe den cantidadnan masha chikitu mes, pero tog nan ta vital pa bida.

[Tabèl/Diagram na página 6, 7]

(Pa e teksto den su formato kompleto, wak e publikashon)

Na publicacion dje artículo aki, científiconan a producí elemento 93 i mas grandi, yegando te cu elemento 118. Manera por a spera, e elementonan aki ainda ta cuadra cu e patronchi dje sistema periódico.

[Rekonosementu]

Fuente: Los Alamos National Laboratory

Nomber di elemento Símbolo Number di atom (cantidad di proton)

hidrógeno H 1

 helio He 2

litio Li 3

berilio Be 4

boro B 5

carbon C 6

nitrógeno N 7

oxígeno O 8

flúor F 9

neon Ne 10

sodio Na 11

magnesia Mg 12

aluminio Al 13

silicio Si 14

fósforo P 15

swafel S 16

chloor Cl 17

argon Ar 18

potasio K 19

calcio Ca 20

scandio Sc 21

titanio Ti 22

vanadio V 23

cromo Cr 24

mangan Mn 25

heru Fe 26

cobalt Co 27

nikel Ni 28

koper Cu 29

zink Zn 30

galio Ga 31

germanio Ge 32

arsénico As 33

selenio Se 34

bromo Br 35

kripton Kr 36

rubidio Rb 37

stroncio Sr 38

itrio Y 39

zirconio Zr 40

niobio Nb 41

molibdeno Mo 42

tecnecio Tc 43

rutenio Ru 44

rodio Rh 45

paladio Pd 46

plata Ag 47

cadmio Cd 48

indio In 49

staña Sn 50

antimonio Sb 51

telurio Te 52

yodo I 53

xenon Xe 54

cesio Cs 55

bario Ba 56

lantano La 57

cerio Ce 58

praseodimio Pr 59

neodimio Nd 60

promecio Pm 61

samario Sm 62

europio Eu 63

gadolinio Gd 64

terbio Tb 65

disprosio Dy 66

holmio Ho 67

erbio Er 68

tulio Tm 69

iterbio Yb 70

lutecio Lu 71

hafnio Hf 72

tantalio Ta 73

wolfram W 74

renio Re 75

osmio Os 76

iridio Ir 77

platina Pt 78

oro Au 79

mercurio Hg 80

talio Tl 81

chumbu Pb 82

bismut Bi 83

polonio Po 84

astat At 85

radon Rn 86

francio Fr 87

radio Ra 88

actinio Ac 89

torio Th 90

protactinio Pa 91

uranio U 92

neptunio Np 93

plutonio Pu 94

americio Am 95

curio Cm 96

berkelio Bk 97

californio Cf 98

einsteinio Es 99

fermio Fm 100

mendelevio Md 101

nobelio No 102

lawrencio Lr 103

rutherfordio Rf 104

dubnio Db 105

seaborgio Sg 106

bohrio Bh 107

hasio Hs 108

meitnerio Mt 109

110

111

112

114

116

118

[Diagram]

(Pa e teksto den su formato kompleto, wak e publikashon)

E órden i armonia dje elementonan den e sistema periódico ta reflehá simpel casualidad of diseño inteligente?

Atom dihelio

Electron

Proton

Neutron

[Diagram/Plachi na página 7]

(Pa e teksto den su formato kompleto, wak e publikashon)

Con e cuater forsanan físico a ser ahustá precisamente?

ELECTROMAGNETISMO

FORSA NUCLEAR FUERTE

GRAVEDAD

FORSA NUCLEAR DÉBIL

Molekuul di awa

Núcleo di atom

Gigante blou

Enano corá

Solo