Hóbennan Sa Puntra . . .

Di Con Mi Ta Asina Flacu?

JUSTIN ta delegá i den bon condicion, pero tog no completamente contentu cu su curpa. “Mi ta purbando di subi mi peso,” e ta admití. P’esei su dieta actual ta consistí di cincu cuminda pa dia, loke ta forma un total di 4.000 caloria. Sin embargo, e kier pa e peso extra ta músculo sólido. P’esei e ta agregá: “Cierto dianan promé cu trabou, ami cu un amigu ta lanta mainta trempan i bai gym huntu pa hisa peso.”

Vanessa tambe ta un tiki flacu. Pero e ta basta satisfecho cu su peso. “Tempu mi tabata mas yong, muchanan tabata tenta mi i yama mi flacu manera stoki,” Vanessa ta corda. “Pero awor mi no ta wori cu esei mas. Mi ta gewoon aceptá mi mes manera mi ta.”

‘Aceptá bo mes manera bo ta.’ Esei ta parce bon conseho. Pero kisas bo ta hañ’é un conseho difícil pa aplicá. Como tiener, por ta bo ta den “e flor di hubentud.” (1 Corintionan 7:36) Foral e periodo di pubertad, conocí como e periodo di cambio físico rápido, ta masha turbulento. Durante pubertad, partinan di bo curpa kisas ta crece na velocidad distinto; bo brasa, pia i rasgonan di cara talbes ta parce completamente for di proporcion. * Esaki por laga bo sinti incómodo i inatractivo. Anto tambe tin e echo cu no ta tur hóben ta desaroyá na mésun velocidad. Pues por ta cu miéntras algun di bo pareunan a desaroyá un curpa muscular of un figura femenino, abo ainda ta parce flacu compará cu nan.

Aunke hopi a ser bisá di hóbennan cu ta sinti cu nan tin peso di mas, hopi bes ta pasa por haltu dje hóbennan cu ta sinti cu nan ta muchu flacu. Esaki por ta e caso foral cerca cierto gruponan étnico i den algun pais caminda nan no ta considerá hende flacu bunita. Den regionnan asina, un mucha muher delegá por sufri hopi ya cu nan ta tent’é sin misericordia pasobra e ta “flacu.”

Kico di mucha homber? Segun investigadó Susan Bordo, “estudionan cu nan a haci den décadanan promé cu añanan ’80 en cuanto con hende muher ta considerá nan curpa, a indicá cu ora hende muher wak den spiel,  nan a mira defecto so.” I hende homber? Bordo ta sigui bisa: “Hende homber a wak den spiel i a mira sea un aparencia cu tabata OK of unu cu tabata mas bon di loke e ta en realidad.” Pero den último añanan esei a cuminsá cambia. Remarcando cu mas cu un cuart dje pashentnan di cirugia cosmético ta hende homber, Bordo ta asociá e actual aumento di interes cerca yoncumannan pa nan tin un bon condicion, cu e curpanan masculino “perfecto” cu nan ta mustra den propaganda pa paña djabou na Merca i na otro paisnan occidental. Claro cu esaki tabatin un impacto riba mucha hombernan tiener. Podisé nan ta sinti nan mes inadecuá si nan no tin e curpa muscular dje modelonan masculino ei.

Pues si bo ta flacu, kisas bo ta haña bo ta puntra bo mes: ‘Kico falta mi?’ E bon noticia ta cu probablemente nada no falta bo.

Di Con Bo Ta Flacu

Pa hopi hóben ta masha normal cu nan ta flacu. Hopi bes esei ta djis un efecto secundario dje aumento den crecementu i e metabolismo rápido cu ta bini cu adolesencia. Por lo general bo metabolismo lo baha segun bo ta bira mas bieu. Sin embargo, si bo ta hopi-hopi flacu apesar di ta come bon, lo ta bon pa bai bo dokter pa asina excluí cualkier problema di salú, manera diabétis, cu por causa pérdida di peso.

Steven Levenkron, un experto renombrá riba tereno di trastorno di come, a conta Spierta!: “Mi ta corda un mucha muher cu tabata hopi bou di peso cu nan a manda cerca mi bisando cu e tin anorexia, i di berdad e tabata parce un hende cu tin un trastorno di come. Pero no a tarda muchu cu mi a realisá cu su problema tabata físico, no sicológico. Su dokter di cas no a ripará cu e tabatin e malesa di Crohn, un malesa serio di tripa. E fayo ei lo por tabata fatal p’e mucha muher aki.” Si bo tin diabétis of cualkier otro malesa cu ta pone bo perde peso, ta sabí pa bo haci precis loke bo dokter consehá bo.

Claro cu tin biaha ser flacu por ta un síntoma di angustia emocional. Den su buki Anatomy of Anorexia, dr. Levenkron ta mencioná cu hopi investigadó ta bisa cu un cantidad significante “di diabético cu ta dependé di insulina tin trastorno di come, cu ta varia for di comementu di mas obsesivo pa bulimia te na anorexia.” Un dokter cualificá por determiná si ta trata di un dje trastornonan ei di come. *

Sugerencianan Práctico

Laga nos asumí cu bo a bai dokter i cu bo ta flacu pero salú. Kico awor? Na Job 8:11, Bijbel ta bisa: “Papiro lo crece bira haltu sin un moeras? Caña lo crece bira grandi sin awa?” Mescos cu un mata ta bona ora e tin e ambiente i nutricion corecto, asina bo tambe tin mester di un dieta balansá pa bo por desaroyá bira un adulto sano. Esaki ta importante, sea bo ta purbando di subi of perde peso.

Pero no sea tentá pa cuminsá come hopi cuminda vet pa asina bo peso subi mas lihé. Ora Susan Kleiner, un experto di nutricion, a studia e dieta di training di bodybuilder, el a ripará cu nan tabata come 6.000 caloria pa dia! Pero segun Kleiner, “e descubrimentu preocupante dje estudio aki tabata cu nan a come, como promedio, mas cu 200 gram di vet pa dia. Esei ta casi mes tantu vet cu mitar paki grandi di manteca! Riba término corticu, esei ta suficiente vet pa haci mayoria hende malu. Si come esei regularmente, cu tempu un cantidad grandi asina di vet lo hiba na malesa di curason.”

Segun e Departamento di Agricultura di Merca (USDA), e base pa un dieta balansá ta consistí di carbohidrato manera pan, cereal, aros i pasta. E siguiente cos importante ta berdura i fruta. USDA ta recomendá pa come solamente cantidadnan moderá di carni i di productonan trahá di lechi.

Pa bo por controlá kico i cuantu bo ta come, bo por purba tene un diario di cuminda. Pa un siman largu cana cu un notebook  chikitu, i haci nota di tur loke bo come i ki ora. Kisas lo sorprendé bo ora bo ripará cu bo no ta come dje hopi manera bo ta pensa, foral si semper bo ta purá. Como un tiener activo, fácilmente bo ta kima 3.000 caloria of mas pa dia! Kisas lo bo ripará cu bo dieta no ta dje balansá ei manera e mester ta, cu e tin demasiado ‘fast food’ manera hamburger i pizza i no suficiente fruta i berdura.

Ke tal di píldoranan caru manera di proteina of di amino ácido? Por ta nan no ta necesario. Hopi experto ta kere cu bo por haña tur e nutricion cu bo curpa mester dor di come cuminda saludabel. Mas cu tur cos, evitá solucionnan fácil i rápido manera steroidnan anabólico. Lamentablemente, maluso di steroid no ta un problema cerca mucha homber tiener so. The New York Times ta informá: “E aumento den uso [di steroid] cerca mucha muher, cu algun investigadó ta atribuí pa un parti na un tipo di anorexia contrali, a alcansá nivelnan cu mucha hombernan a cuminsá establecé den añanan ’80.” Un cantidad spantoso di 175.000 mucha muher tiener na Merca ta admití cu nan ta usa steroid anabólico. Expertonan ta relacioná e remedi aki cu un cantidad di efectonan secundario trágico, entre otro, cabei indeseá den cara, iregularidad cu menstruacion i cancer di pechu cerca hende muher, cancer di prostat cerca hende homber, i ader verstop i cancer di higra cerca tantu hende homber como hende muher. Nunca bo no mag usa steroid sin ta cu recept i bou di guia di un dokter.

Ser Modesto i Realístico

Bijbel ta bisa nos pa ta ‘modesto canando cu nos Dios.’ (Mikéas 6:8) Modestia ta encerá ser conciente di bo propio limitacionnan. Modestia lo yuda bo ser realístico tocante bo aparencia. No, no tin nada malu den kier luci bon. Pero ser obsesioná cu bo aparencia no ta beneficiá niun hende, cu excepcion kisas dje industria di moda i di dieta. Expertonan di bon condicion di curpa ta di acuerdo cu un hende homber normal no tin e genenan corecto p’e ta un bodybuilder di primera clase, sin importá con bon e ta come of cuantu e ta train. Si bo ta un mucha muher, por ta bo curpa no ta yena, ni maske cuantu bo come.

Ta interesante cu un poco atencion n’e pañanan cu bo ta bisti por haci hopi pa contrarestá loke abo kisas ta considerá imperfeccionnan físico. Evitá pañanan cu innecesariamente ta accentuá e aspectonan ei di bo figura. Tin hende ta sugerí pa bisti paña color cla, ya cu colornan scur tin tendencia di haci hende flacu parce mas flacu.

Corda tambe cu bo personalidad ta hopi mas importante cu bo aparencia. A lo largu, un sonrisa placentero i un comportacion bondadoso lo contribuí mas na haci bo atractivo pa otro hende cu músculonan visibel of cierto size di paña. Si bo amigunan constant ta rebahá bo dor di bo aparencia, busca hende cu ta balorá bo pa loke bo ta di paden, pa loke Bijbel ta yama “e persona secreto di curason.” (1 Pedro 3:4) Finalmente, no lubidá nunca cu “simpel hende ta mira loke ta parce na bista; pero en cuanto Jehova, e ta mira loke e curason ta.”—1 Samuel 16:7.

[Nota]

[Plachinan na página 14]

Algun hóben ta rabia cu nan mes pasobra nan ta flacu