Pakico Bo Mester Evitá Spiritismo

SI BO a siña cu algun forma di spiritismo ta maneranan pa haña contacto cu bon spiritu, kisas loke Bijbel ta bisa tocante spiritismo lo sorprendé bo. Por ehempel, e ta bisa: “Boso no acudí na spiritista, ni no consultá cu pronosticadó profesional di suceso, pa nan haci boso impuru.”—Levítico 19:31; 20:6, 27.

De echo, Bijbel ta describí e persona cu ta practicá spiritismo como “algu detestabel pa Jehova.” (Deuteronomio 18:11, 12) Di con? Un análisis mas profundo di loke Bijbel ta bisa tocante un rasgo principal di spiritismo—supuesto comunicacion cu e mortonan—lo contestá e pregunta ei.

E Mortonan Ta na Bida?

Contrario na loke hopi hende ta pensa, Bijbel, e Palabra di Dios, ta siña cu no ta posibel pa hende comunicá cu ser kerí cu a muri. Di con no? Wel, pa un hende por papia cu e mortonan, e mortonan mester ta na bida. Mester tin un parti di nan cu ta keda bibu despues di morto. Tin hende ta pretendé cu e alma ta sigui biba ora e curpa muri. Esei ta berdad?

 E relato bíblico di creacion di hende ta bisa: “Jehova Dios a pasa na forma e hende di stof di suela i di supla den su nanishi e rosea di bida, i e hende a bira un alma bibiente.” (Génesis 2:7) Esaki no ta mustra cu ta e persona mes ta un alma i cu e no tin un alma inmortal cu ta sigui biba despues cu e curpa muri? De echo, e Scritura ta bisa: “E alma cu ta peca—e mes lo muri.” (Ezekiel 18:4) “E bibunan ta conciente cu nan lo muri; pero en cuanto e mortonan, nan no ta conciente di nada en absoluto . . . No tin trabou ni formacion di proyecto ni conocimentu ni sabiduria den Sheol,” e graf comun di humanidad.—Eclesiástes 9:5, 10.

Pues segun Bijbel, alma no ta algu cu ta sobrebibí morto dje curpa i cu despues hende bibu por sigui comunicá cuné. Ata aki dos ehempel di eruditonan bíblico respetá, cu a yega n’e conclusion cu alma ta muri. Teólogo canades Clark H. Pinnock a comentá: “E concepto aki [cu alma humano ta inmortal] a influenciá teologia pa hopi, hopi tempu pero e no ta bíblico. Bijbel no ta siña tocante inmortalidad natural di alma.” Asina tambe, e erudito británico John R. W. Stott a declará: “E inmortalidad—i pues e indestructibilidad—di alma ta un concepto griego, no unu bíblico.”

Pero tog, hende ta ricibí mensahe i ta tende stem cu ta parce di bin for dje mortonan. Ta ken ta papia cu nan anto?

Comunicacion cu Ken?

Bijbel ta conta cu un persona spiritual invisibel a usa un colebra, mescos cu un ‘buikspreker’ ta usa un popchi, pa comunicá cu e promé muher, Eva, i pon’é rebelá contra Dios. (Génesis 3:1-5) Bijbel ta yama e persona spiritual of angel aki, “e colebra original, esun yamá Diabel i Satanas, cu ta gañando henter e tera habitá.” (Revelacion 12:9) E angel ei, Satanas, a logra tenta otro angelnan pa rebelá. (Hudas 6) Ta yama e angelnan malbado aki demoño i nan ta enemigu di Dios.

Bijbel ta mustra cu demoño tin poder pa influenciá hende. (Lucas 8:26-34) No ta nada straño anto cu e Ley di Dios ta bisa: “No mester ta hañá den bo ningun hende . . . cu ta consultá un medium spiritista of un pronosticadó profesional di sucesonan ni ningun cu ta puntra e mortonan. Pasobra tur hende cu ta haci e  cosnan aki ta algu detestabel pa Jehova.” (Deuteronomio 18:10-12) Kico ta e riesgonan ora ignorá e ley aki?

Rey Saul di antiguo Israel tabatin un experencia personal cu ta contestá e pregunta ei. Como cu rey Saul tabatin miedu di su enemigunan, el a bai busca un medium spiritista. Saul a pidié pa tuma contacto cu defuntu profeta Samuel. Ora el a tende e medium spiritista describí un homber bieu, Saul a asumí cu e aparicion aki tabata Samuel. I ki mensahe Saul a ricibí? Cu Israel lo ser duná den man di enemigu, i cu Saul i su yu hombernan lo ta huntu cu “Samuel,” indicando cu nan lo a muri. (1 Samuel 28:4-19) Con Dios a reaccioná riba e decision di Saul pa consultá un medium spiritista? E Scritura ta bisa nos: “Saul a muri pa su infieldad . . . i tambe pasobra el a puntra un medium spiritista pa consulta.” (1 Crónicanan 10:13) Esta un prijs haltu el a paga!

Awe tambe ta mescos, esnan enbolbí cu spiritismo ta hinca nan mes den riesgo grave. Bijbel ta spierta cu “esnan cu ta practicá spiritismo” lo sufri “e segundo morto [esta, morto eterno].” (Revelacion 21:8; 22:15) Claramente anto, e caminda cu ta salba bida i cu ta sabí pa sigui ta di evitá spiritismo den tur su formanan.

Con pa Resistí Mal Spiritu

Pero kico si ya caba bo ta enbolbí den spiritismo? E ora ei lo bo haci bon di dal pasonan inmediato pa protehá bo mes i bo famia di ser perhudicá pa mal spiritu. Ki pasonan? Pa ilustrá esei: Con un persona ta protehá su cas i su famia contra un plaga di insecto? Despues di eliminá nan for di su cas, e ta deshací di tur cos den cas cu ta atraé e insectonan. E ta seya tur buracu i ta reforsá e murayanan pa stop e plaga di insecto di drenta, i si e plaga persistí, kisas e ta pidi yudansa di autoridadnan local pa trata cuné.

Un método similar por yuda bo resistí mal spiritu i libra di nan. Considerá e ehempel dje cristiannan di promé siglo na Efeso, kendenan a practicá spiritismo promé cu nan a bira cristian. Despues cu nan a dicidí di kibra cu spiritismo, nan a dal tres paso pa protehá nan mes contra e atakenan di mal spiritu cu ta mescos cu plaga di insecto. Kico nan a haci?

Promé Paso

Bijbel ta splica: “Basta hopi di esnan cu a practicá e arte di magia a trece nan bukinan huntu i a kima nan dilanti tur hende.” (Echonan 19:19) Dor di destruí nan bukinan tocante divinacion, e cristiannan nobo aki a pone un ehempel pa tur cu ta deseá di resistí mal spiritu awe. Deshací di tur obheto conectá cu spiritismo. Esaki lo incluí  tur buki, revista, comics, video, poster, material di Internet i grabacionnan musical cu tin conotacion spiritista, i tambe amuleto of otro artículonan cu hende ta bisti pa “proteccion.”—Deuteronomio 7:25, 26; 1 Corintionan 10:21.

Un homber na Sur América cu pa décadanan tabata hopi metí den spiritismo, a tuma e conseho bíblico aki na pechu. E ta conta: “Un dia mi a pone tur mi pertenencianan spiritista dilanti mi cas, mi a coge un hacha i a kap nan na pida-pida.” Anto el a kima tur cos te ora cu no a sobra nada. Despues di esei, el a haci bon progreso spiritual i no a tarda muchu cu el a bira un minister celoso den un dje congregacionnan di Testigonan di Jehova.

Sin embargo, e promé paso ei no ta basta. Di con no? Wel, algun aña despues cu e cristiannan ei na Efeso a destruí nan bukinan tocante magia, ainda apostel Pablo a skirbi: “Nos tin un lucha . . . contra e mal forsanan spiritual.” (Efesionan 6:12) E demoñonan no a entregá. Ainda nan tabata busca pa logra un bentaha. Kico mas e cristiannan ei mester a haci?

Di Dos Paso

Pablo a urgi e efesionan di promé siglo: “Bisti e armadura completo cu ta bini di Dios pa boso por para firme contra e obranan mañoso dje Diabel.” (Efesionan 6:11, nota na pia di página) Awe e conseho ei ta aplicá ainda. Mescos cu e persona cu ta purba tene e plaga di insecto for di su cas, e cristian tin cu fortificá su defensanan parecido na un muraya, pa e por keda fuera di alcanse di mal spiritu. Kico e di dos paso aki ta encerá?

Pablo ta enfatisá: “Riba tur cos, bisti e escudo grandi di fe, cu cua boso por paga tur e flechanan di candela dje malbado.” (Efesionan 6:16) E escudo aki ta absolutamente necesario. Mas firme bo fe ta, mas fuerte bo resistencia contra forsanan malbado lo ta.—Mateo 17:20.

Pues, con bo por fortificá bo defensanan protectivo? Dor di sigui studia Bijbel. Den ki manera studio di Bijbel ta relacioná cu fe? Wel, mescos cu e firmesa di un muraya ta dependé hopi dje forsa di su fundeshi, asina e firmesa di un hende su fe ta dependé mashá dje forsa di su base. Kico e base ei ta?

Conocimentu exacto dje Palabra di Dios. Apostel Pablo ta splica: “Fe ta sigui loke a tende. En buelta, loke a tende ta mediante e palabra tocante Cristo.” (Romanonan 10:17) Bo ta ser invitá pa pidi un studio di Bijbel grátis cerca un Testigo di Jehova, na e ora i lugá cu ta cumbiní bo.  Un studio asina lo fortificá bo fe. (Romanonan 1:11, 12; Colosensenan 2:6, 7) Cu ki resultado? Den corto tempu bo fe lo ta un forti cu lo sirbi como un escudo contra influencia di mal spiritu.—Salmo 91:4; 1 Juan 5:5.

Cua ta e di tres paso cu e cristiannan ei na Efeso mester a dal?

Di Tres Paso

Den antiguo Efeso e creyentenan nobo ei a dal paso pa resistí mal spiritu, pero e cristiannan ei tabata biba ainda den un stad pestá cu demonismo. Nan tabatin mester di mas proteccion. P’esei ora apostel Pablo a skirbi compañeronan creyente, el a bisa nan kico pa haci: “Cu tur forma di oracion i súplica . . . sigui haci oracion na tur ocasion den spiritu. I p’e fin ei, keda lantá cu tur constancia i cu súplica na fabor di tur e santunan.”—Efesionan 6:18.

Definitivamente, haci oracion intenso i constante pa pidi Jehova su proteccion tabata, i ta ainda, un paso decisivo cu ta necesario pa haña proteccion contra mal spiritu. I ta un consuelo pa sa cu Jehova lo contestá bo súplicanan sincero dor di duna bo su proteccion, loke ta encerá e sosten di su angelnan. (Salmo 34:7; 91:2, 3, 11, 14; 145:19) Ta masha importante anto, pa persistí den pidi Dios den oracion: “Libra nos dje malbado.”—Mateo 6:13; 1 Juan 5:18, 19.

Antônio, un ex-medium spiritista na Brazil, a siña apreciá e balor di oracion. Despues cu el a aceptá un studio di Bijbel i a siña e nomber di Dios, Jehova, el a cuminsá haci oracion intenso pa Jehova Dios yud’é kibra cu spiritismo. Mirando bek, e ta bisa: “Haci oracion na Jehova a resultá di ta un refugio pa mi i pa hopi otro hende cu ántes tabata catibu di mal spiritu.”—Proverbionan 18:10.

Bo Por Logra

Ta vital pa despues di siña conocé Jehova, bo pone pleno confiansa den dje, someté bo mes na su autoridad i obedecé su mandamentunan. Si bo haci esaki, lo e duna bo proteccion ora bo sclama na dje pa yudansa, usando su nomber personal. Antônio a ricibí tal proteccion. Awe e ta un anciano cristian den un dje congregacionnan di Testigo di Jehova na São Paulo i e ta gradicidu cu el a haña e berdad cu a hacié liber.—Juan 8:32.

Mescos cu Antônio i miles di otro ex-spiritista cu awor ta sirbi Jehova Dios, bo por tin éxito den kibra cu spiritismo. Pues, deshací di obhetonan conectá cu spiritismo, fortalecé bo fe dor di studia Bijbel i haci oracion pidi Jehova su proteccion. Dal e pasonan aki—bo bida ta dependé di nan!

[Komentario na página 5]

Segun Bijbel, hende bibu no por comunicá cu e mortonan

[Plachi na página 6]

1. Deshací di tur obheto conectá cu spiritismo

[Plachi na página 7]

2. Sigui studia Bijbel

[Plachi na página 8]

3. Haci oracion intenso i frecuentemente