For di Nos Lectornan

Supersticion Mi no ta un Testigo di Jehova, pero mi tin dos aña ta lesa boso publicacionnan. Mi kier gradicí boso pa e seri “Destino Ta Controlá Bo Bida?” (8 di augustus 1999) i “Supersticion—Di Con Asina Peligroso?” (na spañó, 22 di october 1999) Un tempu mi tabata supersticioso i cu un punto di bista fatalista debí na mi criansa. Pero awor mi ta pensa cu boso ta papia e berdad tocante cristianismo.

N. D., Francia

E artículonan tocante supersticion a ofendé mi. Mi ta un católico romano deboto, i un dje artículonan ta bisa cu ora un pasahero gloria su curpa (“haci señal di crus”) esei ta supersticion. Católiconan ta haci esei como parti di nan oracion pa un biahe sano i salbo. Esaki ta un precepto principal di nos fe i un hende no por consider’é como supersticion.

S. W., Merca

No por nenga cu hopi hende ta haci e señal di crus sin para pensa riba debocion religioso. Ora a puntra un hungadó di bala australiano pakico e ta gloria su curpa riba veld di bala, el a admití: “Mi ta suponé cu eigenlijk esei ta gewoon supersticion.” No ta un sorpresa anto cu for di principio e ritual aki tabatin conotacion supersticioso. “The Catholic Encyclopedia” ta bisa: “For di principio a us’é den tur exorcismo i convocacion di spiritu como un arma contra e spiritunan di scuridad.”—RED.

Droga Mi kier gradicí boso pa e seri “Droga Ta Tumando Control di Mundu?” (8 di november 1999) Hibá pa influencia di amigu, mi tata ta adicto na droga i alcohol. Cas no ta un lugá di refugio, sino un lugá caminda mi ta ser menasá hopi bes. Apesar di tur cos, nunca lo mi stop di invitá mi mayornan pa experenciá e goso di adorá Dios.

M. L., Italia

Un biaha pa siman un polis ta bin na mi scol pa papia tocante cosnan manera droga i alcohol. Mi a dicidí cu e siguiente biaha cu e bin nos klas, lo mi dun’é e artículonan tocante droga. El a keda masha impresioná cu nan i a lesa parti di nan p’e klas tende. Henter mi klas a beneficiá dje artículonan!

C. D., Merca

Yu Incapacitá E relato di Rosie Major, “Nos A Siña Dependé Riba Dios den Adversidad” (8 di december 1999), a toca mi profundamente. Nos tabata biba den stad, pero mi no tabata gusta e manera cu esei tabata afectá mi yu muher mayó. Pues nos a haña un lugá pafó di stad. Tur cos tabata bayendo bon, te ora cu mi a perde mi trabou caminda mi tabata gana 100.000 florin pa aña. Ata nos akí, bibando pafó di stad, cu tres yu pa cria i hipotek pa paga. Esei sí ta stres! Pero despues di a lesa Rosie Major su relato, mi problemanan económico a parce di asina poco importancia cu mi a sinti bergwensa. Tin asina tantu hende eifó cu realmente tin mester di Dios su yudansa! Lo mi por haña un abonament riba E Toren di Vigilancia i Spierta!?

M. F., Merca

Nos a cumpli gustosamente cu e peticion dje lector aki.—RED.