Di Con Asina Tantu Interes den Spiritismo?

Un definicion di spiritismo ta e “creencia cu un parti spiritual di hende ta sobrebibí morto dje curpa físico i por comunicá cu hende bibu, por lo general via un persona cu ta sirbi como medium.”

NA 1998 un buki cu ta splica con pa haña contacto cu e mortonan a bira asina popular na Merca, cu rápidamente el a yega top di New York Times su lista di bukinan mas bendí.

Un par di aña pasá na Moscú, síkico i sesionnan cu spiritista tabata masha na moda cerca político i comerciantenan, kendenan a paga hopi placa pa consulta.

Na Brazil, novelanan di television cu ta presentá spiritismo ta acapará cantidad grandi di televidente.

Pa hopi hende cu ta biba na África of Asia, practicá spiritismo ta mes comun cu negoshá un prijs na plasa.

Di Con Asina Tantu Hende Ta Acudí na Spiritismo

Hopi hende ta acudí na spiritismo pa haña consuelo despues di morto di sernan kerí. Via di un medium spiritista nan por ricibí informacion special cu ta parce di ta bin for dje mortonan. Como resultado, e hende ei na luto hopi bes ta convencí cu nan sernan kerí morto ta na bida, i cu haña contacto cu e mortonan lo yuda nan trata cu e pérdida.

Spiritismo ta atraé otro hende dor cu nan a tende cu e spiritunan lo yuda nan haña curacion pa malesa, scapa  dje gara di pobresa, logra éxito den amor romántico, solucioná problemanan matrimonial of haña empleo. I hopi otro hende ta acudí na spiritismo djis pa curiosidad.

Sin embargo, un motibu mas pakico miyones di hende a acudí na spiritismo ta cu nan a ser siñá cu spiritismo ta, manera un experto riba e tereno aki a describié, “un religion suplementario” cu ta para “banda di cristianismo.” E situacion religioso na Brazil ta un ehempel di esaki.

Brazil tin e poblacion católico romano mas grandi na mundu, pero manera autor Sol Biderman a expres’é, “miyones dje fielnan ta cende bela na mas cu un altar i ta sinti [cu no tin] absolutamente ningun diferencia.” De echo, e revista semanal Veja di Brazil, a informá cu 80 porciento di esnan cu ta frecuentá centronan spiritista na Brazil ta católiconan bautisá cu ta bai misa tambe. Agregá na esaki e echo cu asta algun pastor ta participá den reunionnan spiritista, i bo por mira di con hopi creyente ta pensa cu drenta den contacto cu spiritu pa haña consuelo i guia, tin e aprobacion di Dios. Pero berdad ta asina?

[Kuadro/Plachinan na página 3]

Vários Forma di Spiritismo

E práctica di spiritismo por consistí di consultá un medium spiritista, puntra e mortonan of busca señal di loke ta bai pasa den futuro. Un forma popular di spiritismo ta divinacion, esta, purba haña sa tocante futuro of lo desconocí cu yudansa di spiritu. Algun forma di divinacion ta astrologia, wak den bola di cristal, interpretacion di soño, lesamentu di plant’i man i wakmentu di destino cu yudansa di bará di carta.