E Punto di Bista Biblico

Dios Ta Cambia?

ANTROPOLOGO George Dorsey a describí e Dios di “Testament Bieu” como “un Dios salbahe.” El a agregá: “Yahweh no ta . . . niun tiki amoroso. E ta e Dios di sakeadó, di torturadó, di guerero, di conkista.” Otro hende a saca mésun conclusion relacioná cu e Dios di “Testament Bieu”—Yahweh of Jehova. P’esei, awe tin hende ta puntra nan mes si Jehova tabata realmente un Dios cruel cu despues di tempu a cambia su caracter pa bira e Dios amoroso i misericordioso di “Testament Nobo.”

E idea ei tocante e Dios di Bijbel no ta algu nobo. Marcion, un semi-gnóstico di siglo 2 E.C., tabata e promé persona cu a presentá e idea ei. Marcion a rechasá e Dios di “Testament Bieu.” El a considerá e Dios ei violento i vengativo, un tirano cu a ofrecé recompensa material na esnan cu a ador’é. Na otro banda, Marcion a describí e Dios di “Testament Nobo”—manera Jesucristo a revel’é—como un Dios perfecto, un Dios di puru amor i misericordia, di bondad i pordon.

Jehova Ta Actua Segun Condicionnan Cu Cambia

Dios su nomber mes, Jehova, ta nificá “E Ta Causa pa Bira.” Esaki ta implicá cu Jehova ta causa su mes bira Cumplidor di tur su promesanan. Ora Moises a puntra Dios pa su nomber, Jehova a elaborá riba e nificacion di su nomber asin’akí: “Lo mi resultá di ta loke lo mi resultá di ta.” (Exodo 3:14) E traduccion di Rotherham ta bis’é asin’akí: “Lo Mi Bira kico cu mi kier.”

Pues Jehova ta scoge pa bira, of ta resultá di ta, loke sea ta necesario pa cumpli cu su propósito i promesanan hustu. Un evidencia di esaki ta e echo cu e tin un gran cantidad di título i término cu ta describié: Jehova di ehércitonan, Hues, Soberano, Yalurs, Señor Soberano, Creador, Tata, Magnífico Instructor, Wardador, Tendedor di oracion, Recomprador, Dios felis, i hopi mas. El a scoge pa bira tur esaki—i hopi mas—afin di cumpli cu su propósito amoroso.—Exodo 34:14; Huesnan 11:27; Salmo 23:1; 65:2; 73:28; 89:26; Isaías 8:13; 30:20; 40:28; 41:14; 1 Timoteo 1:11.

Esaki kier men anto cu Dios su personalidad of normanan ta cambia? No. Santiago 1:17 ta bisa di Dios: “Cuné no tin un variacion dje biramentu dje sombra.” Con Dios por a  trata cu e desafio di circunstancianan cu ta varia miéntras cu e mes ta keda sin cambia?

E ehempel di mayornan amoroso cu ta asumí diferente papel pa bienestar di nan yunan ta ilustrá con esaki ta posibel. Den transcurso di un solo dia, un mayor por ta koki, criá, electrishen, verpleegster, amigu, consehero, maestro, esun cu ta duna disiplina, i hopi mas. E mayor no ta cambia di personalidad ora e ta asumí e papelnan aki; simplemente e ta adaptá n’e necesidad segun nan presentá. Mescos ta cierto di Jehova pero riba un escala hopi mas grandi. No tin límite na loke Jehova por causa su mes bira afin di cumpli cu su propósito i pa beneficiá su criaturanan.—Romanonan 11:33.

Por ehempel, tantu e Scritura Hebreo como esun Griego Cristian ta revelá Jehova como un Dios di amor i misericordia. Profeta Mikéas di siglo 8 P.E.C. a puntra tocante Jehova: “Ken ta un Dios manera bo, unu cu ta pordoná eror i ta pasa por haltu di delitu dje resto di su herencia? Sigur lo e no pega na su rabia pa semper, pasobra e tin deleite den bondad amoroso.” (Mikéas 7:18) Di igual manera, apostel Juan a skirbi e famoso palabranan: “Dios ta amor.”—1 Juan 4:8.

Na otro banda, den tur dos parti di Bijbel, Jehova ta ser presentá como e Hues hustu di esnan cu bes tras bes, den un manera extremo i sin repentí ta kibra su leynan i ta perhudicá otronan. E salmista a bisa: “Tur e malbadonan [Jehova lo] exterminá.” (Salmo 145:20) Den mésun direccion Juan 3:36 ta declará: “Esun cu ehercé fe den e Yu tin bida eterno; esun cu ta desobedecé e Yu lo no mira bida, sino e rabia di Dios ta permanecé riba dje.”

Cualidadnan Cu No Ta Cambia

Jehova su personalidad i cualidadnan principal—esta amor, sabiduria, husticia i poder—no a cambia. El a bisa e pueblo di Israel: “Ami ta Jehova; mi no a cambia.” (Malakías 3:6) Esaki tabata un 3.500 aña despues cu Dios a crea humanidad. Na armonia cu e declaracion divino ei, ora nos analisá Bijbel bon den su totalidad, e ta revelá un Dios kende su normanan i cualidadnan no a cambia. Jehova Dios su personalidad no a suavisá atrabes di siglonan, ya cu esei no tabata necesario.

Dios su firmesa pa husticia, manera henter Bijbel ta revel’é, no ta ménos, ni su amor no ta mas tantu cu e tabata tempu el a cuminsá trata cu hende den Eden. E diferencianan den su personalidad cu aparentemente vários parti di Bijbel ta demostrá, ta en realidad diferente aspecto dje mésun personalidad cu no ta cambia. Esakinan ta resultá dor dje vários circunstancia i personanan cu el a trata cuné, loke a exigí diferente actitud of relacion.

Pues, e Scritura ta mustra bon cla cu e personalidad di Dios no a cambia atrabes di siglonan i lo no cambia den futuro. Jehova ta e personificacion supremo di constancia i consistencia. Na tur tempu e ta digno di confiansa. Semper nos por dependé riba dje.

[Plachinan na página 18, 19]

E mésun Dios cu a destruí Sódoma cu Gomora . . .

. . . lo trece un mundu nobo hustu