Di Berdad E Ta Asina Perhudicial?

MANERA nos a mira, Internet a haci pornografia na disposicion fácil di tantu hende adulto como mucha. Esei ta motibu pa bo preocupá? Di berdad pornografia ta perhudicial?

Hopi hende ta pensa cu un contacto casual cu pornografia ta inofensivo. Sin embargo, echo ta mustra otro cos. Tuma e caso di un pareha cu a parce di tin un matrimonio ideal. Financieramente nan tabata bon pará, i nan a gusta biaha. Nan amigunan a pensa cu nan tabatin un relacion íntimo i cariñoso cu otro i dedicá na otro, i den hopi cos esei tabata e caso.

Pero, problema a surgi ora cu e esposo a cuminsá wak pornografia. Skirbiendo un columnista popular cu ta duna conseho, e esposa preocupá a describí su inkietud: “Promé, ora [mi casá] a cuminsá dedicá hopi ora na computer den mardugá i mainta trempan, el a bisa mi cu e tabata haci ‘investigacion.’ Un mainta mi a cana drenta riba dje i a gar’é ta wak [pornografia] . . . El a bisa mi cu tabata puru curiosidad. Ora mi a bai mira mas mihó kico e tabata wak, mi a keda tur disgustá. El a haña bergwensa i a primintí di stop, i ami a kere cu e tabata men esei. Semper e tabata onorabel, un homber di su palabra.”

Mescos cu e homber aki, hopi hende na principio ta haña  nan enbolbí den pornografia pa motibu di curiosidad. Preocupá pa no descubrí nan, nan ta subi Internet anochi lat of mainta trempan. Si gara nan, hopi bes nan ta purba sconde loke nan ta haci dor di gaña, manera e homber aki a haci. Un hende por pretendé razonablemente cu un “hobi” cu ta pone “un homber di su palabra” sluip rond den mardugá i gaña su sernan kerí, ta un hobi inofensivo?

E práctica por hiba na problemanan serio, tantu personal como di famia. Tin persona cu a admití cu wakmentu di pornografia a stroba nan di desaroyá relacion cerá cu otro hende. Nan no kier tin hende rond di nan ora nan ta entregá na nan pasion pa pornografia. Hende tin custumber di fantaseer ora nan ta wak pornografia, i fantasia no ta ekipá un persona pa cultivá relacionnan fuerte ni pa trata cu bida den e mundu real. Un pasatempu cu ta alehá hende for di esnan cu ta mas interesá den nan por ta realmente inocente?

Den algun caso hende cu ta wak of lesa material pornográfico tin asta problema pa disfrutá di relacion sexual normal cu nan casá. Pa comprendé di con, considerá Dios su propósito original pa hende casá. Amorosamente el a crea esposo i esposa cu e abilidad di expresá nan amor pa otro den un forma gososo mediante relacion sexual onorabel. Proverbionan 5:18 i 19 ta mustra cu e intencion tabata pa esaki ta placentero: “Alegrá bo cu e esposa di bo hubentud . . . Laga su mes pechunan haci bo burachi na tur tempu. Sea cu su amor den un éxtasis constantemente.”

Tuma nota cu ta amor mester tabata e base pa relacion sexual. E persona cu ta wak pornografia ta cultivando un laso caluroso di amor i intimidad? No, e ta satisfaciendo su propio deseonan sexual, su so, den mayoria caso. Un homber casá cu ta wak pornografia por cuminsá mira su casá como un simpel obheto, un persona cu t’ei pa e homber su placer so. Esaki ta leu for dje dignidad i onor cu e Creador tabata kier pa hende homber duna hende muher. (1 Pedro 3:7) Por considerá un práctica cu ta interferí cu e aspectonan mas íntimo di matrimonio como algu deseabel?

Ademas, loke kisas mester tabata un pasatempu casual por hiba na un adiccion di largu plaso. Un escritor a comentá: “Mescos cu drogadictonan mester di droganan mas potente pa bira ‘high,’ asina consumidónan di pornografia mester di un experencia mas intenso pa alcansá e mésun sintimentunan eufórico cu na principio.”

Parce cu ta esaki a sosodé cu e esposo mencioná na comienso dje artículo aki. Un anochi despues di vários luna cu el a primintí di stop di wak pornografia, su casá a bin cas i hañ’é na computer. For di su comportacion e esposa por a saca afó cu algu no tabata bon. El a skirbi: “[El] a parce basta nervioso i molestiá. Mi a wak riba computer, i asina mes, e tabata bezig ta wak algun cos increiblemente sushi. E di cu e tabata sincero ora el a primintí di stop cuné, pero gewoon e no por a lagu’é.”

En bista dje daño cu pornografia por causa i e disponibel cu e ta tur caminda, bo tin tur motibu pa ta preocupá. Con bo por protehá bo mes i bo yunan? E artículo final dje seri aki lo considerá e pregunta ei.

[Plachi na página 6]

Pornografia ta daña moral