Kico un Para Por Siña un Prezu?

DJE CORESPONSAL DI SPIERTA! NA SUR AFRICA

SEGUN e korant Sunday Tribune di Durban, Sur Africa, para ta hunga un papel den suavisá curason di prezunan na prizon Pollsmoor. Actualmente 14 convicto ta participá den un programa cu ta encerá cuida para den nan cel. E paranan ta kokatú i ‘lovebird.’

Con e programa ta funcioná? Cada prezu cu ta participá tin un incubador temporal den su cel. Nan ta pone un puitu na encargo dje prezu, kende tin cu duna e criatura chikitu indefenso cuminda na man cada pasa un of dos ora, di dia i anochi, pa mas o ménos cincu siman. Caba ta pone e para den un kouchi, cu tambe ta keda den e cel. Ora e para crece, ta bend’é cu público. Tin prezu ta pega nan curason asina tantu na e paranan cu nan ta yora ora nan tin cu laga nan bai.

Asta algun criminal sin heful a bira riparablemente mas tierno i suave despues di papia cu para i cuida nan tur dia. Un prezu di: “Mi ta mansa e paranan, pero nan tambe a mansa mi.” Un otro a bisa cu e paranan a siñ’é pacenshi i dominio propio. Un ladron condená ta bisa cu cuidamentu dje paranan a pon’é realisá cu ser un mayor “ta un responsabilidad grandi,” algu cu el a neglishá den caso di su mes yunan tempu e tabata liber.

Cuida e paranan aki tin un beneficio mas pa e prezunan. Segun Wikus Gresse, kende a bini cu e programa: “Cu e abilidadnan cu nan siña aki, ora nan sali nan por haña trabou cerca hende cu ta cria para of cerca un veterinario.”