For di Nos Lectornan

Diabétis Mi a caba di lesa pa di dos biaha e artículo “Bo Yu Muher Tin Diabétis!” (8 di october 1999) Dies luna pasá mi a haña sa cu mi tin diabétis Tipo 1. Semper mi tabata un hende salú, sirbiendo como pionero, un evangelisadó di tempu completo, for di mi 17 aña. Mi tabatin cu haci hopi ahuste den mi bida durante e último lunanan. Mi tin cu usa un pomp di insulina, i e gastu pa trata mi malesa a obligá mi stop di traha pionero. Pero mi ta yama danki cu boso ta imprimí artículonan asina cu ta recordá nos cu tin otro hende tambe cu ta pasa dor di pruebanan similar.

B. F., Merca

Mi yu homber di cuater aña ta sufri di diabétis for di tempu cu e tabatin dos aña. Nos conocé bon e sintimentunan cu Sonya i su famia a expresá den e artículo. Nos ta gradicidu pa e amoroso hermandad cristian cu a yuda nos enfrentá e situacion cu éxito.

C. R., Moldova

Pa basta tempu mi tabata spera di por lesa algu animante riba e tema aki. Mi tin 17 aña i ta biba cu diabétis for di tempu mi tabatin 5 aña. Tin biaha, tabata masha difícil pa trata cu e malesa aki. Pero mi a keda encantá di por tin un artículo simpel cu mi por mustra mi famia i tur mi amigunan, i cu lo contestá nan preguntanan i amplia nan conocimentu di diabétis.

K. W., Cánada

Peligroso? Mi a lesa un bunita artículo titulá “E Muhernan A Yuda Masha Hopi.” (8 di juli 1999) Mi a keda un tiki sorprendí sí di mira cu e hende muhernan cu ta traha den construccion no tabatin ningun proteccion pa nan wowo.

R. L., Merca

Nos lectornan por keda trankil cu e trahadónan boluntario aki a bisti proteccion pa wowo ora nan ta haci nan trabou. A pidi nan pose pa e potretnan aki, sin proteccion pa wowo, pa asina por a mira nan caranan contentu mihó.—RED.

Inhusticia Mi kier yama boso danki pa e artículo “Hóbennan Sa Puntra . . . Con Mi Por Trata cu Inhusticia cu Exito?” (8 di october 1999) Maske mi ta yong, mi a sufri hopi inhusticia i violencia den mi bida, asina tantu cu mi tin heridanan emocional profundo. Esaki a pone cu ta difícil pa mi sigui traha pionero, manera mi a haci e último ocho añanan. Un frase cu a trankilisá mi ta esun cu a bisa: “Haci loke bo por pa trata cu e situacion cu éxito.” E palabranan aki ta reflehá amor, i mi ta gradicí boso di fondo di mi curason.

A. G., Italia

Música Mi tin años como anciano den e congregacion cristian i semper mi a interesá den hóbennan. Pero últimamente mi tabata sinti mi frustrá, ya cu nan no tabata haci caso dje conseho cu mi a purba duna nan tocante e peligernan di música moderno. Pero, e seri “Música—Tin Mas Poder cu Bo Ta Kere” (8 di october 1999) tabata net loke mi tabatin mester. E citanan di otro fuentenan tocante e efecto negativo di algun tipo di música tabata excelente. Lo mi compartí e pensamentunan aki cu nos hóbennan.

D. H., Bolivia

Como un cantante i maestra di música na scol básico, mi a haña boso artículonan recien tocante música masha interesante. Danki!

K. F., Merca

Scogiendo un Casá Danki pa e cuido paternal cu boso a mustra na nos como hóben den e artículo “E Punto di Bista Bíblico: Con pa Scoge un Casá.” (8 di october 1999) Falta di experencia ta pone hopi hóben core casa, ya cu nan ta bruha pasion cu amor berdadero. Lo mi preferá di ta mi so, cu casá cu un hende cu ken mi no ta pas.

S.R.M., Brazil