Bo Tin Intolerancia pa Lactose?

DJE CORESPONSAL DI SPIERTA! NA MEXICO

“Ami cu mi esposo tabata di bishita cerca algun amigu den e estado Puebla, na México. Nos anfitrionnan tabatin nan mes bacanan, pues nan a ofrecé nos lechi frescu huntu cu desayuno i cena.

E promé anochi nos a sinti nos malu, pero e di dos dia tabata teribel. Mi stoma a blas asina tantu cu mi a parce na estado. Anto nos tur dos a haña diarea pisá.

Ta te despues di años nos a descubrí cu nos tin intolerancia pa lactose.”—Bertha.

BERTHA su experencia no ta raro, pasobra tin experto ta calculá cu te cu 75 porciento dje poblacion adulto di mundu kisas ta experenciá algun of tur e síntomanan di intolerancia pa lactose. * Kico precis esaki ta, i kico ta caus’é? Mas importante ainda, kico por haci pa trata cuné?

E término “intolerancia pa lactose” ta referí n’e curpa su inabilidad di digerí lactose, e sucu cu ta predominá den lechi. Pa bo circulacion di sanger absorbá lactose, e curpa mester partié den glucose i galactose. Pa esaki tuma lugá, tin mester di un enzima cu yama lactase. E problema ta cu despues di infancia e curpa ta producí ménos lactase. Dor cu hopi adulto tin un deficiencia di lactase, nan ta bira hende cu intolerancia pa lactose.

Ora un persona ingerí mas lactose—via lechi i su derivadonan—cu su curpa por digerí, bacteria den e tripa ta combertí e lactose ei den zuur di lechi i kooldioxide. Den ménos cu 30 minuut, síntomanan típico ta cuminsá manifestá nan mes, entre nan, walmentu di stoma, kram, barica ta blas i diarea. Algun hende cu no sa cu nan tin intolerancia pa lactose kisas ta purba calma nan stoma cu mas lechi, i esei ta empeorá e asuntu.

E grado di intolerancia pa lactose ta varia di un persona pa otro. Tin hende por bebe un glas chikitu di lechi sin sinti ningun mal efecto. Pa otronan, asta e glas chikitu aki lo causa e síntomanan. Tin experto ta sugerí cu pa determiná cuantu bo por tolerá,  bo mester cuminsá cu un glas chikitu di lechi. Anto na otro ocasionnan bo ta aumentá tiki-tiki e cantidad cu bo ta bebe. Relacioná cu esaki, corda cu maske e síntomanan di intolerancia pa lactose ta incómodo, rara bes nan ta peligroso.

Kico Bo Por Come i Kico Mester Evitá

Si bo ta sufri di intolerancia pa lactose, bo tin cu determiná kico bo por come i kico no. Hopi lo dependé di bo nivel di tolerancia. Cuminda cu ta contené lactose ta entre otro lechi, ijscream, yogurt, manteca i keshi. Tin algun cuminda prepará, manera bolo, cereal i ‘dressing,’ pa salada cu tambe ta contené lactose. P’esei, hende cu intolerancia pa lactose tin cu chek e etiket di nutricion riba e productonan ei.

Claro cu lechi ta e fuente principal di calcio, i falta di calcio por hiba na wesu bròs (osteoporósis). P’esei, esnan cu tin intolerancia pa lactose mester busca otro fuente di calcio. Algun berdura frescu, manera brócoli, kolo i spinazi, ta contené calcio. Tambe almendra, simia di zjozjolí i piscá cu wesu moli, manera saldinchi i salmou.

Maske bo tin intolerancia pa lactose, kisas bo no tin cu eliminá lechi i productonan di lechi completamente. Mas bien, purba determiná cuantu bo por tolerá, anto no usa mas cu e cantidad ei. Ora ta posibel, come otro cuminda huntu cu cualkier producto cu ta contené lactose. Corda tambe cu keshi bieu ta contené ménos lactose, i por ta cu lo e no causa problema. Kico di yogurt? E tin casi mes tantu lactose cu lechi, pero tin hende cu intolerancia pa lactose cu por digerié fácil. Con bini? Pasobra yogurt tin micro-organismonan cu ta producí lactase, i esaki ta yuda e digestion di lactose.

Pues anto, si bo ta sufri di intolerancia pa lactose, no preocupá. Manera nos a mira, conocimentu dje malesa aki lo yuda bo control’é fácilmente. Pero tene e siguiente puntonan na mente:

(1) Usa cantidadnan chikitu di lechi i productonan di lechi, huntu cu otro cuminda, pa determiná bo nivel di tolerancia.

(2) Come yogurt i keshi bieu, locual e curpa normalmente ta digerí mas fácil.

(3) Haci uso di productonan cu ta disponibel sin lactose of cu ta contené lactase.

Dor di sigui e sugerencianan aki, bo por trata cu intolerancia pa lactose.

[Nota]

[Kuadro/Plachi na página 26, 27]

Con pa Diagnosticá Intolerancia pa Lactose

Dokternan ta usa vários método pa detectá intolerancia pa lactose.

Test di tolerancia pa lactose: Despues di a yuna, e pashent ta bebe un líkido cu ta contené lactose. Ta coge muestranan di sanger pa determiná con bon su curpa ta digerí e lactose.

Test di rosea hidrógeno: Lactose cu no ser digerí ta producí vários gas, incluso hidrógeno. E gas aki ta sali for dje tripa bai den e circulacion di sanger i despues den e pulmonnan, caminda e ta sali via rosea.

Test di zuur den sushi: Lactose den tripa cu no ser digerí ta producí cierto zuur cu por ser detectá den un muestra di sushi.

Por lo general no tin nodi keda hospital pa haci e testnan aki.