Aids na Africa—Ki Speransa Tin p’e Milenio Nobo?

DJE CORESPONSAL DI SPIERTA! NA ZAMBIA

SEPTEMBER aña pasá, delegadonan for di vários parti di Africa a reuní na Lusaka, Zambia, pa e di 11 Conferencia Internacional di AIDS i Malesanan Transmití Sexualmente na Africa. Un propósito dje conferencia tabata pa stimulá mayor cooperacion interregional pa contestá e pregunta: Con nos por atacá e plamamentu di AIDS na Africa?

Profesor Nkandu Luo, e tempu ei minister di salubridad di Zambia, a bisa cu e situacion na Africa i na otro partinan dje mundu den desaroyo ta “sumamente serio,” agregando cu e situacion ta “causando un paro i asta nulificá algun dje adelantonan significativo cu a logra den salubridad i den otro camponan social i económico.”

Un simposio riba siguridad di sanger a reconocé cu a transmití AIDS via transfusion. Un dokter, representante dje Unidad pa Siguridad di Sanger dje Organisacion Mundial di Salú, a señalá cu aunke relacion sexual cu un partner infectá no semper ta transmití HIV, e persona cu ricibí sanger contaminá cu AIDS lo ser infectá den tur caso! Cu bon motibu anto, e dokter aki a declará cu den tal caso, “transfusion di sanger mas safe ta esun cu no ser duná.”

E conferencia a enfatisá cu e costo sumamente haltu di tratamentu ta hacié difícil, pa no bisa imposibel, pa esnan cu AIDS aford cuido médico. Por ehempel, como promedio, un habitante di stad na Uganda ta gana rond di 360 florin pa luna. Pero tratamentu cu ta usa remedi contra vírus por costa te cu 1.800 florin pa luna!

E conferencia di Lusaka a indicá cu comienso dje milenio nobo lo no mira ningun solucion fácil pa e plamamentu di AIDS. Sin embargo, studiantenan di Bijbel ta realisá cu na final di cuenta e solucion pa tur enfermedad ta dependé dje Creador, Jehova Dios, kende a primintí cu den su mundu nobo, “ningun residente lo bisa: ‘Mi ta malu.’”—Isaías 33:24.

[Mapa/Plachinan na página 31]

Profesor Nkandu Luo

[Rekonosementu]

Potret cu permiso di E. Mwanaleza, Times of Zambia