Un Fe Bibu Meimei di Tragedia

CASI 60 aña pasá, Mina Esch a ricibí un postcard di su casá, Peter. E mensahe skirbí na man tabata breve i vago. No obstante, Mina a keda contentu i aliviá di ricibié. Mina su casá tabata un prizonero cu gobiernu nazi a manda na e campo di concentracion Buchenwald, pasobra e tabata un Testigo di Jehova. Patras dje postcard tabatin e declaracion corticu: “E prizonero ta keda un Studiante di Bijbel [manera Testigo di Jehova tabata conocí e tempu ei] terco . . . Solamente p’e motibu aki ta kita for di dje e privilegio normal di corespondencia.” E mensahe aki a laga Mina comprendé cu Peter tabata tene firme na su fe.

A fia e postcard, cu awor a bira frágil i geel, na e Museo di Patrimonio Hudiu—Un Memorial Bibu dje Holocausto, situá na Battery Park, New York City. Huntu cu un potret di Peter Esch, e postcard ta yuda conta un parti chikitu di un enorme tragedia humano—e Holocausto—durante cua seis miyon hudiu a muri. E museo su exhibicion principal ta contené mas cu 2.000 potret i 800 artefacto histórico i cultural cu ta demostrá e experencianan dje comunidad hudiu for di añanan 1880 te cu awe, incluso e Holocausto. Di con e Museo di Patrimonio Hudiu ta e lugá apropiado pa exhibí e carta di Peter Esch?

Dr. Jud Newborn, historiadó dje museo, a splica: “E mandato dje museo ta pa representá historia hudiu.” “Testigonan di Jehova a ser persiguí puramente pa loke nan ta. Nan a persiguí e Testigonan solamente pa nan creencianan religioso i pasobra nan no a kere den racismo, ni den hura lealtad na un dictador malbado i mundano. I nan no a kere den bringa su guera. . . . Hudiunan a lucha pa mantené nan balornan i nan fe contra tremendo oposicion. E museo ta celebrá tal resistencia spiritual. P’e motibu ei, e institucion aki ta reconocé i admirá tambe e fe di Testigonan di Jehova durante e era nazi.”

Den su cas temporal dje Museo di Patrimonio Hudiu, un simpel carta ta representá e lucha di un solo homber kende su lealtad na Jehova a ser poné na prueba. Peter Esch a sobrebibí su teribel experencia den e campo nazi, cu su fe intacto.

[Plachi na página 31]

Museo di Patrimonio Hudiu, na New York City

[Plachinan na página 31]

Esch, un Testigo di Jehova, tabata encarcelá di 1938 pa 1945 pasobra e no kier a nenga su fe