E Punto di Bista Biblico

Tin Ora Cu Gañamentu Ta Hustificá?

“TIN BIAHA UN POCO INEXACTITUD TA SPAR BO TONELADA DI SPLICACION.”

E COMENTARIO aki ta ilustrá kico hopi hende ta pensa di gañamentu. Nan ta razoná cu gaña no ta malu si e no ta perhudicá niun hende. Tal razonamentu asta tin un nomber académico, esta, ética di situacion, cu ta bisa cu e único ley cu bo tin cu sigui ta e asina yamá ley di amor. Cu otro palabra, segun autor Diane Komp, “si bo motivacion ta bon i bo intencion ta bon (e ora ei e) echo cu bo a gaña . . . no ta importante.”

Un punto di bista asina ta comun den e mundu djawe. Scandalnan cu ta enbolbé mentira cu políticonan prominente i otro lidernan mundial a saca, a sagudí sociedad. Influenciá dor dje ambiente aki, hopi hende a floha nan determinacion pa papia berdad. Riba algun tereno gañamentu a bira asta e estrategia oficial. Un bendedora a keha: “Nan ta paga mi pa gaña. Mi ta gana contest di benta i tur aña mi ta haña masha bon elogio si mi gaña. . . . Esaki ta parce di ta tur caminda e esencia di entrenamentu di benta por detal.” Hopi hende ta pensa cu mentira pa un bon causa no ta haci ègt daño. Esei ta berdad? Tin ocasionnan cu cristiannan por ta hustificá pa saca un mentira?

Bijbel Su Norma Elevá

Bijbel ta condená tur clase di gañamentu rotundamente. Segun e salmista: “[Dios lo] destruí esnan cu ta papia mentira.” (Salmo 5:6; mira Revelacion 22:15.) Na Proverbionan 6:16-19, Bijbel ta mencioná shete cos cu Jehova ta odia. “Un lenga falsu” i “un testigo falsu cu ta lansa mentira” ta prominente den e lista aki. Di con? Pasobra Jehova ta odia e daño cu falsedad ta causa. Esei ta un motibu pakico Jesus a yama Satanas un mentiroso i un matadó. Su mentiranan a hinca humanidad den miseria i morto.—Génesis 3:4, 5; Juan 8:44; Romanonan 5:12.

Con serio precis Jehova ta mira gañamentu ta ser resaltá dor di loke a sosodé cu Ananías cu Safira. Den un intento pa parce mas generoso di loke nan realmente tabata, e dosnan aki a gaña e apostelnan deliberadamente.  Nan accion tabata deliberá i premeditá. P’esei apostel Pedro a declará: “Bo a engañá no hende, sino Dios.” P’esei nan tur dos a muri na Dios su man.—Echonan 5:1-10.

Añanan despues apostel Pablo a spierta cristiannan: “No papia mentira cu otro.” (Colosensenan 3:9) E exhortacion aki ta vital foral den e congregacion cristian. Jesus a bisa cu amor basá riba principio lo ta e marca cu ta identificá su berdadero siguidónan. (Juan 13:34, 35) Tal amor sin hipocresia por crece i florecé solamente den un ambiente di onestidad i confiansa completo. Ta difícil pa stima un hende si nos no por ta sigur cu semper lo e bisa nos e berdad.

Aunke tur gañamentu ta reprensibel, tin mentira cu ta mas serio cu otro. Por ehempel, un persona por gaña debí na bergwensa of miedu. Un otro maliciosamente por haci gañamentu un custumber, cu e intencion di causa daño of perhudicá otronan. Debí na su motivacion malicioso, un gañadó deliberá asina ta un peliger pa otro hende i lo ser scomulgá for dje congregacion si e no repentí. Como cu no ta tur mentira ta ser inspirá dor di malicia, nos tin cu tene cuidou pa no condená innecesariamente sino haci sigur cu nos sa tur e factornan enbolbí ora un persona a saca un mentira. Mester tene cuenta cu motivacion i circunstancianan cu por suavisá e asuntu.—Santiago 2:13.

“Cauteloso Manera Colebra”

Claro cu e echo cu nos ta papia berdad no kier men cu nos ta obligá di divulgá tur informacion na tur hende cu puntra nos. “No duna loke ta santu na cachó, ni tira boso perla dilanti porco, pa nan nunca . . . bira bek i sker boso,” Jesus a spierta, na Mateo 7:6. Por ehempel, hende cu mal intencion kisas no tin derecho di sa cierto cosnan. Cristiannan ta comprendé cu nan ta biba den un mundu hostil. P’esei, Jesus a consehá su disipelnan pa ta “cauteloso manera colebra” miéntras nan ta keda “inocente manera palomba.” (Mateo 10:16; Juan 15:19) No ta semper Jesus a revelá henter e berdad, foral si dor di revelá tur echo esei por a trece daño innecesario na su mes of na su disipelnan. Tog, asta na ocasionnan asina, e no a gaña. Mas bien, el a sea scoge pa no bisa nada of a cambia e combersacion.—Mateo 15:1-6; 21:23-27; Juan 7:3-10.

Homber i muhernan fiel mencioná den Bijbel, manera Abraham, Isaac, Rahab i David, tambe tabata discreto i cauteloso ora nan a trata cu posibel enemigunan. (Génesis 20:11-13; 26:9; Hosué 2:1-6; 1 Samuel 21:10-14) Bijbel ta clasificá e homber i muhernan ei como fiel adoradó kende nan bida tabata caracterisá pa obedencia. Esei ta haci nan digno di imitacion.—Romanonan 15:4; Hebreonan 11:8-10, 20, 31, 32-39.

Por tin biaha ora cu un mentira ta parce di duna un salida fácil. Pero cristiannan awe ta haci bon di imitá e moda di anda di Jesus i sigui nan concenshi bíblicamente entrená ora nan ta confrontá situacionnan particularmente difícil.—Hebreonan 5:14.

Bijbel ta animá nos pa papia berdad i ser onesto. Gañamentu ta malu, i nos mester sigui e conseho bíblico: “Papia e berdad cada un di boso cu su próhimo.” (Efesionan 4:25) Dor di haci esei, nos lo mantené un concenshi limpi, promové pas i amor den e congregacion i sigui onra “e Dios dje berdad.”—Salmo 31:5; Hebreonan 13:18.

[Plachi na página 16]

Dor cu nan a gaña, Ananías cu Safira a perde nan bida