Mamanan cu AIDS Ta Enfrentá un Dilema

CYNTHIA, * un señora cu ta biba den Caribe, tabatin cu scoge entre duna su baby recien nací pechu of botter. E decision por parce simpel. Tog, pa décadanan expertonan di salú a bin ta promové lechi di mama como “e mihó cuminda pa salú” di baby. Ademas, den comunidadnan pober baby cu bebe botter tin 15 biaha mas chens di muri di malesanan relacioná cu diarea cu esnan cu bebe lechi di pechu. De facto, e Fondo pa Mucha di Nacionnan Uní (UNICEF) ta informá cu rond di 4.000 mucha ta muri tur dia como resultado di peligernan conectá cu substitutonan pa lechi di pechu.

Sin embargo, den caso di Cynthia e decision di duna su baby pechu ta encerá completamente un otro peliger. Cynthia su casá a pegu’é cu e vírus di inmunodeficiencia humano (HIV), cu ta causa AIDS. Despues di duna lus, Cynthia a haña sa cu yu di un mama HIV-positivo tin e chens di 1 den 7 pa pega cu e malesa via lechi di pechu. * Pues, e mester tuma un decision agonisante: exponé su baby na e rísiconan di bebe pechu of somet’é na e peligernan di bebe botter.

Den partinan di mundu caminda e epidemia di AIDS a dal mas duru, 2 of 3 di cada 10 muher na estado ta HIV-positivo. Den un pais, mas cu mitar di tur muher na estado cu nan a test tabata contagiá. Segun Radio ONU: “E cifranan alarmante aki tin científiconan ta pura pa haña un remedi.” Pa por reaccioná riba e menasa aki, seis organisacion di ONU a uni nan experencia, esfuerso i recursonan pa forma UNAIDS (Programa Uní Riba HIV/AIDS di Nacionnan Uní). * Pero loke UNAIDS a descubrí ta cu e solucion pa e dilema di AIDS no ta asina simpel.

Obstáculonan Complicá Ta Stroba un Solucion Simpel

Segun Edith White, specialista riba duna yu pechu i transmision di HIV di mama pa yu, trahadónan den salubridad ta consehá hende muher HIV-positivo den paisnan industrialisá pa no duna nan yu pechu, como cu esaki casi ta haci e riesgo cu e baby lo pega cuné dòbel. Usa lechi di puiru pa baby ta parce e alternativa  lógico. Pero na paisnan den desaroyo—caminda teorianan idealista ta traha lugá un bes pa e cruel realidad—e solucion simpel aki ta difícil pa efectuá.

Un dje obstáculonan ta esun social. Den paisnan caminda e norma ta pa duna yu lechi di pechu, hende muher cu ta duna nan baby lechi di botter kisas ta anunciá asina cu nan a ser contagiá cu HIV. Tal bes un muher tin miedu cu hende lo culp’é, bandon’é of asta batié si nan haña sa di su condicion. Tin muher den e circunstancia aki ta sinti cu nan no tin otro opcion, sino di duna nan baby lechi di pechu pa tene secreto cu nan ta HIV-positivo.

Tin mas obstáculo. Por ehempel, tuma Margaret di 20 aña. E, mescos cu 95 porciento di hende muher di cunucu na Uganda, nunca no a haci test pa HIV. Pero Margaret tin motibu pa ta preocupá. Su promé yu a muri, i su di dos ta delicado i enfermo. Margaret ta duna su di tres yu lechi di pechu dies biaha pa dia, apesar dje echo cu e por tin HIV. E ta bisa: “Nunca lo mi no por duna mi baby lechi di botter.” Di con no? Margaret ta bisa cu e costo di lechi di puiru pa alimentá un solo yu, ta un biaha i mei e suma cu un famia den su pueblito ta gana den henter un aña. Asta si e lechi tabata grátis, ainda lo tabatin e problema di haña awa limpi pa traha e lechi como alimento safe pa yu. *

Por reducí algun dje obstáculonan aki si mamanan cu ta contagiá cu HIV tin sanidad apropiado, cantidad adecuá di substituto pa lechi di pechu i acceso na awa limpi. E cosnan aki ta caru? Kisas. Sin embargo, ta un sorpresa pa sa cu haci e percuracionnan ei ta aparentemente mas un asuntu di pone prioridad cu di haña fondo. Sí, ONU ta informá cu algun dje paisnan mas pober na mundu ta gasta rond di dos biaha mas tantu placa na asuntunan militar cu nan ta gasta na salubridad i educacion.

Kico di Remedinan Anti-AIDS?

Científiconan di ONU a raportá cu un remedi simpel i basta barata cu yama AZT por reducí transmision di HIV di mama pa yu considerablemente. Cu yudansa di UNAIDS, nan a baha e costo dje tratamentu aki na 90 florin. Ademas, investigadónan di AIDS a anunciá na juli 1999 cu si trata mama HIV-positivo i nan yunan recien nací cu e remedi nevirapine, na balor di cincu florin so, ta parce di ta asta mas eficas cu AZT pa prevení transmision di HIV. Expertonan di salú ta bisa cu pa aña nevirapine lo por prevení te cu 400.000 baby recien nací di cuminsá nan bida cu HIV.

Sin embargo, tin hende ta criticá e tratamentunan ei cu remedi, bisando cu como nan ta limitá na solamente prevení transmision di HIV di mama pa yu, e mama cu tempu lo muri di AIDS i laga e baby huérfano. ONU ta respondé cu e otro alternativa scur ta pa laga e babynan haña HIV, i asina condená e víctimanan inocente aki na un morto lento i tristu. Tambe ONU ta argumentá cu mamanan contagiá cu HIV por biba pa añanan. Tuma Cynthia, mencioná na cuminsamentu. El a haña sa cu e tin HIV na 1985, ora su baby a nace, pero e no a bira malu sino te cu ocho aña despues. Aunke su baby tabatin HIV ora el a nace, na edad di dos aña e no tabatin e mas.

Bijbel su siguransa consolador ta cu un ambiente berdaderamente safe i e solucion duradero pa plaganan manera AIDS ta na bista. (Revelacion 21:1-4) Jehova Dios ta primintí un mundu nobo den cua “ningun residente lo bisa: ‘Mi ta malu.’ ” (Isaías 33:24) Testigonan di Jehova gustosamente kier conta bo tocante e solucion duradero aki. Pa mas informacion, por fabor, tuma contacto cu e publicadónan dje revista aki of cu Testigonan di Jehova den bo comunidad.

[Nota]

[Rekonosementu pa Potrèt na página 20]

WHO/E. Hooper