1. Dikon bo gusta hende ku tin pasenshi?

 NOS gusta hende ku tin pasenshi. Nos ta atmirá ora un hende por warda trankil pa algu sin keha. I nos ta kontentu ora otro hende no pèrdè pasenshi ku nos ora nos hasi algu robes. Anto nos ta hopi gradisidu ku e ruman ku a studia ku nos tabatin pasenshi ora nos tabata lucha pa komprondé i apliká siñansanan di Beibel. Pero loke nos ta mas gradisidu p’e ta ku Yehova tin pasenshi ku nos!—Rom. 2:4.

2. Ki ora no ta fásil pa tene pasenshi?

² Aunke nos gusta hende ku tin pasenshi, no ta tur ora nos mes tin pasenshi. Por ehèmpel, no ta fásil pa nos keda trankil ora ku nos ta pegá den tráfiko, foral ora nos ta lat. Anto nos por konsumí ora hende ta traha riba nos nèrvio. I tin biaha ta difísil pa nos sigui warda riba Yehova su mundu nobo. Bo ke tin mas pasenshi? Awèl den e artíkulo akí nos ta bai mira kiko ke men tene pasenshi i dikon e ta asina importante. Nos ta bai wak tambe kon pa haña mas pasenshi.

3. Kiko un persona ku tin pasenshi ta hasi ora otro hende provok’é?

³ Laga nos trata kuater manera ku nos por tene pasenshi. Di promé, un persona ku tin pasenshi no ta rabia lihé. Ora hende provok’é, e ta keda trankil i no ta paga malu ku malu. Ademas, ora e ta bou di strès, e no ta trata hende malu. E promé biaha ku Beibel ta menshoná e karakterístika ei di pasenshi ta ora el a deskribí Yehova komo ‘un Dios miserikòrdioso i yen di kompashon, un Dios ku no ta rabia lihé i ku ta yen di amor leal.’—Éks. 34:6, di dos nota.

4. Kiko un hende ku tin pasenshi ta hasi ora e tin ku warda?

 ⁴ Di dos, un hende ku tin pasenshi ta warda trankil. Si algu dura mas largu ku el a ferwagt, e ta purba di no bira krepchi ni agitá. (Mat. 18:26, 27) Tin hopi situashon kaminda nos tin ku warda trankil. Por ehèmpel, ora un hende ta papia ku nos, nos ta skuch’é ku pasenshi sin interumpié. (Yòb 36:2) Kisas nos mester tin pasenshi tambe ora ku nos ta yuda un studiante komprondé un siñansa di Beibel òf yud’é vense un mal hábito.

5. Kiko ta un otro manera pa mustra pasenshi?

⁵ Di tres, un hende ku tin pasenshi no ta impulsivo. Ta bèrdat ku tin biaha bo tin ku reakshoná lihé. Pero un hende ku tin pasenshi, asta ora e tin algu importante pa hasi, no ta hasi nada purá-purá. Mas bien e ta apartá tempu pa plania loke e ta bai hasi. I ta hasi sigur ku e tin sufisiente tempu pa hasi e trabou bon.

6. Kiko un hende ku tin pasenshi ta hasi ora e ta pasando den prueba òf difikultat?

⁶ Di kuater, un hende ku tin pasenshi ta wanta prueba sin keha. Pasenshi ta konektá ku perseveransia. Klaru, no tin nada malu pa papia ku un bon amigu tokante loke bo ta pasando aden i kon bo ta sinti bo. Pero, un hende ku tin pasenshi lo hasi esfuerso pa keda kòrda riba tur e kosnan bon ku ta pasando den su bida. I lo e hasi su esfuerso pa sigui sirbi Yehova ku goso. (Kol. 1:11) Komo sirbidónan di Yehova, nos tin ku mustra pasenshi den tur e kuater maneranan ku nos a menshoná. Ban wak dikon.

7. Segun Santiago 5:7 i 8, dikon pasenshi ta importante? (Wak e plachi.)

⁷ Pa nos haña bida eterno, nos mester  tin pasenshi. Meskos ku Yehova su fiel sirbidónan den pasado, nos mester warda ku pasenshi pa Dios kumpli ku su promesanan. (Heb. 6:11, 12) Beibel ta kompará nos ku kunukero. (Lesa Santiago 5:7, 8.) Un kunukero ta traha duru pa planta i muha su kunuku, pero e no sa na ki momento su planchinan lo krese. P’esei, e tin ku warda ku pasenshi. Pero, e sa sí ku e dia lo yega ku lo e kosechá. Di mes manera nos ta keda bezig ku nos kosnan spiritual aunke nos “no sa ki dia [nos] Señor ta bini.” (Mat. 24:42) Pues, nos ta warda ku pasenshi, konfiando ku na Yehova su debido tempu, lo e kumpli ku tur loke el a primintí. Si nos pèrdè pasenshi, nos lo kansa di warda i pokopoko drif bai for di e bèrdat. Ademas, nos por kuminsá focus riba kosnan ku nos ta sinti lo hasi nos felis awor. Pero, si nos tin pasenshi, nos lo perseverá te na fin i ser salbá.—Mik. 7:7; Mat. 24:13.

8. Kon pasenshi ta yuda nos bai bon ku otro? (Kolosensenan 3:12, 13)

⁸ Ora nos tin pasenshi lo ta mas fásil pa nos bai bon ku otro hende. Pasenshi ta yuda nos pa skucha otro hende ku atenshon ora nan ta papia. (Sant. 1:19) Pasenshi ta yuda nos pa ta na pas ku otro. I ora nos ta bou di strès, e ta yuda nos pa no bula reakshoná i bisa algu ku lo hasi otro hende doló. Anto lo e yuda nos pa no rabia lihé ora un hende hùrt nos. Na lugá di paga malu ku malu, nos lo “sigui soportá otro i pordoná otro libremente.”—Lesa Kolosensenan 3:12, 13.

9. Ora di tuma desishon, kon pasenshi lo yuda nos? (Proverbionan 21:5)

⁹ Pasenshi por yuda nos ora di tuma desishon. Na lugá di kore tuma un desishon, nos lo tuma tempu pa investigá i wak tur e opshonnan ku nos tin i djei tuma e mihó desishon. (Lesa Proverbionan 21:5.) Por ehèmpel, si nos ta buskando trabou, nos por haña gana di tuma e promé trabou ku nos haña, aunke ku nos sa bon-bon ku lo e por pone nos pèrdè algun reunion i sirbishi. Pero, si nos tin pasenshi, nos lo tene kuenta ku: unda e trabou ta, kon e orarionan ta i ki efekto lo e bai tin riba nos famia i nos amistat ku Yehova. Ora nos tin pasenshi nos lo evitá di tuma un mal desishon.

10. Kiko nos tin ku hasi pa nos haña mas pasenshi?

¹⁰ Pidi Yehova yuda nos haña mas pasenshi. Pasenshi ta forma parti di e fruta di spiritu santu. (Gal. 5:22, 23) Pues, nos por pidi Yehova pa usa su spiritu santu pa yuda nos haña mas pasenshi. Si bo ta sinti ku un situashon ta hinka bo pasenshi den un bòter, “sigui pidi” Yehova pa su spiritu santu. (Luk. 11:9, 13) Ademas, pidi Yehova yuda nos mira kosnan manera e ta mira nan. Despues di hasi orashon, hasi esfuerso tur dia pa keda tene pasenshi. Si nos sigui pidi Yehova pa pasenshi i ta hasi esfuerso pa tene pasenshi, nos lo mira ku pokopoko nos lo haña mas pasenshi.

11-12. Kon Yehova ta mustra pasenshi?

¹¹ Pensa riba e ehèmpelnan ku tin den Beibel. Den Beibel nos por lesa tokante diferente hende ku a tene pasenshi. E relatonan ei por yuda nos tambe tene pasenshi. Pero promé ku nos papia tokante algun di nan, laga nos papia tokante e persona ku ta tene mas pasenshi ku tur: Yehova.

¹² Den e hòfi na Éden, Satanas a daña  Yehova su nòmber i a kuestioná si Yehova ta un Gobernante hustu i amoroso. Na lugá di destruí Satanas mesora, Yehova a mustra pasenshi i dominio propio. Yehova tabata sa ku lo tuma tempu pa proba ku su manera di goberná ta mihó. Pues, ketu bai e ta soportá ku ta daña su nòmber. Ademas, su pasenshi ta habri kaminda pa mas hende haña bida eterno. (2 Ped. 3:9, 15) Komo resultado, miónes di hende a siña konos’é. Si nos keda pensa riba e kosnan bon ku Yehova su pasenshi ta logra, lo ta mas fásil pa nos warda te ora e trese un fin na e mundu malbado akí.

13. Kon Hesus a tene pasenshi meskos ku su Tata? (Wak e plachi.)

¹³ Hesus tin mesun pasenshi ku su Tata, i el a mustra esei ora e tabata aki na tera. Pero no tabata semper fásil pa Hesus tene pasenshi, foral ku e eskriba- i fariseonan hipókrita. (Huan 8:25-27) Pero, meskos ku su Tata, Hesus no a rabia lihé. Ora ku nan a insult’é òf a purba di pon’é rabia, e no a paga malu ku malu. (1 Ped. 2:23) Ku pasenshi, el a soportá su pruebanan sin keha. No ta nada straño anto ku Beibel ta bisa: “Konsiderá ku sumo atenshon esun ku a soportá palabranan ofensivo di parti di pekadónan.” (Heb. 12:2, 3) Ku Yehova su yudansa, nos tambe por soportá kualke prueba ku pasenshi.

14. Kiko nos ta siña di Ábraham? (Hebreonan 6:15) (Wak e plachi.)

¹⁴ Hopi di nos a ferwagt ku pa aworakí e fin lo a yega kaba. Anto kisas, nos tin miedu ku nos lo no ta na bida pa mira e fin. Ken su relato por yuda nos si nos ta sinti asina? Esun di Ábraham. Tempu ku Ábraham tabatin 75 aña i ainda e no  tabatin yu, Yehova a primintié ku lo e laga su “desendientenan bira un nashon grandi.” (Gén. 12:1-4) Akaso Ábraham a logra mira kumplimentu di e promesa ei? No kompletamente. Despues ku Ábraham a krusa riu Eufrátes, e mester a warda 25 aña promé ku Yehova hasi un milager pa asina su yu Ísak nase. I despues di esei, e mester a warda 60 aña mas pa su ñetunan Esou i Yákòb nase. (Lesa Hebreonan 6:15.) Pero Ábraham no a biba largu sufisiente pa mira su desendientenan bira un nashon grandi i heredá Tera Primintí. Pero loke sí e hòmber fiel ei a disfrutá di dje ta un amistat será ku su Kreador. (Sant. 2:23) Bo por imaginá bo kon kontentu Ábraham lo ta ora e resusitá? Lo e haña sa ku, debí ku e tabatin fe i pasenshi, tur nashon a ser bendishoná. (Gén. 22:18) Kiko ta e lès pa nos? Wèl, kisas nos no ta bai mira kumplimentu di tur Yehova su promesanan mesora. Pero si nos tin pasenshi meskos ku Ábraham, nos por tin sigur ku Yehova lo rekompensá nos aworakí i mas ainda den su mundu nobo ku El a primintí.—Mar. 10:29, 30.

15. Kiko nos por trata durante nos estudio personal?

¹⁵ Tin mas hende den Beibel ku a tene pasenshi. (Sant. 5:10) Si bo ke mas pasenshi, kisas ta bon pa durante bo estudio personal bo analisá e relatonan ei. b Laga nos tuma David komo ehèmpel. David tabata  hopi yòn ora ku a ungié komo futuro rei di Israel. Pero, e mester a warda basta aña promé ku el a bira rei. Anto Simeon i Ana a sirbi Yehova fielmente pa hopi aña miéntras nan tabata warda pa Mesías. (Luk. 2:25, 36-38) Segun ku bo ta pasa den e relatonan ei, purba di kontestá e siguiente preguntanan: Kiko a yuda e persona akí tene pasenshi? Dikon ta bon ku el a tene pasenshi? Kon ami por hasi meskos kuné? Kisas algu tambe ku bo por hasi ta di pasa den e relatonan di hende ku no tabatin pasenshi. (1 Sám. 13:8-14) Anto bo por puntra bo mes: Kiko a pone ku nan no tabatin pasenshi? Ki konsekuensia esei tabatin?

16. Kiko ta algun di e bendishonnan di tene pasenshi?

¹⁶ Pensa riba e bendishonnan di tene pasenshi. Ora nos tene pasenshi, nos ta mas felis i nos ta trankil. Pues, bon mirá, pasenshi por mehorá tantu nos salú físiko komo nos salú mental. Anto si nos tene pasenshi ku otro hende, nos amistat ku nan tambe lo mehorá. Nos kongregashon tambe lo ta mas uní. I debí ku nos no ta rabia lihé, asta si un hende purba di pone nos rabia, nos lo evitá ku e situashon por bira pió. (Sal. 37:8; Pro. 14:29) Pero mas importante ainda, ora nos tene pasenshi, nos ta imitando nos Tata den shelu i nos ta mehorando nos amistat kuné.

17. Kiko nos mester ta determiná pa hasi?

¹⁷ Ta bisto anto ku pasenshi ta un bon kualidat. Aunke ku no ta semper nos lo haña ku ta fásil pa nos tene pasenshi, ku Yehova su yudansa nos por sigui kultivá e kualidat ei. Anto segun ku nos ta sigui warda riba e mundu nobo ku pasenshi, nos por tin sigur ku “Yehova su bista ta riba hende ku tin rèspèt profundo p’e. Sí, su bista ta riba esnan ku ta spera riba su amor leal.” (Sal. 33:18) P’esei, laga nos tur ta determiná pa sigui tene pasenshi.